ຕາມຂ່າວCRI：ໃນກອງປະຊຸມຂ່າວເປັນປະຈຳທີ່ໄດ້ຈັດຂື້ນໃນວັນທີ 3 ພະຈິກນີ້, ທ່ານຫວ່າງເວີນປີ່ນ, ໂຄສົກກະຊວງການຕ່າງປະເທດຈີນໄດ້ກ່າວໃນເວລາຕອບຄຳຖາມກ່ຽວກັບການພິຈາລະນາອະນາຄົດດ້ານການຮ່ວມມືລະຫວ່າງຈີນ-ອາຊຽນວ່າ: ສະພາບພະຍາດບໍ່ໄດ້ຂັດຂວາງການໄປມາຫາສູ່ກັນແລະການຮ່ວມມືລະຫວ່າງຈີນ-ອາຊຽນ, ການພົວພັນລະຫວ່າງສອງຝ່າຍຍິ່ງແໜ້ນແຟ້ນແລະເລິກເຊິ່ງກວ່າເກົ່າທ່າມກາງສະພາບການທີ່ຫຍຸ້ງຍາກ. ຈີນແລະປະເທດຕ່າງໆໃນອາຊຽນໄດ້ສ້າງ “ຊ່ອງທາງດ່ວນໄວ”ດ້ານການໄປມາຫາສູ່ກັນຂອງບຸກຄະລາກອນແລະ “ຊ່ອງທາງສີຂຽວ”ດ້ານການຈໍລະຈອນສິນຄ້າແລະອຸປະກອນ, ທັງໄດ້ເລັ່ງລັດການຟື້ນຟູການເຮັດວຽກແລະການຜະລິດ, ເລັ່ງລັດການສ້າງ “ໜຶ່ງແລວໜຶ່ງເສັ້ນທາງ” ຢ່າງໝັ້ນທ່ຽງດ້ວຍຄຸນນະພາບສູງ.
ທ່ານຫວ່າງເວີນປີ່ນກ່າວວ່າ, ນັບແຕ່ຕົ້ນປີນີ້ເປັນຕົ້ນມາ, ການຮ່ວມມືດ້ານເສດຖະກິດການຄ້າລະຫວ່າງຈີນ-ອາຊຽນໄດ້ມີທວ່ງທ່າເພີ່ມຂຶ້ນສວນກັບກະແສ, ໃນ 3 ໄຕມາດຂອງປີນີ້ຍອດມູນຄ່າການຄ້າລະຫວ່າງສອງຝ່າຍໄດ້ບັນລຸ 481 ຕື້ 8 ຮ້ອຍລ້ານໂດລາ, ໄດ້ກວມ 1 ສ່ວນ 7 ຂອງຍອດມູນຄ່າການຄ້າກັບຕ່າງປະເທດຂອງຈີນ. ຈີນໄດ້ລົງທຶນໂດຍກົງຢູ່ບັນດາປະເທດອາຊຽນເຖິງ 10 ຕື້ 7 ຮ້ອຍລ້ານໂດລາ, ໄດ້ເພີ່ມຂຶ້ນ 76,6% ເມື່ອທຽບໃສ່ໄລຍະດຽວກັນຂອງປີກາຍນີ້, ເຊິ່ງສະແດງໃຫ້ເຫັນເຖິງຄວາມເຂັ້ມແຂງແລະກຳລັງບົ່ມຊ້ອນອັນໃຫຍ່ຫຼວງດ້ານການຮ່ວມມືລະຫວ່າງສອງຝ່າຍ.