ຈາກ “5 ຕ້ອງຍຶດໝັ້ນ” ຮອດ “5 ເດັດຂາດບໍ່ຍອມຮັບ”ຄວາມເວົ້າຂອງທ່ານສີຈິ້ນຜິງມີຄວາມເຂັ້ມແຂງແລະໜັກແໜ້ນພິເສດ!
ວັນທີ 3 ກັນຍານີ້, ໃນກອງປະຊຸມສຳມະນາ ເພື່ອລະນຶກເຖິງໄຊຊະນະຂອງສົງຄາມຕໍ່ຕ້ານຟາດຊິດຍີ່ປຸ່ນແລະ ໄຊຊະນະຂອງສົງຄາມຕໍ່ຕ້ານຟາຊິດໂລກຄົບຮອບ 75ປີ, ທ່ານສີຈິ້ນຜິງໄດ້ປະກອບຄຳເຫັນທີ່ສຳຄັນ, ໂດຍກ່າວເນັ້ນວ່າຕ້ອງສືບທອດແລະເຊີດຊູ້ຈິດໃຈອັນຍິ່ງໃຫຍ່ໃນການຕໍ່ຕ້ານຟາດຊິດຍີ່ປຸ່ນ, ບຸກບືນສູ້ຊົນເພື່ອຟື້ນຟູຄວາມຈະເລີນຮຸ່ງເຮືອງອັນຍິ່ງໃຫຍ່ຂອງປະຊາຊາດຈີນ. ທ່ານສີຈິ້ນຜິງກ່າວເນັ້ນວ່າ, ໃນການບັນລຸເປົ້າໝາຍທີ່ຈະຟື້ນຟູຄວາມຈະເລີນຮຸ່ງເຮືອງອັນຍິ່ງໃຫຍ່ຂອງປະຊາຊາດຈີນ, ຕ້ອງຍຶດໝັ້ນການນຳພາຂອງພັກກອມມູນິດຈີນ, ຕ້ອງຍຶດໝັ້ນເດີນຕາມເສັ້ນທາງສັງຄົມນິຍົມທີ່ມີສີສັນພິເສດຂອງຈີນ, ຕ້ອງຍຶດໝັ້ນໂດຍຖືເອົາປະຊາຊົນເປັນໃຈກາງ, ຕ້ອງຍຶດໝັ້ນຈິດໃຈຕໍ່ສູ້,ຕ້ອງຍຶດໝັ້ນການເດີນຕາມເສັ້ນທາງພັດທະນາໂດຍສັນຕິຢ່າງເດັດດ່ຽວໜຽວແໜ້ນ.
ພັກການເມືອງໃດໜຶ່ງຈະມີຄຳຕອບແນວໃດຕໍ່ຄຳຖາມທີ່ວ່າ “ພວກເຮົາແມ່ນໃຜ, ເພື່ອໃຜແລະອາໄສໃຜ”, ເຊິ່ງໄດ້ພົວພັນເຖິງທາດແທ້ຂອງພັກການເມືອງນັ້ນ, ເປັນການຕັດສິນຊາຕາກຳ, ຄວາມຈະເລີນຮຸ່ງເຮືອງຫຼືລົ້ມເຫຼວຂອງພັກການເມືອງນັ້ນ. ການຍຶດໝັ້ນໃນການຖືເອົາປະຊາຊົນເປັນໃຈກາງ, ກໍແມ່ນຄຳຕອບທີ່ໜັກແໜ້ນຂອງພັກກອມມູນິດຈີນຕໍ່ບັນຫາພື້ນຖານດັ່ງກ່າວ.
