ທ່ານສີຈິ້ນຜິງກ່າວເນັ້ນວ່າ: ຕ້ອງມີວິໄສທັດໄລຍະຍາວ ກຳແໜ້ນທ່ວງທ່າລວມ ເປີດກວ້າງການລະດົມຂໍຄວາມເຫັນ ເຕົ້າໂຮມສະຕິປັນຍາ ເພື່ອຄົ້ນຄວ້າສະພາບການໃໝ່ວາງແຜນຜັງໃໝ່
ຕອນບ່າຍວັນທີ 24 ສິງຫານີ້, ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ ປະທານປະເທດຈີນໄດ້ເປັນປະທານຈັດກອງປະຊຸມສຳມະນາກັບຊ່ຽວຊານໃນຂົງເຂດເສດຖະກິດສັງຄົມຢູ່ທຳນຽບຈົ່ງນານໄຫທີ່ນະຄອນຫຼວງປັກກິ່ງ, ທັງປະກອບຄຳເຫັນທີ່ສຳຄັນ. ທ່ານສີຈິ້ນຜິງກ່າວເນັ້ນວ່າ, ໄລຍະດຳເນີນແຜນພັດທະນາເສດຖະກິດສັງຄົມແຫ່ງຊາດ 5 ປີ ຄັ້ງທີ 14, ກໍແມ່ນ 5 ປີທຳອິດຫຼັງຈາກທີ່ຈີນສ້າງສັງຄົມທີ່ອີ່ມໜຳສຳລານໃຫ້ສຳເລັດຢ່າງຮອບດ້ານ ທັງແມ່ນການບັນລຸເປົ້າໝາຍສູ້ຊົນໃນເຫດການປະຫວັດສາດສຳຄັນຮ້ອຍປີ ປະການທຳອິດ, ເປັນການເປີດຂະບວນການໃໝ່ໃນການສ້າງສາປະເທດສັງຄົມນິຍົມທີ່ທັນສະໄໝຢ່າງຮອບດ້ານ ແລະ ກ້າວໄປສູ່ ເປົ້າໝາຍສູ້ຊົນໃນເຫດການປະຫວັດສາດສຳຄັນຮ້ອຍປີປະການທີ2, ຈີນຈະກ້າວເຂົ້າສູ່ໄລຍະພັດທະນາອັນໃໝ່. ບໍ່ວ່າສິ່ງໃດກໍຄວນມີການກະກຽມວາງແຜນໄວ້ລ່ວງໜ້າຈຶ່ງຈະສາມາດເຮັດສຳເລັດໄດ້, ຖ້າບໍ່ມີແຜນການລ່ວງໜ້າກໍຈະລົ້ມລະລາຍ. ພວກເຮົາຕ້ອງມີວິໄສທັດໄລຍະຍາວ ກຳແໜ້ນທ່ວງທ່າລວມ ເປີດກວ້າງການລະດົມຄວາມເຫັນ ແລະ ເຕົ້າໂຮມສະຕິປັນຍາ ເພື່ອຄົ້ນຄວ້າສະພາບການໃໝ່ ແລະ ວາງແຜນການໃໝ່.
ທ່ານສີຈິ້ນຜິງກ່າວເນັ້ນວ່າ, ຕ້ອງມີແນວຄິດສັດຈະວິພາກຕໍ່ກາລະໂອກາດອັນໃໝ່ ແລະ ສິ່ງທ້າທາຍອັນໃໝ່ໃນໄລຍະພັດທະນາໃໝ່. ຕ້ອງສ້າງສະພາບການພັດທະນາໃໝ່ໂດຍຖືເອົາການສ້າງຮອບໝູນວຽນເສດຖະກິດແຫ່ງຊາດທີ່ສະດວກເປັນຫຼັກ. ການສ້າງສະພາບການພັດທະນາໃໝ່ບໍ່ແມ່ນການສ້າງຮອບໝູນວຽນພາຍໃນປະເທດທີ່ປິດກັ້ນຕົນເອງ, ແຕ່ຫາກແມ່ນການສ້າງຮອບໝູນວຽນແບບເປີດກວ້າງທັງພາຍໃນແລະ ຕ່າງປະເທດຊ່ວຍຊູຍູ້ໜູນກັນແລະກັນ. ຕ້ອງໃຊ້ການປະດິດສ້າງໃໝ່ດ້ານວິທະຍາສາດເຕັກໂນໂລຊີເພື່ອກະຕຸກຊຸກຍູ້ແຮງຂັບເຄື່ອນອັນໃໝ່ໃນການພັດທະນາ. ຖ້າຢາກບັນລຸການພັດທະນາທີ່ມີຄຸນນະພາບສູງ, ກໍຕ້ອງບັນລຸການເຕີບໂຕທີ່ເນັ້ນປະສິດທິພາບສູງ ແລະ ຂັບເຄື່ອນດ້ວຍການປະດິດສ້າງໃໝ່, ອອກແຮງຍົກສູງຄວາມສາມາດທີ່ປະດິດສ້າງໃໝ່ຢ່າງເປັນເຈົ້າຕົນເອງ, ບຸກທະລຸການຄົ້ນຄວ້າເຕັກໂນໂລຊີແກນກາງໂດຍໄວ. ຕ້ອງນຳໃຊ້ການລົງເລິກການປະຕິຮູບເພື່ອກະຕຸກຊຸກຍູ້ການພັດທະນາຢ່າງມີຊີວິດຊີວາ. ຄຽງຄູ່ກັບຈີນພວມກ້າວເຂົ້າສູ່ການພັດທະນາໃນໄລຍະໃໝ່, ການປະຕິຮູບກໍໄດ້ຜະເຊີນກັບໜ້າທີ່ໃໝ່, ສະນັ້ນຕ້ອງໃຊ້ຄວາມກ້າຫານຫຼາຍກວ່າເກົ່າ, ມີມາດຕະການຫຼາຍກວ່າເກົ່າເພື່ອລຶບລ້າງອຸປະສັກດ້ານໂຄງປະກອບ ແລະ ກົນໄກໃນລະດັບທີ່ເລິກເຊິ່ງ, ຍຶດໝັ້ນ ແລະ ບູລະນະລະບອບສັງຄົມນິຍົມທີ່ມີສີສັນພິເສດຂອງຈີນ, ຊຸກຍູ້ການຫັນເປັນທັນສະໄໝຂອງລະບົບບໍລິຫານປະເທດ ແລະ ສ້າງຄວາມສາມາດດ້ານການບໍລິຫານປະເທດ.
ທ່ານສີຈິ້ນຜິງເນັ້ນໜັກວ່າ, ຕ້ອງໃຊ້ການເປີດປະຕູສູ່ພາຍນອກທີ່ມີລະດັບສູງເພື່ອສ້າງທ່າແຮງໃໝ່ໃນການຮ່ວມມື ແລະ ການແຂ່ງຂັນສາກົນ. ຕັ້ງໜ້າເຂົ້າຮ່ວມການປະຕິຮູບລະບົບຄຸ້ມຄອງເສດຖະກິດໂລກ, ຊຸກຍູ້ການປັບປຸງລະບົບຄຸ້ມຄອງເສດຖະກິດໂລກທີ່ມີຄວາມຍຸດຕິທຳ ແລະ ສົມເຫດສົມຜົນກວ່າເກົ່າ.