ບົດປາໄສຂອງທ່ານສີຈິ້ນຜີງ
ກ່າວໃນພິທີໄຂງານວາງສະແດງສິນຄ້ານຳເຂົ້າສາກົນຈີນຄັ້ງທີ 3
(ວັນທີ 4 ພະຈິກປີ 2020)
ຮຽນປະມຸກລັດ ແລະ ຫົວໜ້າລັດຖະບານຂອງບັນດາປະເທດທີ່ນັບຖື,
ຮຽນຜູ້ຮັບຜິດຊອບອົງການຈັດຕັ້ງສາກົນ ບັນດາທ່ານທີ່ນັບຖື,
ຮຽນຫົວໜ້າຄະນະຜູ້ແທນປະເທດຕ່າງໆທີ່ນັບຖື,
ຮຽນ ບັນດາທ່ານແຂກຜູ້ມີກຽດ,
ຮຽນທ່ານຍິງ, ທ່ານຊາຍແລະເພື່ອນມິດທັງຫຼາຍ:
ພາຍໃຕ້ຄວາມພະຍາຍາມຮ່ວມກັນຂອງຝ່າຍຕ່າງໆ, ງານວາງສະແດງສິນຄ້ານຳ ເຂົ້າສາກົນຈີນຄັ້ງທີ 3 ໄດ້ໄຂຂຶ້ນແລ້ວ! ກ່ອນອື່ນ, ຂ້າພະເຈົ້າຂໍຕາງໜ້າລັດຖະ ບານແລະປະຊາຊົນຈີນ ແລະ ໃນນາມສ່ວນຕົວ, ຂໍສະແດງຄວາມ ຍິນດີຕ້ອນຮັບບັນດາທ່ານຜູ້ມີກຽດ ຢ່າງສຸດໃຈ! ຂໍສະແດງຄວາມຢື້ຢາມຖາມຂ່າວ ທີ່ຈິງໃຈຕໍ່ເພື່ອມິດທັງເກົ່າ ແລະ ໃໝ່ທຸກໆທ່ານ!
ງານວາງສະແດງຄັ້ງນີ້ໄດ້ຈັດຂຶ້ນໃນໄລຍະພິເສດ. ສະພາບພະຍາດໂຄວິດ-19 ທີ່ ເກີດຂຶ້ນຢ່າງກະທັນຫັນ ໄດ້ສ້າງຜົນກະທົບທີ່ໜັກໜ່ວງໃຫ້ແກ່ປະເທດຕ່າງໆ ທັງໄດ້ສ້າງຜົນກະທົບທີ່ຮ້າຍແຮງໃຫ້ກັບເສດຖະກິດໂລກ. ຈີນໄດ້ຈັດງານມະໂຫ ລານດ້ານການຄ້າທົ່ວໂລກຄັ້ງນີ້ຕາມເວລາກຳນົດ ພາຍໃຕ້ເງື່ອນໄຂທີ່ຮັບປະກັນຄວາມປອດໄພໃນການປ້ອງກັນພະຍາດ ເຊິ່ງໄດ້ສະແດງໃຫ້ເຫັນເຖິງຄວາມມຸ່ງຫວັງ ທີ່ຈິງໃຈຂອງຈີນ ທີ່ຢາກແບ່ງປັນໂອກາດທາງຕະຫຼາດໃຫ້ກັບທົ່ວໂລກ ແລະຊຸກຍູ້ໃຫ້ເສດຖະກິດໂລກຟື້ນຄືນໃໝ່.
