ວັນທີ 17 ສິງຫານີ້, ທ່ານສີຈິ້ນຜິງ ປະທານປະເທດຈີນໄດ້ສົ່ງສານໄປຍັງທ່ານໂຈໂກ ວິໂດໂດ, ເພື່ອອວຍພອນວັນຊາດສາທາລະນະລັດອິນໂດເນເຊຍຄົບຮອບ 75 ປີ.
ໃນສານຂອງທ່ານສີຈິ້ນຜິງ ມີເນື້ອໃນວ່າ, ປັດຈຸບັນການພົວພັນລະຫວ່າງຈີນກັບອິນໂດເນເຊຍໄດ້ມີທ່ວງທ່າຂະຫຍາຍຕົວທີ່ດີງາມ. ສອງຝ່າຍໄດ້ຮ່ວມກັນຕ້ານກັບການແຜ່ລະບາດຂອງພະຍາດໂຄວິດ-19, ທັງຊຸກຍູ້ການຟື້ນຟູການຜະລິດແລະຮ່ວມກັນສ້າງ “ໜຶ່ງແລວໜຶ່ງເສັ້ນທາງ”, ກໍຄືການສະໜັບສະໜູນລັດທິຫຼາຍຝ່າຍແລະຮັກສາສະພາບລວມຕ້ານກັບການແຜ່ລະບາດຂອງພະຍາດໃນໂລກ, ປະກອບສ່ວນຢ່າງຕັ້ງໜ້າເຂົ້າໃນການປົກປ້ອງສຸຂະພາບແລະຄວາມຜາສຸກຂອງປະຊາຊົນສອງປະເທດກໍຄືຂອງໂລກ. ຂ້າພະເຈົ້າເອົາໃຈໃສ່ຢ່າງສູງຕໍ່ການຂະຫຍາຍການພົວພັນລະຫວ່າງຈີນກັບອິນໂດເນເຊຍ, ຍິນດີສຸມຄວາມພະຍາຍາມຮ່ວມກັນກັບທ່ານ, ເພື່ອເອົາຊະນະໃນການຕໍ່ສູ້ຕ້ານກັບການແຜ່ລະບາດຂອງພະຍາດ, ຮ່ວມກັນສ້າງສະພາບການໃໝ່ທີ່ສອງປະເທດໄດ້ຮັບຜົນປະໂຫຍດແລະພັດທະນາຮ່ວມກັນໃນຍຸກໃໝ່, ຊຸກຍູ້ໃຫ້ການພົວພັນຍຸດທະສາດຮອບດ້ານລະຫວ່າງສອງປະເທດຂະຫຍາຍໄປຂ້າງໜ້າຢ່າງບໍ່ຢຸດຢັ້ງ.