ວັນທີ 3 ກັນຍານີ້, ໃນເວລາປະກອບຄຳເຫັນໃນກອງປະຊຸມສຳມະນາ ເພື່ອລະນຶກເຖິງໄຊຊະນະຂອງສົງຄາມຕໍ່ຕ້ານຟາດຊິດຍີ່ປຸ່ນແລະ ໄຊຊະນະຂອງສົງຄາມຕໍ່ຕ້ານຟາຊິດໂລກຄົບຮອບ 75ປີ. ທ່ານສີຈິ້ນຜິງກ່າວເນັ້ນວ່າ: ພັກກອມມູນິດຈີນແລະປະຊາຊົນຈີນໄດ້ເຕີບໃຫຍ່ແລະຂະຫຍາຍຕົວໃນຂະບວນການຕໍ່ສູ້, ຈິດໃຈຕໍ່ສູ້ໄດ້ສອດຫ້ອຍຢູ່ທຸກໄລຍະຂອງການປະຕິວັດ,ການສ້າງສາ ແລະການປະຕິຮູບຂອງຈີນ.ການຕໍ່ສູ້ຂອງຊາວພັກກອມມູນິດຈີນແມ່ນມີແນວທາງ,ມີຫຼັກໝັ້ນແລະມີຫຼັກການ, ທິດທາງລວມກໍແມ່ນການຍຶດໝັ້ນການນຳພາຂອງພັກກອມມູນິດຈີນແລະລະບອບສັງຄົມນິຍົມຈີນຢ່າງບໍ່ຫວັ່ນໄຫວຄອນແຄນ.ບໍ່ວ່າຈະເປັນບຸກຄົນໃດ,ອິດທິກຳລັງໃດກໍຕາມທີ່ມີເຈດຕະນາຢາກບິດເບືອນປະຫວັດສາດຂອງພັກກອມມູນິດຈີນ, ໃສ່ຮ້າຍປ້າຍສີທາດແທ້ແລະຈຸດປະສົງຂອງພັກກອມມູນິດຈີນ, ປະຊາຊົນຈີນຈະບໍ່ຍອມຮັບເດັດຂາດ! ບໍ່ວ່າຈະເປັນບຸກຄົນໃດ,ອິດທິກຳລັງໃດກໍຕາມທີ່ເຈດຕະນາຢາກບິດເບືອນແລະປ່ຽນແປງເສັ້ນທາງສັງຄົມນິຍົມທີ່ມີສີສັນພິເສດຂອງຈີນ, ປະຕິເສດແລະໃສ່ຮ້າຍປ້າຍສີຜົນສຳເລັດອັນຍິ່ງໃຫຍ່ຂອງປະຊາຊົນຈີນໃນການສ້າງສາສັງຄົມນິຍົມ, ປະຊາຊົນຈີນຈະບໍ່ຍອມຮັບເດັດຂາດ! ບໍ່ວ່າຈະເປັນບຸກຄົນໃດ,ອິດທິກຳລັງໃດກໍຕາມທີ່ມີເຈດຕະນາຢາກແບ່ງແຍກ ແລະ ສ້າງຄວາມເປັນປໍລະປັກກັນລະຫວ່າງພັກກອມມູນິດຈີນກັບປະຊາຊົນຈີນ, ປະຊາຊົນຈີນຈະບໍ່ຍອມຮັບເດັດຂາດ!ບໍ່ວ່າຈະເປັນບຸກຄົນໃດ,ອິດທິກຳລັງໃດກໍຕາມທີ່ມີເຈດຕະນາຢາກໃຊ້ວິທີຂົ່ມເຫັງແບບລັດທິເຈົ້າອຳນາດເພື່ອບັງຄັບໃຫ້ຈີນຍອມເຮັດຕາມເຈດຈຳນົງຂອງຕົນ, ຢາກປ່ຽນແປງທິດທາງກ້າວເດີນໄປໜ້າຂອງຈີນແລະກີດຂວາງການສຸມຄວາມພະຍາຍາມຂອງປະຊາຊົນຈີນເພື່ອສ້າງຊີວິດທີ່ດີງາມຂອງຕົນ,ປະຊາຊົນຈີນຈະບໍ່ຍອມຮັບເດັດຂາດ!ບໍ່ວ່າຈະເປັນບຸກຄົນໃດ,ອິດທິກຳລັງໃດກໍຕາມທີ່ມີເຈດຕະນາຢາກທຳລາຍສິດແຫ່ງການດຳລົງຊີວິດແລະການພັດທະນາໂດຍສັນຕິຂອງປະຊາຊົນຈີນ,ທຳລາຍການແລກປ່ຽນແລະຮ່ວມມືກັນລະຫວ່າງປະຊາຊົນຈີນກັບປະຊາຊົນປະເທດອື່ນໆ, ທຳລາຍພາລະກິດສັນຕິພາບ ແລະການພັດທະນາອັນສູງສົ່ງຂອງມວນມະນຸດ,ປະຊາຊົນຈີນຈະບໍ່ຍອມຮັບເດັດຂາດ!
