ງານວາງສະແດງສິນຄ້ານຳເຂົ້າສາກົນຈີນຄັ້ງທີ 3 ຈະຈັດຂຶ້ນຢູ່ນະຄອນຊຽງໄຮ້ຈີນແຕ່ວັນທີ 5 ຫາ 10 ພະຈິກໜ້ານີ້ ເຊິ່ງເປັນງານວາງສະແດງສາກົນຂະໜາດໃຫຍ່ພຽງໜຶ່ງດຽວຂອງໂລກ ທີ່ໄດ້ຈະຈັດຂຶ້ນໃນຫົກເດືອນທ້າຍປີນີ້.
ການແຜ່ລະບາດຂອງພະຍາດໂຄວິດ-19 ບໍ່ໄດ້ສ້າງຜົນກະທົບຕໍ່ຄວາມກະຕືລືລົ້ນຂອງວິສາຫະກິດປະເທດຕ່າງໆທີ່ຈະເຂົ້າຮ່ວມງານວາງສະແດງຄັ້ງນີ້. ເຈົ້າໜ້າທີ່ຄະນະກຳມະການການຄ້າແລະການລົງທຶນອົສຕຣາລີກ່າວວ່າ: ປີນີ້, ຈະມີວິສາຫະກິດປະເທດຕົນເກືອບ 200 ແຫ່ງເຂົ້າຮ່ວມງານ ເຊິ່ງຈະສ້າງສະຖິຕິສູງສຸດໃນການເຂົ້າຮ່ວມງານວາງສະແດງສິນຄ້ານຳເຂົ້າສາກົນຈີນ. ນອກນີ້, ຍັງມີວິສາຫະກິດລະດັບແຖວໜ້າ 500 ແຫ່ງຂອງໂລກ ແລະ ວິສາຫະກິດຫົວຈັກຫຼັກແຫຼ່ງໃນຂະແໜງການຕ່າງໆກໍໄດ້ເຂົ້າຮ່ວມຢ່າງຕັ້ງໜ້າ ເຊິ່ງຈະມີຈຳນວນເທົ່າກັບ 2 ຄັ້ງທີ່ຜ່ານມາ. ວິສາຫະກິດຫຼາຍແຫ່ງຈະນຳເອົາຜະລິດຕະພັນໃໝ່, ເຕັກນິກໃໝ່ ແລະ ການບໍລິການໃໝ່ມາວາງສະແດງເປັນຄັ້ງທຳອິດຂອງໂລກ ກໍຄືຂອງຈີນ.
ໃນຖານະເປັນມາດຕະການສຳຄັນຢ່າງໜຶ່ງຂອງຈີນ ທີ່ເປີດຕະຫຼາດສູ່ໂລກຢ່າງເປັນເຈົ້າການ, ງານວາງສະແດງສິນຄ້ານຳເຂົ້າສາກົນຈີນໄດ້ກາຍເປັນເວທີສຳຄັນສຳລັບວິສາຫະກິດການຜະລິດ ແລະ ວິສາຫະກິດສົ່ງອອກຂອງໂລກ ໃນການບຸກເບີກຕະຫຼາດຈີນ ເຊິ່ງມີບົດບາດນັບມື້ນັບພົ້ນເດັ່ນຂຶ້ນ ໃນດ້ານຊຸກຍູ້ການຈັດຊື້ສາກົນ ແລະ ຊຸກຍູ້ການລົງທຶນ. ປີນີ້, ງານວາງສະແດງຈະມີເນື້ອທີ່ວາງສະແດງກວ້າງຂວາງກວ່າເກົ່າ ແລະ ມີການປະສົມປະສານກັບຈຸດເດັ່ນຂອງໂລກ ແລະ ທ່າອຽງການພັດທະນາຂອງຂະແໜງການ ເຊິ່ງຈະຈັດໃຫ້ມີເຂດວາງສະແດງສາທາລະນະສຸກແລະປ້ອງກັນພະຍາດ, ເຂດວາງສະແດງປະຢັດພະລັງງານແລະອະນຸລັກສິ່ງແວດລ້ອມ, ເຂດວາງສະແດງການເດີນທາງແບບອັດສະລິຍະ, ຍັງໄດ້ຈັດໃຫ້ມີຮູບແບບ “ການເຊັນສັນຍາທາງອິນເຕີເນັດ”, “ໃນຂະນະທີ່ດຶງດູດການວາງສະແດງກໍໄດ້ມີການຈັບຄູ່ທາງທຸລະກິດ” ແລະ ອື່ນໆເປັນຄັ້ງທຳອິດ ເພື່ອຊຸກຍູ້ໃຫ້ວິສາຫະກິດທີ່ເຂົ້າຮ່ວມງານວາງສະແດງສາມາດຕິຕໍ່ພົວພັນກັບວິສາຫະກິດຈັດຊື້ໄດ້ໄວກວ່າເກົ່າ.
ຕະຫຼາດຈີນເປັນໂອກາດຂອງໂລກ, ການເປີດປະຕູສູ່ພາຍນອກໄດ້ກາຍເປັນສັນຍະລັກທີ່ຈະແຈ້ງຂອງຈີນໃນຍຸກປັດຈຸບັນ. ໂດຍຜ່ານຈາກການຊຸກຍູ້ການຍົກລະດັບດ້ານການຄ້າ, ອຸດສາຫະກຳ ແລະ ການບໍລິໂພກ, ງານວາງສະແດງສິນຄ້ານຳເຂົ້າສາກົນຈີນຈະສ້າງໂອກາດຫຼາຍກວ່າເກົ່າໃຫ້ແກ່ການພັດທະນາເສດຖະກິດໂລກ.