ງານຕະຫຼາດນັດການຄ້າການບໍລິການສາກົນຈີນປີ 2020 ຈະໄຂຂຶ້ນຢ່າງເປັນທາງການໃນວັນທີ 4 ກັນຍານີ້, ຕອນບ່າຍວັນທີ 3 ກັນຍາ, ທ່ານຢາງຈິ້ນປາຍ ຮອງເຈົ້າຄອງນະຄອນຫຼວງປັກກິ່ງກ່າວໃນກອງປະຊຸມຖະແຫຼງຂ່າວວ່າ: ງານຕະຫຼາດນັດການຄ້າແລະການບໍລິການຄັ້ງນີ້ຈະມີອົງການຈັດຕັ້ງສາກົນ, ສະຖານທູດຕ່າງປະເທດປະຈຳຈີນ, ສະມາຄົມ ອົງການການຄ້າແລະວິສາຫະກິດຂອງຕ່າງປະເທດ ທີ່ມາຈາກ 148 ປະເທດແລະເຂດແຄວ້ນເຂົ້າຮ່ວມ.
ປະເທດແລະເຂດແຄວ້ນທີ່ເກັ່ງທາງດ້ານການຄ້າການບໍລິການໃນໂລກລ້ວນແຕ່ມີອົງການແລະວິສາຫະກິດຂອງຕົນເຂົ້າຮ່ວມ, ລວມມີວິສາຫະກິດແລະອົງການທັງພາຍໃນແລະຕ່າງປະເທດ 18 ພັນແຫ່ງໄດ້ລົງທະບຽນເຂົ້າຮ່ວມການວາງສະແດງຄັ້ງນີ້, ເຊິ່ງມີຫຼາຍກວ່າ 1 ແສນຄົນໄດ້ລົງທະບຽນເຂົ້າຮ່ວມງານແລ້ວ.
ງານຕະຫຼາດນັດການຄ້າແລະການບໍລິການປີ 2020 ໄດ້ມີຫົວຂໍ້ຫຼັກວ່າ: ບໍລິການທົ່ວໂລກ, ຕ່າງຝ່າຍຕ່າງໄດ້ຮັບຜົນປະໂຫຍດ. ໄດ້ຈັດໃຫ້ມີກິດຈະກຳ 7 ປະເພດເຊັ່ນ: ກິດຈະກຳສຳຄັນ, ເວທີປຶກສາຫາລືຂັ້ນສູງ, ກອງປະຊຸມຍ່ອຍແລະເວທີປຶກສາຫາລືດ້ານວິຊາການ, ແລະການວາງສະແດງເປັນຕົ້ນ. ຍ້ອນໄດ້ພິຈາລະນາເຖິງການແຜ່ລະບາດຂອງພະຍາດໂຄວິດ-19ໃນທົ່ວໂລກແລະທ່ວງທ່າການພັດທະນາຂອງງານດັ່ງກ່າວ, ງານວາງສະແດງຄັ້ງນີ້ຈະຈັດຂຶ້ນໃນຮູບແບບອອນລາຍແລະອອຟລາຍ, ປີນີ້ຍັງຈະໄດ້ຈັດໃຫ້ມີເວທີຂໍ້ມູນແບບດີຈີຕອນທີ່ໃຫ້ບໍລິການຕະຫຼອດ 365 ວັນເປັນພິເສດ, ແລະໃຫ້ບໍລິການທາງອອນລາຍແກ່ບໍລິສັດທີ່ເຂົ້າຮ່ວມງານດັ່ງກ່າວ.