ວັນທີ 12 ຕຸລານີ້, ທ່ານນາງເຜີງລີ້ຢວນ ພັນລະຍາຂອງທ່ານສີຈິ້ນຜິງ ປະທານປະເທດຈີນ, ທູດພິເສດເພື່ອສົ່ງເສີມການສຶກສາສຳລັບເດັກຍິງແລະແມ່ຍິງຂອງອົງການອຸຍເນັສໂກ(UNESCO)ໄດ້ກ່າວຄຳຊົມເຊີຍຕໍ່ລາງວັນການສຶກສາສຳລັບເດັກຍິງແລະແມ່ຍິງຂອງອົງການອຸຍເນັສໂກຄັ້ງທີ 5 ຜ່ານທາງວິດີໂອ.
ທ່ານນາງເຜີງລີ້ຢວນໄດ້ສະແດງຄວາມຊົມເຊີຍຢ່າງຈິງໃຈຕໍ່ຜູ້ທີ່ໄດ້ຮັບລາງວັນທີ່ມາຈາກສີລັງກາແລະເຄັນຢາ. ທ່ານນາງເຜີງລີ້ຢວນກ່າວວ່າ: ປີ 2015, ຈີນໄດ້ຮ່ວມມືກັບອົງການອຸຍເນັສໂກສ້າງຕັ້ງລາງວັນການສຶກສາສຳລັບເດັກຍິງແລະແມ່ຍິງ. ຜູ້ໄດ້ຮັບລາງວັນທັງຫຼາຍໄດ້ໃຊ້ການເຄື່ອນໄຫວຕົວຈິງເພື່ອຊ່ວຍເຫຼືອເດັກຍິງແລະແມ່ຍິງໃຫ້ໄດ້ຮັບຄວາມຮູ້ແລະທັກສະຕ່າງໆ, ເປີດໂອກາດໃຫ້ເຂົາເຈົ້າມີຄວາມໃຝ່ຝັນຕໍ່ຊີວິດ, ແລະໄດ້ປະກອບສ່ວນເຂົ້າໃນການສົ່ງເສີມຄວາມສະເໝີພາບລະຫວ່າງຍິງ-ຊາຍໃນດ້ານການສຶກສາແລະຊຸກຍູ້ການພັດທະນາທາງສັງຄົມ. ຢູ່ຈີນກໍມີຜູ້ຄົນນັບເປັນພັນເປັນໝື່ນໄດ້ເຮັດວຽກຢ່າງງຽບໆເພື່ອປະກອບສ່ວນເຂົ້າໃນວຽກງານການສຶກສາສຳລັບເດັກຍິງແລະແມ່ຍິງເຊັ່ນກັນ. ມີຄູຍິງຜູ້ໜຶ່ງຊື່ວ່າ ຈ່າງກຸ້ຍເມີຍ, ນາງໄດ້ຕັ້ງຫຼັກປັກຖານຢູ່ເຂດພູດອຍທີ່ທຸກຍາກຂອງແຂວງຢູນນານເປັນເວລາ 40 ກວ່າປີ, ເຊິ່ງໄດ້ຊຸກຍູ້ໃຫ້ມີການສ້າງຕັ້ງໂຮງຮຽນມັດທະຍົມປາຍເພດຍິງທີ່ບໍ່ເກັບຄ່າແຫ່ງທຳອິດຂອງຈີນໃນປີ 2008, ຕັ້ງແຕ່ສ້າງຕັ້ງຂຶ້ນເປັນຕົ້ນມາ, ໂຮງຮຽນແຫ່ງນີ້ໄດ້ຊ່ວຍເດັກຍິງ 1600 ກວ່າຄົນບັນລຸຄວາມໄຝ່ຝັນເສັງເຂົ້າມະຫາວິທະຍາໄລ. ເດັກຍິງທັງຫຼາຍພາກັນເອີ້ນຄູຈ່າງດ້ວຍຄວາມສະໜິດສະໜົມວ່າ “ແມ່ຈ່າງ”. ນາງຈ່າງກຸ້ຍເມີນກໍປຽບເໝືອນແສງສະຫວ່າງແຫ່ງຄວາມຫວັງທີ່ໄດ້ເຍືອງທາງໃຫ້ເດັກນ້ອຍທັງຫຼາຍບົນເສັ້ນທາງສະແຫວງຫາຄວາມໃຝ່ຝັນຂອງຕົນ.
ທ່ານນາງເຜີງລີ້ຢວນກ່າວຕື່ມວ່າ: ປີນີ້ເນື່ອງຈາກໄດ້ຮັບຜົນກະທົບຈາກການແຜ່ລະບາດຂອງພະຍາດໂຄວິດ-19, ທົ່ວໂລກມີນັກຮຽນນັກສຶກສາ 1,5 ຕື້ຄົນຈຳຕ້ອງໂຈະການຮຽນ ໂດຍສະເພາະແມ່ນເດັກຍິງ. ພວກເຮົາຍິ່ງຄວນຊອກຫາທຸກວິທີທາງເພື່ອຊ່ວຍເດັກຍິງໃຫ້ສາມາດຟື້ນຟູການຮຽນ ເພື່ອບໍ່ໃຫ້ເດັກຍິງຕົກຍຸກຍ້ອນການແຜ່ລະບາດຂອງພະຍາດ.
