ການພັດທະນາເຂດ ເສດຖະກິດພິເສດຂອງຈີນ ແລະ ລາວສະແດງໃຫ້ເຫັນທ່າແຮງດ້ານລະບອບສັງຄົມນິຍົມ
ເດືອນສິງຫາປີ 1980, ຈີນໄດ້ສ້າງຕັ້ງເຂດເສດຖະກິດພິເສດຢູ່ເສີ່ນເຈີ້ນ, ຈູ່ໄຫ, ຊ້ານໂທ ແລະ ເຊ້ຍເມີນ, ໂດຍກຳນົດຢ່າງຈະແຈ້ງວ່າຕ້ອງເສີມຂະຫຍາຍບົດບາດຄວາມເປັນແບບຢ່າງ ແລະເປັນປ່ອງຢ້ຽມທີ່ສຳຄັນຂອງເຂດເສດຖະກິດພິເສດໃນການປະຕິຮູບ ເປີດປະຕູສູ່ພາຍນອກ ແລະ ການສ້າງສາສັງຄົມນິຍົມທີ່ທັນສະໄໝຂອງຈີນ. ຫຼັງຈາກນັ້ນ 40 ປີ, ເຂດເສດຖະກິດພິເສດເສີ່ນເຈີ້ນໄດ້ພັດທະນາຈາກເມືອງນ້ອຍໃນເຂດຊາຍແດນທີ່ຫຼ້າຫຼັງ ກາຍມາເປັນຕົວເມືອງລະດັບສາກົນຂະໜາດໃຫຍ່ທີ່ມີບົດບາດສຳຄັນໃນໂລກ, ຈາກການປະຕິຮູບໂຄງປະກອບເສດຖະກິດຈົນຮອດການລົງເລິກການປະຕິຮູບຢ່າງຮອບດ້ານ, ຈາກການຖືເອົາການຄ້າຂາເຂົ້າຂາອອກເປັນຫຼັກ ກາຍມາເປັນການຖືເອົາການເປີດປະຕູສູ່ພາຍນອກໃນລະດັບສູງຢ່າງຮອບດ້ານເປັນຫຼັກ, ຈາກການແກ້ໄຂບັນຫາການກິນອີ່ມນຸ່ງອຸ່ນມາເປັນການສ້າງສັງຄົມທີ່ອີ່ມໜຳສຳລານຢ່າງຮອບດ້ານດ້ວຍຄຸນນະພາບສູງ, ເຊິ່ງໄດ້ບັນລຸການພັດທະນາແບບກ້າວກະໂດດເປັນຄັ້ງປະຫວັດສາດ. ທ່ານສີຈິ້ນຜິງໄດ້ຕີລາຄາວ່າ: “ເສີ່ນເຈີ້ນແມ່ນຕົວເມືອງທີ່ໃໝ່ອ່ຽມທີ່ພັກ ແລະ ປະຊາຊົນສ້າງຂຶ້ນຫຼັງການປະຕິຮູບ ແລະ ເປີດປະຕູສູ່ພາຍນອກ, ປຽບເໝືອນການວາດພາບສິ່ງສຸດຍອດຂອງລະບອບສັງຄົມນິຍົມທີ່ມີສີສັນພິເສດຂອງຈີນຢູ່ເທິງເຈ້ຍຂາວເປົ່າ.”
ປະຈຸບັນ ປະເທດລາວກໍພວມກ້າວເດີນໄປໜ້າຕາມເສັ້ນທາງທີ່ປ່ຽນແປງໃໝ່ ໃນການເປີດປະຕູສູ່ພາຍນອກ ແລະພັດທະນາເຂດເສດຖະກິດພິເສດ. ນັບແຕ່ປະເທດລາວເລີ່ມດຳເນີນການປ່ຽນແປງໃໝ່ ເປັນຕົ້ນມາ, ເຖິງວ່າໄດ້ຮັບຜົນກະທົບດ້ານການເມືອງຈາກການແຕກສະຫຼາຍຂອງອະດີດສະຫະພາບໂຊວຽດ, ວິກິດການການເງິນຢູ່ອາຊີ ແລະ ຄວາມຫຍຸ້ງຍາກອື່ນໆ, ແຕ່ພາຍໃຕ້ການຊີ້ນຳນຳພາທີ່ເຂັ້ມແຂງຂອງພັກປະຊາຊົນປະຕິວັດລາວ, ປະຊາຊົນລາວກໍໄດ້ຮັບຄວາມຄືບໜ້າຢ່າງຕໍ່ເນື່ອງ ແລະ ມີບາດກ້າວເດີນນັບມື້ນັບໜັກແໜ້ນກວ່າເກົ່າ ແລະ ມີເສັ້ນທາງກ້າວເດີນນັບມື້ນັບກວ້າງຂວາງກວ່າເກົ່າ.
