ການ​ລ້ຽງ​ສັດແບບ​ຊີ​ວະ​ພາບ​ຊ່ວຍ​ສ້າງ​ຄວາມ​ຮັ່ງ​ມີ

2020-09-21 17:59:09 |ມາຈາກ: CRI

ນາງ​ຊາ​ເນ ​ອາ​ຍຸ 46 ປີ​ແລະ ທ້າວ​ເອີ​ພາ​ ຜົວ​ຂອງ​ນາງ​ຊາ​ເນເປັນ​ຄົນເຜົ່າ​ຮາ​ນີ, ແມ່ນ​ຊາວ​ບ້ານ​ຂອງ​ຕາ​ແສງ​ຊີ່​ຕິ້ງ​ເມືອງ​ເມີງ​ໄຫ​ກິ່ງ​ແຂວງ​ປົກ​ຄອງ​ຕົນ​ເອງ​ເຜົ່າ​ລື້​ສິບ​ສອງ​ພັ່ນ​ນາ​ແຂວງ​ຢຸ​ນ​ນານ​ຈີນ. ເຖິງ​ວ່າ​ສອງ​ຄົນ​ພຽງ​ແຕ່​ຮຽນ​ຈົບ​ຈາກ​ໂຮງ​ຮຽນ​ປະ​ຖົມ​ກໍ​ຕາມ, ແຕ່​ກໍ​ຮູ້​ດີ​ວ່າ “ຕ້ອງ​ດຸ​ໝັ່ນ​ຈຶ່ງ​ຈະ​ມີ​ຊີ​ວິດ​ການ​ເປັນ​ຢູ່​ທີ່​ດີ”. ນັບ​ແຕ່​ປີ 2016 ເປັນ​ຕົ້ນ​ມາ, ນາງ​ຊາ​ເນ ແລະ ທ້າວ​ເອີ​ພາ​ໄດ້​ຮ້ອງ​ຂໍ​ກູ້​ເງິນ 8 ໝື່ນຢວນ ​ເພື່ອ​ສ້າງ​ຟາມ​ລ້ຽງ​ໄກ່​ແບບ​ຊີ​ວະ​ພາບ, ​ຈາກ​ນັ້ນພາຍ​ໃຕ້​ການ​ຊ່ວຍ​ເຫຼືອ​ຂອງ​ໜ່ວຍ​ງານ​ຊ່ວຍຫຼຸດ​ຜ່ອນ​ຄວາມ​ທຸກ​ຍາກ​ຂອງ​ລັດ​, ພ້ອມ​ດ້ວຍ​ຄວາມ​ດຸ​ໝັ່ນ ແລະ ທໍ​ລະ​ຫົດ​ອົດ​ທົນ​ຂອງ​ຜູ້​ກ່ຽວ, ຄອບ​ຄົວ​ນາງ​ຊາ​ເນ​ໄດ້​ກ້າວ​ຂຶ້ນ​ສູ່​ເສັ້ນ​ທາງ​ທີ່​ຮັ່ງ​ມີ​ຂຶ້ນ​ເທື່ອ​ລະ​ກ້າວ. ປີ 2019 ​​ກຳ​ໄລ​ສຸດ​ທິ​ຈາກ​ການ​ຈຳ​ໜ່າຍ​ໄກ່​ຊີ​ວະ​ພາບ​ຢ່າງ​ດຽ​ວ​ກໍ​ບັນ​ລຸເຖິງ 1 ແສນ 5 ໝື່ນຢວນ. ​ຊີ​ວິດໃນ​ອະ​ດີດ​ແມ່ນ “ຍາມ​ບຸນ​ຈຶ່ງ​ມີ​ຊີ້ນ​ກິນ, ​ຖ້າ​ຢາກປຸກ​ເຮືອນ​​ຈະຕ້ອງໄດ້​ຢືມ​ເງິນ”, ແຕ່ປະ​ຈຸ​ບັນ​ໄດ້​ດຳ​ລົງ​ຊີ​ວິດ​ແບບ​ອີ່ມ​ໜຳ​ສຳ​ລານ​ຢ່າງ​ມີ​ຄວາມ​ສຸກ, ການ​ປ່ຽນ​ແປງ​ດ້ານ​ຊີ​ວິດ​ການ​ເປັນ​ຢູ່​ຂອງ​ຄອບ​ຄົວ​ນາງ​ຊາ​ເນ​ກໍ​​ຄື​ສະ​ພາບ​ໂດຍ​ຫຍໍ້​ຂອງ​ປະ​ຊາ​ຊົນ​ຊົນ​ເຜົ່າ​ສ່ວນ​ໜ້ອຍ​ຢູ່​ເຂດ​ຊາຍ​ແດນ​ແຂວງ​ຢຸນ​ນານ​ຈີນ​ທີ່​ໄດ້ຫຼຸດ​ພົ້ນ​ອອກ​ຈາກ​ຄວາມ​ທຸກ​ຍາກ ແລະ ຮັ່ງ​ມີ​ຂຶ້ນ​​ດ້ວຍຄວາມ​ດຸ​ໝັ່ນ​ຂະ​ຫຍັນ​ພຽນ​ຂອງ​ຕົນ.