ຜ່ານການພັດທະນາເປັນເວລາ 3 ປີ, ງານວາງສະແດງສິນຄ້ານຳເຂົ້າສາກົນຈີນໄດ້ ເຮັດໃຫ້ເຄື່ອງວາງສະແດງກາຍເປັນສິນຄ້າ, ເຮັດໃຫ້ນັກທຸລະກິດທີ່ມາຮ່ວມງານ ກາຍເປັນນັກລົງທຶນ, ເຮັດໃຫ້ຫົວຄິດປະດິດສ້າງແລະແນວຄວາມຄິດສາມາດແລກປ່ຽນກັນໄດ້, ເຮັດໃຫ້ຈີນເຊື່ອນຈອດກັບໂລກ,ງານວາງສະແດງສິນຄ້ານຳເຂົ້າສາກົນຈີນໄດ້ກາຍເປັນ 4 ເວທີໃຫຍ່ໃຫ້ແກ່ ການຈັດຊື້ສິນຄ້າສາກົນ, ການຊຸກຍູ້ການລົງທຶນ, ການແລກປ່ຽນວັດທະນະທຳ, ການເປີດກວ້າງແລະການຮ່ວມມື, ກາຍເປັນຜະລິດຕະພັນສາທາລະນະທີ່ ທົ່ວໂລກຊົມໃຊ້ຮ່ວມກັນ.
ງານວາງສະແດງຄັ້ງນີ້, ມີວິສາຫະກິດປະເທດຕ່າງໆໄດ້ເຂົ້າຮ່ວມຢ່າງຕັ້ງໜ້າ, ເນື້ອທີ່ວາງສະແດງໄດ້ຂະຫຍາຍກວ້າງອອກອີກ 30,000 ຕາແມັດ. ສະເພາະແຕ່ໃນ ເຂດວາງສະແດງກ່ຽວກັບດ້ານສາທາລະນະສຸກແລະການປ້ອງກັນພະຍາດທີ່ສ້າງຕັ້ງຂື້ນໃໝ່ນັ້ນ, ກໍມີວະສາຫະກິດຫົວຈັກຫຼັກແຫຼ່ງ ແລະ ສຸດຍອດ 500 ແຫ່ງຂອງໂລກເຂົ້າຮ່ວມ. ງານວາງສະແດງຄັ້ງນີ້ໄດ້ຈັດຂຶ້ນໃນຮູບແບບຜ່ານທາງອອນລາຍ ແລະ ອອຟລາຍ, ວຽກງານທຸກດ້ານກໍໄດ້ກະກຽມຢ່າງລະອຽດຮອບຄອບ, ເຊື່ອວ່າການຈັດງານຄັ້ງນີ້ຈະປອດໄພ, ມີຊີວິດຊີວາ ແລະມີປະສິດທິຜົນທີ່ອຸດົມສົມບູນແນ່ນອນ.
ທ່ານຍິງ, ທ່ານຊາຍແລະເພື່ອນມິດທັງຫຼາຍ! ເຖິງວ່າໄດ້ຮັບຜົນກະທົບຈາກສະພາບ ການແຜ່ລະບາດຂອງພະຍາດກໍຕາມ, ປີນີ້ ຈີນໄດ້ເລັ່ງລັດບາດກ້າວໃນການເປີດກວ້າງການເປີດປະຕູສູ່ພາຍນອກ. ມາດຕະການຕ່າງໆກ່ຽວກັບການເປີດກວ້າງການເປີດປະຕູສູ່ພາຍນອກ ທີ່ຂ້າພະເຈົ້າໄດ້ປະກາດໃນງານວາງສະແດງສິນຄ້າ ນຳເຂົ້າສາກົນຈີນຄັ້ງທີ 2 ໄດ້ຈັດຕັ້ງປະຕິບັດຢ່າງຮອບດ້ານແລ້ວ. ຈີນສືບຕໍ່ເປີດ ກວ້າງການນຳເຂົ້າສິນຄ້າ, ໃນ 1 ປີມານີ້, ຈັງຫວະການເຕີບໂຕຂອງມູນຄ່ານຳເຂົ້າ ສິນຄ້າແລະການບໍລິການຂອງຈີນສູງກວ່າລະດັບສະເລ່ຍຂອງໂລກຢ່າງພົ້ນເດັ່ນ. ບັນຊີດ້ານລົບສຳລັບນັກລົງທຶນຕ່າງປະທດໃນທົ່ວປະເທດຈີນໄດ້ຫລຸດລົງຈາກ 40 ມາດຕາຍັງເຫຼືອ 33 ມາດຕາ, ເຂດທົດລອງການຄ້າເສລີໄດ້ເພີ່ມຂື້ນ ຈາກ 18 ແຫ່ງເປັນ 21 ແຫ່ງ, ແຜນການສ້າງທ່າກຳປັ່ນການຄ້າເສລີໄຫຫຼຳ ແລະແຜນປະຕິບັດງານກ່ຽວກັບການເປີດກວ້າງການປະຕິຮູບແລະເປີດປະຕູສູ່ພາຍນອກຕື່ມອີກຢູ່ນະຄອນເສີ່ນເຈີ້ນໄດ້ປະກາດແລະປະຕິບັດຕົວຈິງ, ມາດຕະການຕ່າງໆ ເຊັ່ນ: ເຈລະຈາແລະເຊັນສັນຍາການຄ້າເສລີທີ່ມີມາດຕະຖານສູງ, ການສ້າງເຂດສາທິດເພື່ອຊຸກຍູ້ການປະດິດສ້າງໃໝ່ດ້ານການຄ້າການນຳເຂົ້າ, ການປົກປ້ອງຊັບສິນທາງປັນຍາ, ການຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ດ້ວຍຄຸນນະພາບສູງແລະອື່ນໆໄດ້ຮັບຄວາມຄືບໜ້າທີ່ຕັ້ງໜ້າ.
ທ່ານຍິງ, ທ່ານຊາຍແລະເພື່ອນມິດທັງຫຼາຍ!
ການແຜ່ລະບາດ ຂອງພະຍາດໂຄວິດ-19ຢ່າງຂະໜາດໃຫຍ່ໄດ້ເຮັດໃຫ້ເສດຖະກິດໂລກມີຄວາມບໍ່ໝັ້ນທ່ຽງແລະຄວາມບໍ່ແນ່ນອນເພີ່ມຂຶ້ນ. ເບິ່ງຕາມປະຫວັດສາດແລ້ວເຫັນວ່າ, ບໍ່ວ່າຈະເກີດມີຄວາມສ່ຽງ, ໄພພິບັດແລະອຸປະສັກແນວໃດກໍຕາມ, ສັງຄົມມະນຸດກໍຈະຕ້ອງຂະຫຍາຍຕົວກ້າວໄປໜ້າແລະຈະສາມາດສືບຕໍ່ກ້າວໄປໜ້າຢ່າງແນ່ນອນ.
ທ່າອ່ຽງລວມແຫ່ງການເປີດປະຕູສູ່ພາຍນອກແລະການຮ່ວມມືຂອງບັນດາປະເທດບໍ່ມີການປ່ຽນແປງ. ພວກເຮົາຄວນເກາະແຂນກັນ, ຮ່ວມກັນຮັບມືກັບຄວາມສ່ຽງແລະສິ່ງທ້າທາຍ, ເພີ່ມທະວີການຮ່ວມມືແລະການແລກປ່ຽນກັນ, ເປີດກວ້າງການເປີດປະຕູສູ່ພາຍນອກຮ່ວມກັນ.
