ນັບແຕ່ຈີນດຳເນີນການປະຕິຮູບແລະເປີດປະຕູສູ່ພາຍນອກເປັນຕົ້ນມາ, ຈີນໄດ້ດຳເນີນການຫຼຸດຜ່ອນຄວາມທຸກຍາກຢ່າງມີແຜນການ, ມີການຈັດຕັ້ງ ແລະ ຂະໜາດໃຫຍ່, ພາລະກິດຫຼຸດຜ່ອນຄວາມທຸກຍາກຂອງຈີນໄດ້ປະສົບຜົນສຳເລັດໃຫຍ່ຫຼວງ ພ້ອມທັງໄດ້ເປັນການປະກອບສ່ວນອັນໃຫຍ່ຫຼວງຕໍ່ພາລະກິດຫຼຸດຜ່ອນຄວາມທຸກຍາກຂອງໂລກ. ລາວກໍຄືກັນກັບຈີນ, ເປັນໄລຍະດົນນານມາແລ້ວ, ວຽກງານຫຼຸດຜ່ອນຄວາມທຸກຍາກກໍແມ່ນເປົົ້າໝາຍ ແລະ ທິດທາງສູ້ຊົນຂອງລັດຖະບານລາວເຊັ່ນກັນ.
ໃນຖານະເປັນປະເທດບ້ານໃກ້ເຮືອນຄຽງທີ່ດີຕໍ່ກັນ ທີ່ມີພູຜາປ່າໄມ້ແລະແມ່ນ້ຳລຳເຊຕິດຈອດກັນ, ສອງປະເທດລາວແລະຈີນມີຄວາມສາມາດບົ່ມຊ້ອນອັນໃຫຍ່ຫຼວງໃນການຮ່ວມມື ເພື່ອຫຼຸດຜ່ອນຄວາມທຸກຍາກ. ທ່ານບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ ປະທານປະເທດລາວ ກໍໄດ້ໃຫ້ຄວາມສຳຄັນຢ່າງສູງຕໍ່ບົດຮຽນຫຼຸດຜ່ອນຄວາມທຸກຍາກຂອງຈີນມາໂດຍຕະຫຼອດ. ເດືອນພະຈິກປີ 2017, ໃນງານລ້ຽງຕ້ອນຮັບທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ, ປະທານປະເທດຈີນ ທີ່ຈັດຂຶ້ນຢູ່ຫໍຄຳທີ່ນະຄອນຫຼວງວຽງຈັນ, ທ່ານບຸນຍັງ ວໍລິະຈິດກ່າວວ່າ: ປະເທດລາວມີພື້ນຖານທາງດ້ານກະສິກຳທີ່ດີ, ແຕ່ວ່າຂາດເຂີນທຶນຮອນ ແລະ ເຕັກນິກທັນສະໄໝ. ທ່ານສີຈິ້ນຜິງມີຄຳເຫັນວ່າ: ຂົງເຂດກະສິກຳສາມາດກາຍເປັນຂົງເຂດຈຸດສຸມໃນການຮ່ວມມືລະຫວ່າງສອງຝ່າຍ, ຈີນບໍ່ພຽງແຕ່ສາມາດຊ່ວຍລາວໃຫ້ສາມາດເສີມຂະຫຍາຍທ່າແຮງດ້ານທຳມະຊາດເທົ່ານັ້ນ, ຍັງສາມາດຊ່ວຍປະຊາຊົນລາວໃຫ້ຫຼຸດພົ້ນອອກຈາກຄວາມທຸກຍາກໄດ້ຫຼາຍກວ່າເກົ່າ.
ໂຄງການຮ່ວມມືຕົວແບບດ້ານການຫຼຸດຜ່ອນຄວາມທຸກຍາກຢູ່ລາວທີ່ຈີນໃຫ້ການຊ່ວຍເຫຼືອແມ່ນລັດຖະບານສອງປະເທດຮ່ວມກັນຈັດຕັ້ງປະຕິບັດ ເຊິ່ງໄດ້ນຳເອົາຮູບແບບການຫຼຸດຜ່ອນຄວາມທຸກຍາກທີ່ໃໝ່ອ່ຽມມາສູ່ລາວ. ໂຄງການຮ່ວມມືຕົວແບບໃນການຫຼຸດຜ່ອນຄວາມທຸກຍາກຢູ່ລາວທີ່ຈີນຊ່ວຍເຫຼືອຢູ່ບ້ານຊໍ້ນະຄອນຫຼວງວຽງຈັນ ແລະ ບ້ານຊຽງລ້ອມນະຄອນຫຼວງພະບາງ ເປັນໂຄງການຕົວແບບທີ່ຈີນຊ່ວຍປະຊາຊົນລາວໃຫ້ຫຼຸດພົ້ນອອກຈາກຄວາມທຸກຍາກ.
ປີນີ້ແມ່ນປີສຸດທ້າຍທີ່ຈີນຈະລຶບລ້າງຄວາມທຸກຍາກໃຫ້ໄດ້ຢ່າງເຖິງຖອງ. ໃນຂະນະດຽວກັນ, ປີນີ້ກໍແມ່ນປີທີ່ລາວສູ້ຊົນລຶບລ້າງຄວາມທຸກຍາກເຊັ່ນກັນ. ການຮ່ວມມືໃນດ້ານການຫຼຸດຜ່ອນຄວາມທຸກຍາກລະຫວ່າງລາວ-ຈີນຈະເປັນບົດຮຽນທີ່ດີສຳລັບລາວໃນການພັດທະນາຊົນນະບົດ ແລະ ຫຼຸດຜ່ອນຄວາມທຸກຍາກ, ນີ້ແມ່ນພຶດຕິກຳຕົວຈິງທີ່ມີຄວາມຊີວິດຊີວາໃນການເສີມສ້າງປະຊາຄົມຮ່ວມຊາຕາກຳຂອງມວນມະນຸດ, ທັງໄດ້ສ່ອງແສງໃຫ້ເຫັນເຖິງມູນເຊື້ອມິດຕະພາບທີ່ດີງາມລະຫວ່າງສອງປະເທດລາວ-ຈີນ. ເຊື່ອວ່າ: ການຮ່ວມມືໃນການຫຼຸດຜ່ອນຄວາມທຸກຍາກລະຫວ່າງສອງປະເທດ ຈະຂະຫຍາຍຕົວເຂົ້າສູ່ລວງເລິກຢ່າງບໍ່ຢຸດຢັ້ງ ແລະ ປະສົບຜົນສຳເລັດໃໝ່ອັນໃຫຍ່ຫຼວງກວ່າເກົ່າ.