ຫວ່າງມໍ່ໆມານີ້, ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ ປະທານປະເທດຈີນໄດ້ໃຫ້ທິດຊີ້ນຳທີ່ສຳຄັນກ່ຽວກັບການສະກັດກັ້ນການບໍລິໂພກທີ່ສິ້ນເປືອງ ແລະ ຟຸມເຟືອຍ. ທ່ານສີຈິ້ນຜິງຊີ້ອອກວ່າ, ປະກົດການສິ້ນເປຶອງແລະຟຸມເຟືອຍເປັນບັນຫາທີ່ໜ້າຕົກໃຈຫຼາຍ ແລະ ເປັນຕາເຈັບໃຈແທ້ໆ. ກະວີບູຮານຈີນລະບຸໄວ້ວ່າ: “ມີໃຜແດ່ທີ່ຮູ້ວ່າອາຫານໃນຈານ, ທຸກເມັດລ້ວນແຕ່ມາຈາກເຫື່ອແຮງທີ່ລຳບາກ.” ເຖິງວ່າການຜະລິດສະບຽງອາຫານຂອງຈີນໄດ້ຮັບຜົນເກັບກ່ຽວທີ່ອຸດົມສົມບູນໃນຫຼາຍປີຕິດຕໍ່ກັນ, ແຕ່ກໍຕ້ອງມີສະຕິລະວັງຕົວຕໍ່ບັນຫາຄວາມໝັ້ນຄົງດ້ານສະບຽງອາຫານ, ໂດຍສະເພາະໃນປີນີ້, ການແຜ່ລະບາດຂອງພະຍາດໂຄວິດ-19 ໄດ້ສ້າງຜົນກະທົບຕໍ່ທົ່ວໂລກ, ຍິ່ງເປັນການຕີລະຄັງເຕືອນໄພໃຫ້ແກ່ພວກເຮົາ.
ທ່ານສີຈິ້ນຜິງກ່າວເນັ້ນວ່າ, ຕ້ອງເພີ່ມທະວີການສ້າງກົດໝາຍ ແລະ ການຕິດຕາມຄຸ້ມຄອງ, ໃຊ້ມາດຕະການທີ່ມີປະສິດທິຜົນ, ສ້າງກົນໄກທີ່ມີຜົນໃນໄລຍະຍາວ, ເດັດດ່ຽວສະກັດກັ້ນການບໍລິໂພກອາຫານແບບສິ້ນເປຶອງ ແລະ ຟຸມເຟືອຍ. ຕ້ອງເພີ່ມທະວີການໂຄສະນາ ແລະ ສຶກສາອົບຮົມຕື່ມອີກ, ສ້າງຄວາມຊິນເຄີຍທີ່ຮູ້ຈັກການປະຢັດມັດທະຍັດ, ສ້າງບັນຍາກາດທີ່ ຖືເອົາການບໍລິໂພກແບບສິ້ນເປືອງ ແລະ ຟຸມເຟືອຍເປັນສິ່ງທີ່ໜ້າອັບອາຍ ແລະ ຖືເອົາການປະຢັດເປັນສິ່ງທີ່ມີກຽດໃນທົ່ວສັງຄົມ.
ຕັ້ງແຕ່ໃດໆມາ, ທ່ານສີຈິ້ນຜິງໄດ້ໃຫ້ຄວາມສຳຄັນຢ່າງສູງຕໍ່ຄວາມໝັ້ນຄົງດ້ານສະບຽງອາຫານ, ແລະ ສົ່ງເສີມບັນຍາກາດທົ່ວສັງຄົມທີ່ “ເຊີດຊູຈິດໃຈປະຢັດ ຄັດຄ້ານການບໍລິໂພກແບບສິ້ນເປືອງຟຸມເຟືອຍ”, ທ່ານເຄີຍກ່າວເນັ້ນມາຫຼາຍເທື່ອແລ້ວວ່າຕ້ອງສະກັດກັ້ນ ການບໍລິໂພກແບບສິ້ນເປືອງ ແລະ ຟຸມເຟືອຍ, ຮຽກຮ້ອງໃຫ້ອອກລະບຽບການແລະບັງຄັບໃຊ້, ປະຕິບັດລະບຽບການຢ່າງເຂັ້ມງວດ, ຕິດຕາມກວດກາຢ່າງເຄັ່ງຄັດ, ຕ້ອງມີກົນໄກລົງໂທດທີ່ເຂັ້ມງວດ, ເພື່ອສະກັດກັ້ນການກະທຳຜິດກົດໝາຍກົດລະບຽບ ແລະ ວິໄນຕ່າງໆໃນການບໍລິໂພກດ້ວຍການນຳໃຊ້ງົບປະມານລັດ, ທັງແນ່ໃສ່ການແກ້ໄຂບັນຫາການບໍລິໂພກອາຫານແບບສິ້ນເປືອງ ແລະ ຟຸມເຟືອຍໃນໂຮງຮຽນຈຳນວນໜຶ່ງ ແລະ ບັນຫາທີ່ນັກຮຽນນັກສຶກສາບໍ່ມີສະຕິປະຢັດນັ້ນ, ຈະຕ້ອງເພີ່ມທະວີການຊີ້ນຳນຳພາ ແລະ ຄຸ້ມຄອງຢ່າງຕິດແທດຕົວຈິງ, ບຳລຸງສ້າງຄຸນສົມບັດທີ່ດຸໝັ່ນ ແລະ ປະຢັດມັດທະຍັດໃຫ້ກັບນັກຮຽນນັກສຶກສາ.