ພວກເຮົາຄວນສຸມໃສ່ການຊຸກຍູ້ການເປີດປະຕູສູ່ພາຍນອກຮ່ວມກັນດ້ວຍການຮ່ວມມືແບບຕ່າງຝ່າຍຕ່າງມີຜົນປະໂຫຍດ. ການແຜ່ລະບາດຂອງພະຍາດໂຄວິດ-19ຄັ້ງນີ້ໄດ້ເຕືອນໃຫ້ພວກເຮົາຮູ້ວ່າ: ບັນດາປະເທດແມ່ນປະຊາຄົມຮ່ວມຊາຕາກຳທີ່ຮ່ວມທຸກຮ່ວມສຸກນຳກັນ, ບໍ່ມີປະເທດໃດສາມາດພົ້ນຈາກວິກິດການໃຫຍ່ໄດ້ພຽງລຳພັງ, ຄວາມສາມັກຄີແລະການຮ່ວມມືແມ່ນທາງເລືອກທີ່ຈຳເປັນໃນການຮັບມືກັບສິ່ງທ້າທາຍ. ພວກເຮົາຄວນຍຶດໝັ້ນແນວຄວາມຄິດທີ່ຮ່ວມມືແບບຕ່າງຝ່າຍຕ່າງມີຜົນປະໂຫຍດ, ສ້າງຄວາມໄວ້ເນື້ອເຊື່ອໃຈກັນແຕ່ບໍ່ແມ່ນຄວາມລະແວງສົງໃສ, ຈັບມືກັນແຕ່ບໍ່ແມ່ນ ຍົກກຳປັ້ນໃສ່ກັນ, ປຶກສາຫາລືກັນແຕ່ບໍ່ແມ່ນການກ່າວປະນາມກັນ, ຖືຜົນປະໂຫຍດຮ່ວມຂອງບັນດາປະເທດເປັນສຳຄັນ,ຊຸກຍູ້ໃຫ້ເສດຖະກິດໂລກາພິວັດຂະຫຍາຍຕົວໄປສູ່ທິດທາງທີ່ເປີດກວ້າງ, ກວມລວມ, ສ້າງຜົນປະໂຫຍດໃຫ້ແກ່ທຸກຝ່າຍ, ດຸນດ່ຽງແລະ ຕ່າງຝ່າຍຕ່າງມີຜົນປະໂຫຍດ.
ພວກເຮົາຄວນສຸມໃສ່ການເປີດປະຕູສູ່ພາຍນອກຮ່ວມກັນດ້ວຍການຮ່ວມມືແລະຮັບຜິດຊອບຮ່ວມກັນ. ປະຫວັດສາດແລະພຶດຕິກຳຕົວຈິງໄດ້ພິສູດໃຫ້ເຫັນວ່າ: ເມື່ອຜະເຊີນໜ້າກັບຄວາມສ່ຽງແລະສິ່ງທ້າທາຍຕ່າງໆ, ບັນດາປະເທດຄວນຮ່ວມກັນຜ່ານຜ່າຄວາມຫຍຸ້ງຍາກ, ປະຕິບັດໜ້າທີ່ຄວາມຮັບຜິດຊອບຂອງຕົນ, ແຕ່ບໍ່ຄວນຖືຕົນເອງຢູ່ເໜືອໝູ່ ແລະ ສ້າງຄວາມເສຍຫາຍໃຫ້ກັບປະເທດອື່ນທັງບໍ່ມີຜົນດີໃຫ້ກັບຕົນເອງ. ບັນດາປະເທດໃຫຍ່ຄວນນຳໜ້າເປັນແບບຢ່າງ, ກຸ່ມເສດຖະກິດຕົ້ນຕໍຄວນປະຕິບັດຄວາມເປັນແບບຢ່າງ, ປະເທດທີ່ກຳລັງພັດທະນາຄວນຕັ້ງໜ້າປະຕິບັດຕົວຈິງ, ເພື່ອຊຸກຍູ້ການພັດທະນາໂລກຮ່ວມກັນໂດຍຜ່ານການເປີດປະຕູສູ່ພາຍນອກຮ່ວມກັນແລະຮັບຜິດຊອບຮ່ວມກັນ.