ເດືອນມັງກອນປີ 2002, ລັດຖະບານລາວໄດ້ອອກລັດຖະດຳລັດຂອງນາຍົກລັດຖະມົນຕີ, ປະກາດສ້າງຕັ້ງເຂດເສດຖະກິດພິເສດສະຫວັນ-ເຊໂນທີ່ເປັນເຂດເສດຖະກິດພິເສດແຫ່ງທຳອິດຂອງລາວ. ປີ 2003 ເຂດເສດຖະກິດພິເສດໄລຍະທຳອິດຂອງລາວໄດ້ສ້າງຕັ້ງຂຶ້ນຢ່າງເປັນທາງການ. ປະຈຸບັນ ຢູ່ທົ່ວປະເທດລາວມີເຂດເສດຖະກິດພິເສດ 12ແຫ່ງ, ມີການລົງທຶນຕົວຈິງ 5,69ຕື້ໂດລາສະຫະລັດ, ໄດ້ເສຍພັນທະໃຫ້ລັດ 349,14 ຕື້ກີບ, ໄດ້ສ້າງໂອກາດປະກອບອາຊີບໃຫ້ແກ່ຫຼາຍກວ່າ 55000 ຄົນ, ເຮັດໃຫ້ອຸດສາຫະກຳການຜະລິດ, ການຈໍລະຈອນສິນຄ້າ, ຂະແໜງການບໍລິການ ແລະ ຂະແໜງການອື່ນໆຂອງລາວກ້າວໄປສູ່ຮູບແບບຄຸ້ມຄອງຂອງເສດຖະກິດຕະຫຼາດ, ທັງເຊື່ອມໂຍງກັບພາກພື້ນ ແລະ ສາກົນເທື່ອລະກ້າວ.
ສາມາດເວົ້າໄດ້ວ່າ, ເຂດເສດຖະກິດພິເສດໄດ້ກາຍເປັນເວທີທົດລອງ ແລະ ຜູ້ນຳໜ້າໃນການພັດທະນາເສດຖະກິດສັງຄົມ ແລະ ສ້າງສາພັດທະນາປະເທດຂອງສອງປະເທດລາວ-ຈີນ, ເຊິ່ງໄດ້ສະແດງໃຫ້ເຫັນເຖິງທ່າແຮງຂອງລະບອບສັງຄົມນິຍົມທີ່ “ເຕົ້າໂຮມກຳລັງເພື່ອປະຕິບັດພາລະກິດໃຫຍ່”.
ວັນທີ 14 ຕຸລາ 2020ນີ້, ພິທີສະເຫຼີມສະຫຼອງວັນສ້າງຕັ້ງເຂດເສດຖະກິດພິເສດເສີ່ນເຈີ້ນຄົບຮອບ 40 ປີໄດ້ຈັດຂຶ້ນຢ່າງຄຶກຄື້ນ. ໃນພິທີດັ່ງກ່າວ, ທ່ານສີຈິ້ນຜິງໄດ້ກ່າວເນັ້ນວ່າ, ໃນການສ້າງເຂດເສດຖະກິດພິເສດຂອງຈີນຕ້ອງຍຶດໝັ້ນການນຳພາຂອງພັກກອມມູນິດຈີນ, ຕ້ອງຍຶດໝັ້ນ ແລະ ປັບປຸງລະບອບສັງຄົມນິຍົມທີ່ມີສີສັນພິເສດຂອງຈີນ; ຕ້ອງຍຶດໝັ້ນການບຸກບືນຢ່າງກ້າຫານ, ປົດປ່ອຍທາງດ້ານແນວຄິດເພື່ອນຳພາການບຸກທະລຸການປະຕິຮູບ; ຕ້ອງຍຶດໝັ້ນການເປີດປະຕູສູ່ພາຍນອກຢ່າງຮອບດ້ານ; ຕ້ອງຍຶດໝັ້ນການປະດິດສ້າງໃໝ່; ຕ້ອງຍຶດໝັ້ນການປະຕິຮູບ ແລະ ການພັດທະນາທີ່ນຳເອົາຜົນປະໂຫຍດມາໃຫ້ແກ່ປະຊາຊົນຫຼາຍກວ່າເກົ່າ ແລະ ຍຸດຕິທຳກວ່າເກົ່າ; ຕ້ອງຍຶດໝັ້ນການຄຸ້ມຄອງຕາມກົດໝາຍ; ຕ້ອງຍຶດໝັ້ນການບັນລຸເປົ້າໝາຍທີ່ເຮັດໃຫ້ເສດຖະກິດສັງຄົມ ແລະ ສິ່ງແວດລ້ອມນິເວດພັດທະນາຢ່າງຮອບດ້ານ ກົມກຽວກັນ ແລະ ມີຄວາມຍືນຍົງ; ຕ້ອງຍຶດໝັ້ນການປະກອບສ່ວນເຂົ້າໃນການພັດທະນາທົ່ວປະເທດຈີນ.
ນີ້ບໍ່ພຽງແຕ່ເປັນການສະຫຼຸບບົດຮຽນໃນການພັດທະນາເຂດເສດຖະກິດພິເສດຂອງຈີນໃນ 40 ປີຜ່ານມາ, ທັງມີຄວາມໝາຍຊີ້ນຳທີ່ສຳຄັນຕໍ່ການສ້າງສາພັດທະນາເຂດເສດຖະກິດພິເສດໃນຍຸກໃໝ່. ສຳລັບປະເທດລາວທີ່ມີລະບົບເສດຖະກິດສັງຄົມທີ່ຄ້າຍຄືກັບຈີນແລ້ວ, ນີ້ກໍຈະເປັນປະໂຫຍດໃຫ້ແກ່ການສ້າງສາພັດທະນາເຂດເສດຖະກິດພິເສດໃນຍຸກປະຈຸບັນຂອງລາວເຊັ່ນກັນ.