ທ່ານນາງເຜີງລີ້ຢວນກ່າວວ່າ: ໃນຈຳນວນຜູ້ໃຫຍ່ທີ່ກືກໜັງສືທົ່ວໂລກນັ້ນ, 63% ແມ່ນຜູ້ຍິງ. ຖ້າແມ່ຍິງບໍ່ສາມາດໄດ້ຮັບການສຶກສາທີ່ດີ, ສັງຄົມມວນມະນຸດກໍຈະບໍ່ມີຄວາມກ້າວໜ້າ ແລະພັດທະນາໄດ້. ການສຶກສາຂອງເດັກຍິງ ແລະແມ່ຍິງຕ້ອງຈັດຕັ້ງປະຕິບັດໃນຍຸກປະຈຸບັນ ແລະຈະໃຫ້ຜົນໃນໄລຍະຍາວ. ຂ້າພະເຈົ້າຈຶ່ງຂໍຮຽກຮ້ອງໃຫ້ບັນດາປະເທດ ແລະບຸກຄົນຈາກວົງການຕ່າງໆໃຫ້ການສະໜັບສະໜູນ ແລະເຂົ້າຮ່ວມພາລະກິດອັນຍິ່ງໃຫຍ່ນີ້ຫຼາຍກວ່າເກົ່າ. ຈີນຈະສືບຕໍ່ຮ່ວມມືກັບອົງການການສຶກສາ, ວິທະຍາສາດ ແລະວັດທະນະທຳຂອງສປຊ ຫຼື UNESCO ສ້າງລາງວັນການສຶກສາສຳລັບເດັກຍິງ ແລະແມ່ຍິງໄລຍະ 2 ເຊິ່ງຈະເລີ່ມແຕ່ປີ 2021 ຫາ 2025 ໃຫ້ດີ, ຊຸກຍູ້ການແລກປ່ຽນ ແລະການຮ່ວມມືດ້ານການສຶກສາສາກົນ, ປະກອບສ່ວນຫຼາຍກວ່າເກົ່າຊຸກຍູ້ວຽກງານການສຶກສາສຳລັບເດັກຍິງ ແລະແມ່ຍິງ ກໍຄືເພື່ອບັນລຸເປົ້າໝາຍການພັດທະນາແບບຍືນຍົງຮອດປີ 2030 ຂອງອົງການສປຊ. ພວກເຮົາຈົ່ງ ພະຍາຍາມຮ່ວມກັນ, ຊ່ວຍເຫຼືອເດັກຍິງ ແລະແມ່ຍິງໃຫ້ມີການສຶກສາທີ່ດີຢ່າງສະເໝີພາບ ແລະໃຫ້ແມ່ຍິງມີອະນາຄົດທີ່ດີງາມ.
ທ່ານນາງອາດຣ ອາຊູເລ ຜູ້ອຳນວຍການໃຫຍ່ UNESCO ໄດ້ຕີລາຄາສູງ ແລະສະແດງຄວາມຂອບໃຈຕໍ່ລັດຖະບານຈີນທີ່ໄດ້ໃຫ້ການສະໜັບສະໜູນລາງວັນການສຶກສາສຳລັບເດັກຍິງ ແລະແມ່ຍິງ ເຊິ່ງໄດ້ປະກອບສ່ວນຢ່າງຕັ້ງໜ້າເຂົ້າໃນການສ້າງຄວາມສະເໝີພາບລະຫວ່າງຍິງ-ຊາຍໃນດ້ານການສຶກສາ, UNESCO ຍິນດີພະຍາຍາມຮ່ວມກັບບັນດາຝ່າຍ, ຊຸກຍູ້ໃຫ້ເດັກຍິງ ແລະແມ່ຍິງໃນທົ່ວໂລກມີໂອກາດການສຶກສາຢ່າງສະເໝີພາບ ແລະມີອະນາຄົດທີ່ສົດໃສ.
ລາງວັນການສຶກສາສຳລັບເດັກຍິງ ແລະແມ່ຍິງຂອງ UNESCO ແມ່ນເພື່ອຍ້ອງຍໍອົງການ ແລະບຸກຄົນທີ່ໄດ້ປະກອບສ່ວນຢ່າງພົ້ນເດັ່ນເຂົ້າໃນການຊຸກຍູ້ວຽກງານການສຶກສາສຳລັບເດັກຍິງ ແລະແມ່ຍິງ, ສະແດງໃຫ້ເຫັນເຖິງບົດບາດສຳຄັນຂອງການສຶກສາທີ່ມີຕໍ່ການປ່ຽນແປງຊາຕາກຳຂອງເດັກຍິງ ແລະແມ່ຍິງ ເພື່ອກະຕຸກຊຸກຍູ້ໃຫ້ມີຄົນຫຼາຍກວ່າເກົ່າປະກອບສ່ວນເຂົ້າໃນພາລະກິດຄວາມສະເໝີພາບລະຫວ່າງຍິງ-ຊາຍໃນດ້ານການສຶກສາ.