ພວກເຮົາຕ້ອງສຸມໃສ່ການເປີດປະຕູສູ່ພາຍນອກຮ່ວມກັນດ້ວຍການຮ່ວມມືແລະບໍລິຫານຮ່ວມກັນ. ເມື່ອຜະເຊີນໜ້າກັບສິ່ງທ້າທາຍທີ່ເກີດຈາກເສດຖະກິດໂລກາພິວັດ, ບໍ່ຄວນປ່ອຍປະໃຫ້ລັດທິຝ່າຍດຽວແລະລັດທິປົກປ້ອງທຳລາຍລະບຽບການສາກົນແລະກົດລະບຽບສາກົນ, ແຕ່ຄວນປະຕິຮູບລະບົບບໍລິຫານເສດຖະກິດໂລກຢ່າງສ້າງສັນ, ເພື່ອສ້າງຜົນປະໂຫຍດແລະຫຼີກລ່ຽງຜົນເສຍຫາຍໃຫ້ໄດ້ດີກວ່າເກົ່າ. ຄວນຍຶດໝັ້ນໃນທັດສະນະການບໍລິຫານໂລກດ້ວຍການປຶກສາຫາລືຮ່ວມກັນ, ສ້າງສາຮ່ວມກັນແລະຊົມໃຊ້ຮ່ວມກັນ, ປົກປັກຮັກສາລະບົບການຄ້າຫຼາຍຝ່າຍທີ່ຖືອົງການການຄ້າໂລກເປັນພື້ນຖານ, ປັບປຸງກົດລະບຽບການບໍລິຫານເສດຖະກິດໂລກແລະຊຸກຍູ້ການສ້າງເສດຖະກິດໂລກແບບເປີດກວ້າງ.
ທ່ານຍິງ ທ່ານຊາຍແລະເພື່ອນມິດທັງຫຼາຍ!
ກອງປະຊຸມຄົບຄະນະຄັ້ງທີ5ຂອງຄະນະກຳມະການສູນກາງພັກກອມມູນິດຈີນສະໄໝທີ19ທີ່ຫາກໍ່ອັດລົງນັ້ນໄດ້ວາງແຜນຮອບດ້ານກ່ຽວກັບການພັດທະນາຂອງຈີນໃນໄລຍະ 5 ປີຄັ້ງທີ14. ເປົ້າໝາຍຂອງຈີນກ່ຽວກັບການສູ້ຊົນຍາດເອົາໄຊຊະນະຂັ້ນສຸດທ້າຍໃນການສ້າງສັງຄົມທີ່ອີ່ມໜຳສຳລານໃຫ້ສຳເລັດຢ່າງຮອບດ້ານແລະສູ້ຊົນຍາດເອົາໄຊຊະນະໃນຂັ້ນສຸດທ້າຍໃນບັ້ນລຶບລ້າງຄວາມທຸກຍາກໃກ້ຈະບັນລຸຜົນເປັນຈິງແລ້ວ. ນັບແຕ່ປີໜ້າເປັນຕົ້ນໄປ,ຈີນຈະເປີດຂະບວນການໃໝ່ແຫ່ງການສ້າງສາປະເທດສັງຄົມນິຍົມທີ່ທັນສະໄໝຢ່າງຮອບດ້ານ, ຈີນຈະກ້າວເຂົ້າສູ່ໄລຍະໃໝ່ແຫ່ງການພັດທະນາ. ເພື່ອຕອບສະໜອງກັບຄວາມຮຽກຮ້ອງຕ້ອງການໃໝ່ຂອງສະພາບການໃໝ່, ຈີນໄດ້ກຳນົດການສ້າງສະພາບການໃໝ່ທີ່ຖືກຮອບໝູນວຽນພາຍໃນເປັນຫຼັກ ແລະເຮັດໃຫ້ຮອບໝູນວຽນທັງພາຍໃນແລະສາກົນຊ່ວຍຊູຍູ້ໜູນກັນ. ນີ້ເດັດຂາດຈະບໍ່ແມ່ນຮອບໝູນວຽນພາຍໃນທີ່ປິດປະຕູ,ແຕ່ແມ່ນຮອບໝູນວຽນທັງພາຍໃນແລະສາກົນທີ່ເປີດກວ້າງກວ່າເກົ່າ, ເຊິ່ງບໍ່ພຽງແຕ່ເປັນຄວາມຮຽກຮ້ອງຕ້ອງການດ້ານການພັດທະນາຂອງຈີນເອງເທົ່ານັ້ນ, ຍັງຈະສ້າງຜົນປະໂຫຍດໃຫ້ແກ່ປະຊາຊົນບັນດາປະເທດໃຫ້ຫຼາຍຂຶ້ນກວ່າເກົ່າອີກດ້ວຍ.
