ແຕ່ວັນທີ 12 ຫາວັນທີ 14 ຕຸລານີ້, ກອງປະຊຸມສຸດຍອດການສ້າງສາປະເທດຈີນດີຈີຕອນຄັ້ງທີ 3ໄດ້ຈັດຂຶ້ນຢູ່ນະຄອນຟູໂຈ່ວແຂວງຟູຈ້ຽນ. ປີ 2000, ໃນໄລຍະທີ່ດຳລົງຕຳແໜ່ງຢູ່ແຂວງຟູຈ້ຽນ, ທ່ານສີຈິ້ນຜິງໄດ້ວາງຍຸດທະສາດສ້າງ “ຟູຈ້ຽນ ດີຈີຕອນ”. ນັບແຕ່ກອງປະຊຸມໃຫຍ່ຂອງພັກກອມມູນິດຈີນຄັ້ງທີ 18 ເປັນຕົ້ນມາ, ທ່ານສີຈິ້ນຜິງໄດ້ໃຫ້ຄວາມສຳຄັນຢ່າງສູງຕໍ່ການພັດທະນາເຕັກໂນໂລຊີຂໍ້ມູນຂ່າວສານ, ເພີ່ມທະວີການອອກແບບລະດັບສູງສຸດ ແລະ ວາງແຜນໂດຍລວມ, ເຊິ່ງໄດ້ວາງທິດທາງການພັດທະນາກ່ຽວກັບການສ້າງ “ປະເທດຈີນດີຈີຕອນ”.
ປີ 2015, ທ່ານສີຈິ້ນຜິງໄດ້ກ່າວເນັ້ນໃນພິທີເປີດກອງປະຊຸມອິນເຕີເນັດໂລກຄັ້ງທີ 2ວ່າ: “ຈີນພວມປະຕິບັດແຜນການດຳເນີນງານ ອິນເຕີເນັດ +, ຊຸກຍູ້ການສ້າງ ປະເທດຈີນແບບດີຈີຕອນ.” ປີ 2017 ການສ້າງປະເທດຈີນດີຈີຕອນ ໄດ້ຖືກກຳນົດເຂົ້າໃນບົດລາຍງານການເມືອງຂອງກອງປະຊຸມໃຫຍ່ຂອງພັກກອມມູນິດຈີນຄັ້ງທີ 19.
ປະຈຸບັນ ເຕັກໂນໂລຊີຂໍ້ມູນໃຫຍ່ໄດ້ນຳໃຊ້ທົ່ວໄປໃນຊີວິດການເປັນຢູ່ຂອງປະຊາຊົນຈີນ, ເຊັ່ນ: ຢູ່ຮ້ານຄ້າ ພຽງແຕ່ສະແກນໃບໜ້າກໍຈະສາມາດຈ່າຍເງິນໄດ້; ຢູ່ໃນເຮືອນ ພຽງແຕ່ໃຊ້ໂທລະສັບມືຖື ແລະ ຄອມພິວເຕີ ໜ່ວຍດຽວກໍສາມາດເຮັດວຽກໄດ້ແລ້ວ; ເມື່ອໄປວຽກນອກ, ກໍສາມາດສົ່ງຂໍ້ມູນໄດ້ກັບທີ່ໂດຍບໍ່ຕ້ອງເດີນທາງໄປກໍໄດ້, ເຊິ່ງໄດ້ປະຢັດເວລາຢ່າງຫຼວງຫຼາຍ.
ປີ 2020, ການແຜ່ລະບາດຂອງພະຍາດໂຄວິດ-19 ໄດ້ເກີດຂຶ້ນຢ່າງກະທັນຫັນ. ໃນເວລາໄປສຳຫຼວດຄົ້ນຄວ້າວຽກງານປ້ອງກັນ ແລະ ຄວບຄຸມພະຍາດໂຄວິດ-19 ຢູ່ນະຄອນຫຼວງປັກກິ່ງ, ທ່ານສີຈິ້ນຜິງກ່າວວ່າ: “ຕ້ອງນຳໃຊ້ເຄື່ອງມືດ້ານຂໍ້ມູນໃຫຍ່ ແລະ ອື່ນໆ, ເພີ່ມທະວີການສືບຫາແຫຼ່ງກຳເນີດ ແລະ ຕິດຕາມສະພາບການແຜ່ລະບາດຂອງພະຍາດ.” ພາຍໃຕ້ທິດຊີ້ນຳດັ່ງກ່າວ, ຈີນໄດ້ນຳໃຊ້ຂໍ້ມູນໃຫຍ່ເພື່ອຕິດຕາມສະພາບການຂອງຄົນເຈັບ ແລະ ຜູ້ເຄີຍຢູ່ໃກ້ຊິດກັບຄົນເຈັບ, ຈັດສັນຊັບພະຍາກອນການແພດຢ່າງເໝາະສົມ, ຮ່ວມແຮງຮ່ວມໃຈກັນ ປ້ອງກັນພະຍາດຕາມຫຼັກວິທະຍາສາດ.
“ນຳໃຊ້ເຕັກໂນໂລຊີຂໍ້ມູນໃຫຍ່ເພື່ອຊຸກຍູ້ການຮັບປະກັນ ແລະ ປັບປຸງຊີວິດການເປັນຢູ່ຂອງປະຊາຊົນ”. ໃນການວາງແຜນຍຸດທະສາດຂອງທ່ານສີຈິ້ນຜິງ, ປະຊາຊົນເປັນພະເອກຢູ່ສະເໝີ. ການເຮັດໃຫ້ປະຊາຊົນໄດ້ສຳຜັດກັບຄວາມສະດວກຈາກການນຳໃຊ້ເຕັກໂນໂລຊີຂໍ້ມູນຂ່າວສານຢ່າງທົ່ວເຖິງ, ປະສົມປະສານການພັດທະນາເຕັກໂນໂລຊີຂໍ້ມູນຂ່າວສານ ກັບ ການຍົກລະດັບການບໍລິການສາທາລະນະ, ແມ່ນເປົ້າໝາຍສະເໝີຕົ້ນສະເໝີປາຍຂອງທ່ານສີຈິ້ນຜິງກ່ຽວກັບຍຸດທະສາດສ້າງ “ປະເທດຈີນຕີຈີຕອນ”.