ຫວ່າງກ່ອນນີ້ບໍ່ດົນ, ກອງປະຊຸມປະຈຳຂອງຄະນະລັດຖະບານຈີນໄດ້ຕົກລົງຈະລົງເລິກການພັດທະນາດ້ວຍການປະດິດສ້າງໃໝ່ດ້ານການຄ້າແລະການບໍລິການຢ່າງຮອບດ້ານຢູ່ຈຸດທົດລອງ, ໄດ້ອະນຸມັດແລະພິມເຜີຍແຜ່ “ແຜນການລວມກ່ຽວກັບການລົງເລິກການພັດທະນາດ້ວຍການປະດິດສ້າງໃໝ່ດ້ານການຄ້າແລະການບໍລິການຢ່າງຮອບດ້ານຢູ່ຈຸດທົດລອງ”. ຕໍ່ເລື່ອງນີ້, ຜູ້ຮັບຜິດຊອບທີ່ກ່ຽວຂ້ອງຂອງກະຊວງການຄ້າຈີນກ່າວວ່າ: ການເປີດກວ້າງການເປີດປະຕູສູ່ພາຍນອກໃນຂົງເຂດການບໍລິການແມ່ນທິດທາງຂອງການພັດທະນາທີ່ສຳຄັນຢູ່ຈຸດທົດລອງ ໂດຍຈະເພີ່ມພະລັງແຮງໃໝ່ເຂົ້າໃນການພັດທະນາດ້ານການຄ້າແລະການບໍລິການຂອງໂລກ.
ທ່ານ ສຽນໂກຢີ້ ຫົວໜ້າກົມການຄ້າແລະການບໍລິການຂອງກະຊວງການຄ້າຈີນໄດ້ໃຫ້ຮູ້ໃນມື້ດັ່ງກ່າວວ່າ: ຈຸດທົດລອງໃໝ່ໄດ້ເພີ່ມຈາກຈຸດທົດລອງດັ້ງເດີມ 17 ແຫ່ງຂຶ້ນເປັນ 28 ແຫ່ງ, ໄດ້ເພີ່ມເທດສະບານແຂວງແລະນະຄອນໃນແຜນການທີ່ມີຈຸດທົດລອງໃໝ່ 9 ແຫ່ງເຊັ່ນ: ນະຄອນຕ້າຫຼຽນ, ນະຄອນເຊ້ຍເຫມີນ,ນະຄອນຊິ່ງຕາວແລະນະຄອນສືເຈ່ຍຈວ່າງເປັນຕົ້ນ, ພ້ອມທັງໄດ້ຈັດເອົາເຂດພັດທະນາໃໝ່ກຸ້ຍອ່ານກັບນະຄອນກຸ້ຍຢາງ,ເຂດພັດທະນາໃໝ່ຊີ່ສຽນກັບນະຄອນຊີອ່ານເຂົ້າເປັນເຂດພັດທະນາດຽວ, ເຂດພັດທະນາໃໝ່ຂອງນະຄອນຈຸ່ງກິ່ງທີ່ຕັ້ງຢູ່ຕາມລ້ອງແມ່ນ້ຳສອງສາຍໄດ້ເປີດກວ້າງອອກເປັນ 21 ເຂດ. ແຜນການດັ່ງກ່າວໄດ້ສະເໜີໜ້າວຽກໃຫ້ຈຸດທົດລອງມີ 8 ໂຄງການໃນ 3 ດ້ານ, ມີ 122 ມາດຕະການທີ່ເປັນຮູບປະທຳ. ທ່ານກ່າວເນັ້ນຕື່ມວ່າ: ລະດັບການເປີດປະຕູຢູ່ຈຸດທົດລອງໃໝ່ຈະຖືກຍົກສູງຂຶ້ນຕື່ມອີກ.