ຈີນມີປະຊາກອນຈຳນວນ 1，4ຕື້ຄົນ, ກຸ່ມຄົນທີ່ມີລາຍໄດ້ປານກາງຫຼາຍກວ່າ 400ລ້ານຄົນ, ຈີນເປັນຕະຫຼາດໃຫຍ່ທີ່ມີກຳລັງບົ່ມຊ້ອນຫຼາຍທີ່ສຸດຂອງໂລກ. ຄາດວ່າໃນໄລຍະ10ປີຕໍ່ໜ້າ, ຍອດມູນຄ່າການນຳເຂົ້າສິນຄ້າຈະບັນລຸເຖິງ22.000 ຕື້ໂດລາສະຫະລັດ. ສິນຄ້າທີ່ຜະລິດໂດຍຈີນໄດ້ກາຍເປັນພາກສ່ວນປະກອບອັນສຳຄັນຂອງຕ່ອງໂສ້ອຸດສາຫະກຳແລະຕ່ອງໂສ້ການສະໜອງຂອງໂລກ ເຊິ່ງໄດ້ປະກອບສ່ວນອັນຕັ້ງໜ້າ. ຕະຫຼາດຄວາມຕ້ອງພາຍໃນປະເທດຈີນອັນກວ້າງຂວາງຈະສືບຕໍ່ກະຕຸ້ນໃຫ້ມີຄວາມສາມາດບົ່ມຊ້ອນແຫ່ງການປະດິດສ້າງໃໝ່ຢ່າງບໍ່ຢຸດຢັ້ງ.
ທ່ານຍິງ ທ່ານຊາຍແລະເພື່ອນມິດທັງຫຼາຍ!
ສະພາບການແຜ່ລະບາດຂອງພະຍາດໂຄວິດ-19ເວົ້າສຳລັບບັນດາປະເທດແລ້ວລ້ວນແຕ່ເປັນການທົດສອບຄັ້ງໃຫຍ່. ປະຊາຊົນຈີນໄດ້ຜ່ານຈາກຄວາມພະຍາຍາມຢ່າງລຳບາກແລະຍາດໄດ້ຜົນສຳເລັດສຳຄັນທາງຍຸດທະສາດໃນການປ້ອງກັນແລະຄວບຄຸມພະຍາດ. ເສດຖະກິດຈີນໄດ້ມີທ່ວງທ່າໝັ້ນທ່ຽງແລະຂະຫຍາຍຕົວໄປທິດທາງທີ່ດີ, 3ໄຕມາດຂອງປີນີ້, ເສດຖະກິດຈີນໄດ້ມີການຂະຫຍາຍຕົວ, ໃນນັ້ນ, ມູນຄ່າການຄ້າກັບຕ່າງປະເທດໄດ້ເພີ່ມຂຶ້ນ0.7%, ການນຳໃຊ້ທຶນຕ່າງປະເທດໃນຕົວຈິງໄດ້ເພີ່ມຂຶ້ນ5.2%, ເຊິ່ງໄດ້ເສີມຂະຫຍາຍບົດບາດອັນຕັ້ງໜ້າເຂົ້າໃນການຊຸກຍູ້ການຟື້ນຟູເສດຖະກິດໂລກ. ເພື່ອສະໜັບສະໜູນບັນດາປະເທດໃນການຕ້ານກັບພະຍາດ,ຈີນໄດ້ແບ່ງປັນບົດຮຽນທັງໝົດກັບຝ່າຍຕ່າງໆ,ໃຫ້ການຊ່ວຍເຫຼືອແກ່ປະຊາຄົມໂລກຕາມຄວາມສາມາດຂອງຕົນ,ນັບມາຮອດວັນທີ 20ຕຸລາຜ່ານມາ, ຈີນໄດ້ຊ່ວຍເຫຼືອ 150ປະເທດແລະອົງການຈັດຕັ້ງສາກົນ 7ແຫ່ງໃນການຕ້ານກັບພະຍາດ，ໄດ້ສົ່ງອອກຜ້າປິດປາກ 179 ຕື້ກວ່າອັນ、ຊຸດປ້ອງກັນພະຍາດ1.73ຕື້ຊຸດ、ນ້ຳຢາກວດຫາເຊື້ອພະຍາດ 543 ລ້ານຫຼອດ.
