ໃນໄລຍະປະຕິບັດ “ແຜນການ 5 ປີຄັ້ງທີ 13”, ການສ້າງ “ໜຶ່ງແລວໜຶ່ງເສັ້ນທາງ” ຈາກການວາງແຜນລວມກ້າວສູ່ໄລຍະປະຕິບັດຕົວຈິງ. ນັບມາຮອດປັດຈຸບັນ, ຈີນໄດ້ເຊັນເອກກະສານການຮ່ວມມື “ໜຶ່ງແລວໜຶ່ງເສັ້ນທາງ” ຫຼາຍກວ່າ 200 ສະບັບກັບ 138 ປະເທດແລະ 30 ກວ່າອົງການຈັດຕັ້ງສາກົນ, ໄດ້ດຳເນີນໂຄງການຮ່ວມມືຫຼາຍກວ່າ 2000 ໂຄງການ, ການຮ່ວມມືໄດ້ກ້າວເຂົ້າສູ່ລວງເລິກຢ່າງບໍ່ຢຸດຢັ້ງແລະໄດ້ຮັບໝາກຜົນຢ່າງຫຼວງຫຼາຍຕາມແຜນການທີ່ໄດ້ວາງໄວ້.
ໂດຍຜ່ານການຮ່ວມກັນສ້າງ “ໜຶ່ງແລວໜຶ່ງເສັ້ນທາງ”, ປະເທດມານດິຟໄດ້ສ້າງຂົວຂ້າມທະເລແຫ່ງທຳອິດ, ມົງເຕເນໂກຼໄດ້ສ້າງທາງດ່ວນເສັ້ນທຳອິດ, ຄວາມຝັນຂອງລາວທີ່ຈາກປະເທດທີ່ບໍ່ມີທາງອອກສູ່ທະເລຫັນເປັນປະເທດທີ່ເຊື່ອມໂຍງເຊື່ອມຈອດຂອງພາກພື້ນຈະໄດ້ບັນລຸຜົນເປັນຈິງເທື່ອລະກ້າວ…… ໂຄງການຮ່ວມມືຕ່າງໆ, ເຮັດໃຫ້ “ໜຶ່ງແລວໜຶ່ງເສັ້ນທາງ” ຈາກຄວາມປາດຖະໜາກາຍເປັນຄວາມຈິງ, ຈາກຂໍ້ລິເລີ່ມກາຍເປັນຜະລິດຕະພັນສາທາລະນະທີ່ໄດ້ຮັບຄວາມນິຍົມຈາກທົ່ວໂລກ.
ໃນ 8 ເດືອນຕົ້ນປີນີ້, ວິສາຫະກິດຈີນໄດ້ລົງທຶນໂດຍກົງທີ່ບໍ່ແມ່ນດ້ານການທະນາຄານຢູ່ປະເທດລຽບຕາມ “ໜຶ່ງແລວໜຶ່ງເສັ້ນທາງ” ມີເຖິງ 11.8 ຕື້ໂດລາສະຫະລັດ, ເມື່ອທຽບໃສ່ໄລຍະດຽວກັນຂອງປີຜ່ານມາເພີ່ມຂຶ້ນ 31,5%, ໃນໄລຍະເກີດມີການແຜ່ລະບາດຂອງພະຍາດໂຄວິດ-19, ອຸມົງເມືອງມອມແລະໂຄງການພື້ນຖານໂຄງລ່າງອື່ນໆຈຳນວນໜຶ່ງຂອງທາງລົດໄຟຈີນ-ລາວສ້າງສຳເລັດແລ້ວ, ສະແດງໃຫ້ເຫັນວ່າການຕ້ານກັບການແຜ່ລະບາດຂອງພະຍາດໂຄວິດ-19 ແລະການຟື້ນຟູການຜະລິດລ້ວນແຕ່ໄດ້ຮັບຜົນສຳເລັດ. “ໜຶ່ງແລວໜຶ່ງເສັ້ນທາງ” ໄດ້ກາຍເປັນເສັ້ນທາງຮັບປະກັນສຸຂະພາບແຂງແຮງ, ເສັ້ນທາງຮ່ວມມືແລະເສັ້ນທາງພັດທະນາທີ່ຖືກກັບສະພາບຕົວຈິງ, ໄດ້ເພີ່ມພະລັງງານແລະສະໜອງທາງເລືອກສຳຄັນໃຫ້ແກ່ການຟື້ນຟູຄືນໃໝ່ຂອງໂລກ.
ໂດຍຜະເຊີນກັບຄວາມສ່ຽງແລະສິ່ງທ້າທາຍໃນຂອບທົ່ວໂລກ, ຈີນພວມສຸມຄວາມພະຍາຍາມຮ່ວມກັນກັບຝ່າຍຕ່າງໆ, ສ້າງ “ໜຶ່ງແລວໜຶ່ງເສັ້ນທາງ” ໃຫ້ເປັນເສັ້ນທາງແຫ່ງການຮ່ວມມືແລະສາມັກຄີກັນຮັບມືກັບສິ່ງທ້າທາຍ, ເສັ້ນທາງຮັບປະກັນໃຫ້ສຸຂະພາບແຂງແຮງແລະຮັບປະກັນຄວາມປອດໄພທາງຮ່າງກາຍຂອງປະຊາຊົນ, ເສັ້ນທາງຊຸກຍູ້ໃຫ້ເສດຖະກິດສັງຄົມຟື້ນຟູຄືນໃໝ່ແລະເສັ້ນທາງສົ່ງເສີມການເຕີບໂຕທາງເສດຖະກິດຂອງໂລກ.