ວັນທີ 17 ສິງຫານີ້, ທ່ານເມິ້ງເວີຍ ໂຄສົກຄະນະກຳມະການການພັດທະນາແລະການປະຕິຮູບແຫ່ງຊາດຈີນກ່າວໃນພິທີຖະແຫຼງຂ່າວວ່າ: ເພື່ອຮັບມືກັບຜົນກະທົບທີ່ມີຕໍ່ໂຄງການ “ໜຶ່ງແລວໜຶ່ງເສັ້ນທາງ” ຢູ່ຕ່າງປະເທດຍ້ອນການແຜ່ລະບາດຂອງພະຍາດໂຄວິດ-19 ຢ່າງເໝາະສົມ, ຫວ່າງມໍ່ໆມານີ້, ໃນຖານະເປັນຫ້ອງການໜ່ວຍນຳພາຊຸກຍູ້ວຽກງານສ້າງ “ໜຶ່ງແລວໜຶ່ງເສັ້ນທາງ” ຢູ່ຕ່າງປະເທດ, ຄະນະກຳມະການການພັດທະນາແລະການປະຕິຮູບແຫ່ງຊາດຈີນໄດ້ກຳນົດມາດຕະການຫຼາຍຢ່າງເພື່ອຊຸກຍູ້ການປ້ອງກັນແລະຄວບຄຸມການແຜ່ລະບາດຂອງພະຍາດໂຄວິດ-19 ແລະການສ້າງໂຄງການ “ໜຶ່ງແລວໜຶ່ງເສັ້ນທາງ” ຢູ່ຕ່າງປະເທດໃນຫຼາຍດ້ານ.
ທ່ານເມິ້ງເວີຍກາວວ່າ: ໂດຍ“ຖືເອົາຄວາມປອດໄພດ້ານຊີວິດແລະສຸຂະພາບຂອງພະນັກງານກໍ່ສ້າງໂຄງການຢູ່ຕ່າງປະເທດໄວ້ໃນຖານະສຳຄັນທີ່ສຸດ, ເອົາໃຈໃສ່ເຮັດວຽກປ້ອງກັນຄວາມປອດໄພຂອງພະນັກງານກໍ່ສ້າງໂຄງການຢູ່ຕ່າງປະເທດໃຫ້ດີ. ຕິດຕາມສະພາບການແຜ່ລະບາດຂອງພະຍາດໂຄວິດ-19 ຢູ່ຕ່າງປະເທດຢ່າງທັນການ, ປະຕິບັດມາດຕະການທີ່ຖືກຕ້ອງເໝາະສົມກັບທ້ອງຖິ່ນ, ປະຕິບັດວຽກງານປ້ອງກັນແລະຄວບຄຸມການແຜ່ລະບາດຂອງພະຍາດໂດຍແບ່ງເປັນຂົງເຂດແລະປະເພດ, ເພີ່ມທະວີການຮ່ວມມືສາກົນດ້ານການປ້ອງກັນແລະຄວບຄຸມການແຜ່ລະບາດຂອງພະຍາດ, ແບ່ງປັນບົດຮຽນດ້ານການປ້ອງກັນແລະຄວບຄຸມພະຍາດ, ໃຫ້ການຊ່ວຍເຫຼືອດ້ານວັດຖຸຕ້ານກັບການແຜ່ລະບາດຂອງພະຍາດຢ່າງສຸດຄວາມສາມາດຂອງຕົນ, ເພື່ອຊ່ວຍເຫຼືອປະເທດທີ່ມີໂຄງການກໍ່ສ້າງໃຫ້ສາມາດຮັບມືກັບການແຜ່ລະບາດຂອງພະຍາດໂຄວິດ-19 ໄດ້.”