ວັນທີ 26 ສິງຫານີ້ເປັນວັນລະນຶກການສ້າງຕັ້ງເຂດເສດຖະກິດພິເສດເສິນເຈິ້ນຄົບຮອບ 40 ປີ. ຕະຫຼອດໄລຍະ 40 ປີຜ່ານມາ, ນະຄອນເສິນເຈິ້ນໄດ້ພັດທະນາຈາກເມືອງກະສິກຳຫຼ້າຫຼັງໃນເຂດຊາຍແດນກາຍເປັນຕົວເມືອງທີ່ມີຫົວຄິດປະດິດສ້າງໃໝ່ລະດັບສາກົນທີ່ເຕັມໄປດ້ວຍຄວາມມີຊີວິດຊີວາ, ລວມຍອດຜະລິດຕະພັນພາຍໃນ ຫຼື GDP ຂອງນະຄອນເສິນເຈິ້ນເມື່ອ 40 ປີກ່ອນມີບໍ່ເຖິງ 200 ລ້ວນຢວນໄດ້ເພີ່ມຂຶ້ນເປັນ 2700 ຕື້ຢວນໃນປັດຈຸບັນ. ໃນຖານະເປັນ “ປະຕູ” ແຫ່ງການປະຕິຮູບ ແລະ ເປີດປະຕູສູ່ພາຍນອກຂອງຈີນ, ເປັນຫຍັງ, ນະຄອນເສິນເຈິ້ນຈິ່ງສາມາດສ້າງສິ່ງມະຫັດສະຈັນດ້ານການພັດທະນາໄດ້ຄືແນວນີ້?
“ການພັດທະນາທີ່ວ່ອງໄວຂອງເສິນເຈິ້ນ” ເປັນຄວາມກະຕືລືລົ້ນ ທີ່ກຳເນີດເກີດຈາກການປະຕິຮູບ ແລະ ເປີດປະຕູສູ່ພາຍນອກຂອງຈີນ. ໃນໄລຍະ 40 ປີມານີ້, ເຂດເສດຖະກິດພິເສດເສິນເຈິ້ນໄດ້ສ້າງຂອບພື້ນຖານໂຄງປະກອບເສດຖະກິດຕະຫຼາດສັງຄົມນິຍົມກ່ອນໝູ່, ໄດ້ຊຸກຍູ້ເສດຖະກິດຕະຫຼາດໃຫ້ຂະຫຍາຍອອກໄປທົ່ວແຜ່ນດິນໃຫຍ່ຈີນ ດ້ວຍແຜນຍຸດທະສາດ “ຈຸດທົດລອງ”.
ໃນຂະບວນການສ້າງຄວາມມະຫັດສະຈັນດ້ານການພັດທະນາ, ການປະດິດສ້າງໃໝ່ດ້ານວິທະຍາສາດເຕັກໂນໂລຊີໄດ້ກາຍເປັນກຳລັງຊຸກດັນຕົ້ນຕໍຂອງນະຄອນເສິນເຈິ້ນ. ປີ 2000, ນະຄອນເສິນເຈິ້ນໄດ້ນຳໜ້າໃນການຫັນປ່ຽນຮູບການພັດທະນາໃນຮູບແບບການຄ້າປຸງແຕ່ງມາສູ່ການພັດທະນາເຕັກນິກຂັ້ນສູງແລະໃໝ່. ປີ 2008 ແລະ ປີ 2009, ໄດ້ນຳໜ້າພັດທະນາອຸດສາຫະກຳຈະເລີນໃໝ່ທາງຍຸດທະສາດ, ປີ 2013, ໄດ້ນຳໜ້າພັດທະນາອຸດສາຫະກຳອະນາຄົດຕ່າງໆ ເຊັ່ນ: ອຸດສາຫະກຳສຸຂະພາບແລະຊີວິດ, ອຸປະກອນເອເລັກໂຕຣນິກແບບສວມໃສ່ ແລະ ອື່ນໆ. ປັດຈຸບັນ, ນະຄອນເສິນເຈິ້ນໄດ້ສ້າງສະຖານີສົ່ງສັນຍານ 5G ຈຳນວນ 46.000 ກວ່າແຫ່ງແລ້ວ, ໄດ້ສ້າງເປັນຕົວເມືອງ 5G ແຫ່ງທຳອິດໃນຂອບເຂດທົ່ວໂລກ.
40 ປີມານີ້, ນະຄອນເສິນເຈິ້ນໄດ້ເສີມຂະຫຍາຍ “ລັກສະນະພິເສດຂອງເຂດພິເສດ”, ພະຍາຍາມສ້າງສະພາບແວດລ້ອມໃນການດຳເນີນທຸລະກິດແບບຕະຫຼາດ, ແບບປົກຄອງດ້ວຍກົດໝາຍ ແລະ ແບບສາກົນ, ອົບຮົມບົ່ມສ້າງພື້ນຖານແຫ່ງການພັດທະນາຢ່າງບໍ່ຢຸດຢັ້ງ, ໃນຂະນະດຽວກັນ, ກໍ່ອ້າແຂນຕ້ອນຮັບທົ່ວໂລກດ້ວຍຈິດໃຈທີ່ເປີດປະຕູສູ່ພາຍນອກ ແລະ ນຳເອົາໂອກາດພັດທະນາຫຼາຍກວ່າເກົ່າມາໃຫ້ທົ່ວໂລກ.
ປັດຈຸບັນ, ນະຄອນເສິນເຈິ້ນພວມພະຍາຍາມນຳໜ້າໃນການສ້າງເຂດຕົວແບບຂອງການສ້າງສັງຄົມນິຍົມທີ່ມີສີສັນພິເສດຂອງຈີນ, ນີ້ແມ່ນພຶດຕິກຳຕົວຈິງຂອງຈີນໃນການຊຸກຍູ້ການປະຕິຮູບ ແລະ ເປີດປະຕູສູ່ພາຍນອກ ຈາກຈຸດເລີ່ມຕົ້ນທີ່ສູງກວ່າເກົ່າ, ມີລະດັບສູງກວ່າເກົ່າ ແລະ ມີເປົ້າໝາຍສູງກວ່າເກົ່າ. ພາຍໃຕ້ສະພາບການທີ່ສະຖານະການສາກົນນັບມື້ນັບສັບສົນ, ບໍ່ໝັ້ນທ່ຽງ ແລະ ບໍ່ແນ່ນອນເພີ່ມຂຶ້ນນັ້ນ, ນະຄອນເສິນເຈິ້ນທີ່ມີຄວາມວ່ອງໄວ, ມີການປະດິດສ້າງໃໝ່ ແລະ ຕັ້ງໃຈເປີດປະຕູສູ່ພາຍນອກນັ້ນ, ຈະສາມາດສ່ອງແສງໃຫ້ເຫັນວ່າ: “ຈີນຈະສືບຕໍ່ດຳເນີນການປະຕິຮູບ ແລະ ເປີດປະຕູສູ່ພາຍນອກຢ່າງບໍ່ຢຸດຢັ້ງ” ດ້ວຍການກະທຳຕົວຈິງ, ນີ້ຍ່ອມຈະເປັນການສ້າງສິ່ງມະຫັດສະຈັນດ້ານການພັດທະນາໃໝ່ໄດ້ຢ່າງຫຼາຍກວ່າເກົ່າ ແລະ ນຳເອົາໂອກາດການພັດທະນາມາໃຫ້ໂລກໄດ້ຫຼາຍກວ່າເກົ່າ.