ວັນທີ 3 ກັນຍານີ້, ທ່ານສີຈິ້ນຜີງ, ປະທານປະເທດຈີນແລະທ່ານວະລາດີເມຍ ປູຕິນປະທານາທິບໍດີຣັດເຊຍໄດ້ສົ່ງສານອວຍພອນເຊິ່ງກັນແລະກັນ, ເນື່ອງໃນໂອກາດສະເຫຼີມສະຫຼອງໄຊຊະນະຂອງສົງຄາມຕ້ານຟາດຊິດໂລກຄົບຮອບ 75 ປີ.
ສານຂອງທ່ານສີຈິ້ນຜີງມີເນື້ອໃນວ່າ: ໃນວັນທີ 3 ກັນຍາເມື່ອ 75 ປີກ່ອນ, ສົງຄາມຕໍ່ຕ້ານຍີ່ປຸ່ນຂອງປະຊາຊົນຈີນແລະການສູ້ຮົບກັບຍີ່ປຸ່ນຂອງອະດີດສະຫະພາບໂຊວຽດໄດ້ຮັບໄຊຊະນະອັນຍິ່ງໃຫຍ່, ເຊິ່ງເປັນການປະກາດວ່າສົງຄາມຕ້ານຟາດຊິດໂລກໄດ້ຮັບໄຊຊະນະໃນສຸດທ້າຍ. ຈີນໃນຖານະເປັນສະໜາມສົງຄາມຕົ້ນຕໍຢູ່ທະວີບອາຊີ, ຣັດເຊຍໃນຖານະເປັນສະໜາມຮົບຕົ້ນຕໍ່ຢູ່ທະວີບເອີຣົບ, ສອງປະເທດໄດ້ມີການປະກອບສ່ວນໃຫ້ກັບປະຫວັດສາດທີ່ລືມບໍ່ໄດ້ໃນການສູ້ຮົບເພື່ອຍາດເອົາໄຊຊະນະໃນສົງຄາມຕໍ່ຕ້ານຟາດຊິດໂລກ. ຈີນແລະຣັດເຊຍໃນຖານະເປັນປະເທດສະມາຊິກຖາວອນຂອງສະພາຄວາມໝັ້ນຄົງອົງການສະຫະປະຊາຊາດ, ໄດ້ມີບົດບາດສຳຄັນຕໍ່ພາລະກິດການພັດທະນາໂດຍສັນຕິຂອງໂລກ. ຂ້າພະເຈົ້າຍິນດີພະຍາຍາມຮ່ວມກັນກັບພະນະທ່ານ, ຊຸກຍູ້ໃຫ້ຈີນແລະຣັດເຊຍລົງເລິກການປະສານງານກັນດ້ານຍຸດທະສາດຢ່າງຮອບດ້ານ, ຮ່ວມກັນກັບປະຊາຄົມໂລກ, ເດັດດ່ຽວປົກປ້ອງຜົນສຳເລັດຢ່າງໄຊຊະນະທີ່ຍາດມາໄດ້ໃນສົງຄາມໂລກຄັ້ງທີ 2 ສົ່ງເສີມຄວາມສະເໝີພາບແລະຄວາມເປັນທຳໃນສາກົນ, ຕັ້ງໜ້າປົກປ້ອງແລະສະໜັບສະໜູນລັດທິຫຼາຍຝ່າຍ, ເລັ່ງລັດການສ້າງປະຊາຄົມຮ່ວມຊາຕາກຳຂອງມວນມະນຸດ.
ສານອວຍພອນຂອງທ່ານວະລາດີເມຍ ປູຕິນມີເນື້ອໃນວ່າ: ການບຸກບືນສູ້ຮົບຢ່າງກ້າຫານໃນສົງຄາມຄັ້ງນັ້ນ, ສອງປະເທດແລະປະຊາຊົນສອງຊາດພວກເຮົາໄດ້ສ້າງມິດຕະພາບໃນການສູ້ຮົບຢ່າງເລິກເຊິ່ງ. ຣັດເຊຍຍິນດີສືບຕໍ່ຮ່ວມກັນກັບຈີນ, ປ້ອງກັນບໍ່ໃຫ້ສົງຄາມແລະການປະທະກັນເກີດຂຶ້ນອີກ, ເພື່ອປົກປັກຮັກສາສະຖຽນລະພາບແລະຄວາມໝັ້ນຄົງຂອງທົ່ວໂລກ.