ທ່ານ ສີຈິ້ນຜິງ ຫວັງໃຫ້ນັກວິທະຍາສາດຈີນແບກຫາບໜ້າທີ່ຮັບຜິດຊອບທາງປະຫວັດສາດ
ວັນທີ 11 ກັນຍານີ້, ທ່ານ ສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນໄດ້ເປັນປະທານຈັດກອງປະຊຸມສຳມະນານັກວິທະຍາສາດຢູ່ນະຄອນຫຼວງປັກກິ່ງ ໂດຍໄດ້ຟັງຄຳຄິດເຫັນກ່ຽວກັບການພັດທະນາວຽກງານວິທະຍາສາດເຕັກນິກຂອງຈີນໃນໄລຍະທີ່ຈະປະຕິບັດແຜນການ 5 ປີຄັ້ງທີ 14. ໂດຍຫວັງໃຫ້ນັກວິທະຍາສາດແລະພະນັກງານດ້ານວິທະຍາສາດເຕັກນິກຂອງຈີນອັນໄພສານຈົ່ງແບກຫາບໜ້າທີ່ຮັບຜິດຊອບທາງປະຫວັດສາດ, ເພື່ອດຳເນີນການຄົ້ນຄວ້າທາງດ້ານວິທະຍາສາດເຕັກນິກໃຫ້ໄປສູ່ລວງເລິກແລະລວງກວ້າງກວ່າເກົ່າຢ່າງບໍ່ຢຸດຢັ້ງ.
ທ່ານ ສີຈິ້ນຜິງ ກ່າວເນັ້ນວ່າ: ຕ້ອງເລັ່ງການຊຸກຍູ້ການຄົ້ນຄວ້າເຕັກນິກ; ຕ້ອງຈັດວາງການຄົ້ນຄວ້າເຕັກນິກທີ່ມີລັກສະນະຍຸດທະສາດລ່ວງໜ້າ. ຕ້ອງເສີມຂະຫຍາຍບົດບາດທີ່ສຳຄັນຂອງໂຮງຮຽນຊັ້ນສູງ, ຊຸກຍູ້ການບຸກທະລຸແກ້ຂໍ້ຍາກດ້ານເຕັກນິກທີ່ສຳຄັນໃນຂົງເຂດຈຸດສຸມ. ຕ້ອງເພີ່ມທະວີການຄົ້ນຄວ້າຂັ້ນພື້ນຖານຢ່າງຕໍ່ເນື່ອງ,ເພີ່ມການລົງທຶນໃນດ້ານການຄົ້ນຄວ້າຂັ້ນພື້ນຖານ, ເພີ່ມທະວີການສ້າງສາຫຼັກສູດພື້ນຖານຕ່າງໆເຊັ່ນ: ຄະນິສາດ, ຟີຊິກສາດ, ເຄມີສາດແລະຊີວະສາດເປັນຕົ້ນ, ເພື່ອຍົກສູງຄວາມສາມາດດ້ານການປະດິດສ້າງດ້ວຍວິທະຍາສາດເຕັກນິກຂອງຕົນໃນການຮ່ວມມືແບບເປີດປະຕູ.
ທ່ານ ສີຈິ້ນຜິງ ຫວັງໃຫ້ພະນັກງານດ້ານວິທະຍາສາດເຕັກນິກຂອງຈີນຕ້ອງມີຈິດໃຈຖືຜົນປະໂຫຍດຂອງປະເທດແລະປະຊາຊົນຢູ່ເໜືອກວ່າທຸກສິ່ງ, ກ້າດຳເນີນການປະດິດສ້າງ, ຄົ້ນຄວ້າຢ່າງຂະຫຍັນໝັ່ນພຽນ. ຂະນະດຽວກັນຍັງໄດ້ຮຽກຮ້ອງໃຫ້ອຳນາດການປົກຄອງແລະຜູ້ນຳທຸກຂັ້ນຕ້ອງເຄົາລົບການອອກແຮງງານ, ເຄົາລົບຄວາມຮູ້, ເຄົາລົບຜູ້ມີຄວາມຮູ້ຄວາມສາມາດ ແລະເຄົາລົບການປະດິດສ້າງ, ຊຸກຍູ້ໃຫ້ໝາກຜົນດ້ານການປະດິດສ້າງໃໝ່ດ້ວຍວິທະຍາສາດເຕັກນິກປະກົດອອກຢ່າງບໍ່ຢຸດຢັ້ງແລະຫັນເປັນກຳລັງການຜະລິດທີ່ຕິດແທດຕົວຈິງ.