ທ່ານເຕໂດຣສ ອັດຮາໂນມ ເກເບຣເຢຊຸສ ຜູ້ອຳນວຍການໃຫຍ່ອົງການອະນາໄມໂລກກ່າວໃນວັນທີ 19 ຕຸລານີ້ວ່າ: ປັດຈຸບັນນີ້ໄດ້ມີ 184 ປະເທດແລະເຂດແຄວ້ນເຂົ້າຮ່ວມ “ແຜນການດຳເນີນງານກ່ຽວກັບວັກຊີນກັນພະຍາດໂຄວິດ-19”, ຈະມີປະເທດແລະເຂດແຄວ້ນຈຳນວນຫຼາຍກວ່າເກົ່າມີຄວາມຫວັງຈະໄດ້ຮັບວັກຊີນກັນພະຍາດດັ່ງກ່າວ.
ໃນກອງປະຊຸມຖະແຫຼງຂ່າວທີ່ຈັດຂຶ້ນໃນວັນທີ 21 ຕຸລານີ້, ທ່ານຈ້າວລີ້ຈ່ຽນ ໂຄສົກກະຊວງການຕ່າງປະເທດຈີນ ໄດ້ຕອບຄຳຖາມທີ່ກ່ຽວຂ້ອງຂອງນັກຂ່າວ ໂດຍກ່າວວ່າ: ຈີນຕັດສິນໃຈເຂົ້າຮ່ວມໃນແຜນການດັ່ງກ່າວ ກໍເພື່ອຊຸກຍູ້ການແບ່ງປັນວັກຊີນຢ່າງສະເໝີພາບດ້ວຍການກະທຳຕົວຈິງຂອງຕົນ, ຮັບປະກັນການສະໜອງວັກຊີນໃຫ້ແກ່ປະເທດພວມພັດທະນາ.
ທ່ານຈ້າວລີ້ຈ່ຽນ ຍັງກ່າວຕື່ມວ່າ: ນີ້ແມ່ນມາດຕະການທີ່ສຳຄັນຂອງຈີນໃນການຍຶດຖືແນວຄວາມຄິດປະຊາຄົມຮ່ວມສາທາລະນະສຸກຂອງມວນມະນຸດ, ປະຕິບັດຕາມຄຳໝັ້ນສັນຍາຂອງຕົນເພື່ອຊຸກຍູ້ໃຫ້ວັກຊີນກັນພະຍາດໂຄວິດ-19 ເປັນຜະລິດຕະພັນສາທາລະນະຂອງໂລກ. ນອກນີ້, ຈີນຍັງຈະໃຫ້ບຸລິມະສິດສະໜອງວັກຊີນດັ່ງກ່າວໃຫ້ແກ່ປະເທດພວມພັດທະນາເປັນບຸລິມະສິດດ້ວຍຫຼາຍຮູບແບບ ລວມທັງການບໍລິຈາກ ແລະ ການຊ່ວຍເຫຼືອລ້າ.