ທ່ານສີຈີ້ນຜິງກ່າວວ່າ ການສ້າງເຊີ່ນເຈີ້ນເປັນການສ່ອງແສງໃຫ້ເຫັນລະບອບສັງຄົມນິຍົມທີ່ມີສີສັນພິເສດຂອງຈີນທີ່ດີເດັ່ນຢູ່ໃນປະຫວັດສາດ
ຕອນເຊົ້າວັນທີ 14 ຕຸລານີ້, ພິທີສະເຫຼີມສະຫຼອງການສ້າງຕັ້ງເຂດເສດຖະກິດພິເສດເຊີ່ນເຈີ້ນຄົບຮອບ 40 ປີໄດ້ຈັດຂຶ້ນຢູ່ນະຄອນເຊີ່ນເຈີ້ນ ແຂວງກວາງຕຸ້ງຈີນ. ທ່ານສີຈີ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ, ປະທານປະເທດຈີນ, ປະທານຄະນະກຳມະການການທະຫານສູນກາງຈີນໄດ້ເຂົ້າຮ່ວມໃນພິທີ ແລະ ກ່າວຄຳປາໄສອັນສຳຄັນ.
ທ່ານສີຈີ້ນຜິງກ່າວວ່າ, ແຂວງກວາງຕຸ້ງເປັນຜູ້ຕົວແບບ, ເປັນປ້ອມດ້ານໜ້າ ແລະ ເຂດທົດລອງຂອງການປະຕິຮູບ ແລະ ເປີດປະຕູສູ່ພາຍນອກ, ເປັນແຂວງທີ່ສ້າງຕັ້ງເຂດເສດຖະກິດພິເສດກ່ອນໝູ່ ແລະ ຈຳນວນຫຼາຍທີ່ສຸດ. ເຊີ່ນເຈີ້ນເປັນຕົວເມືອງໃໝ່ທີ່ໄດ້ຮັບການສ້າງຂຶ້ນດ້ວຍພັກ ແລະ ປະຊາຊົນຫຼັງດຳເນີນການປະຕິຮູບ ແລະ ເປີດປະຕູສູ່ພາຍນອກ, ເປັນການສ່ອງແສງໃຫ້ເຫັນເຖິງລະບອບສັງຄົມນິຍົມທີ່ມີສີສັນພິເສດຂອງຈີນທີ່ດີເດັ່ນໃນປະຫວັດສາດ. ພະນັກງານ ແລະ ປະຊາຊົນນະຄອນເຊີ່ນເຈີ້ນອັນໄພສານໄດ້ຜ່ານຜ່າຄວາມຫຍຸ້ງຍາກ, ໄດ້ສຸມຄວາມພະຍາຍາມຢ່າງສຸດຂີດ, ໃຊ້ເວລາພຽງ 40 ປີກໍ່ສາມາດສ້າງປະຫວັດສາດທີ່ຕົວເມືອງໃຫຍ່ລະດັບໂລກຂອງຕ່າງປະເທດຈຳນວນໜຶ່ງຕ້ອງໃຊ້ເວລາເຖິງ 100 ປີ. ນີ້ແມ່ນຄວາມມະຫັດສະຈັນໃນປະຫວັດສາດການພັດທະນາຂອງໂລກທີ່ສ້າງດ້ວຍປະຊາຊົນຈີນ.