ໃນບາດກ້າວຕໍ່ໄປ,ຈີນຈະຍຶດຖືຄວາມເຊື່ອໝັ້ນໃນການເປີດກວ້າງ,ການຮ່ວມມື,ສາມັກຄີແລະຕ່າງຝ່າຍຕ່າງມີຜົນປະໂຫຍດ, ເປີດກວ້າງການເປີດປະຕູສູ່ພາຍນອກຢ່າງຮອບດ້ານແລະໝັ້ນໜຽວບໍ່ປ່ຽນແປງ, ຈະສູ້ຊົນເຮັດໃຫ້ຕະຫຼາດທັງພາຍໃນແລະຕ່າງປະເທດເຊື່ອມຈອດກັນແລະຮ່ວມກັນຊົມໃຊ້ຊັບພະຍາກອນທີ່ເປັນປັດໄຈສຳຄັນຢ່າງມີປະສິດທິພາບສູງກວ່າເກົ່າ, ເຮັດໃຫ້ຕະຫຼາດຈີນກາຍເປັນຕະຫຼາດຂອງໂລກ,ຕະຫຼາດແຫ່ງການຊົມໃຊ້ຮ່ວມກັນ,ຕະຫຼາດຂອງຄົນທັງຫຼາຍ, ເພີ່ມພະລັງທາງບວກໃຫ້ແກ່ປະຊາຄົມໂລກໃຫ້ຫຼາຍກວ່າເກົ່າ.
ໜຶ່ງ, ສ້າງຈຸດຍຸດທະສາດໃໝ່ຂອງການເປີດປະຕູສູ່ພາຍນອກ. ໃນ 7 ປີຜ່ານມາ, ເຂດທົດລອງການຄ້າເສລີແຫ່ງຕ່າງໆຂອງຈີນໄດ້ບຸກບືນ ແລະ ຄົ້ນຄວ້າຢ່າງກ້າຫານ, ໄດ້ຮັບປະສິດທິຜົນຢ່າງພົ້ນເດັ່ນ.ການສ້າງທ່າການຄ້າເສລີໄຫຫຼໍາໄດ້ ເລີ່ມຕົ້ນຢ່າງສະດວກ. ຈີນຈະເສີມຂະຫຍາຍບົດບາດນຳໜ້າຂອງເຂດທົດລອງການຄ້າເສລີ ແລະ ທ່າການຄ້າເສລີຢ່າງມີປະສິດທິຜົນ, ປະກາດບັນຊີດ້ານລົບກ່ຽວກັບການຄ້າການບໍລິການຂ້າມຊາດ, ເປີດກວ້າງການເປີດປະຕູສູ່ພາຍນອກຢ່າງຕໍ່ເນື່ອງໃນຂົງເຂດເສດຖະກິດດິຈີຕອນ ອິນເຕີເນັດ ແລະອື່ນໆ, ລົງເລິກການປະຕິຮູບ ແລະການປະດິດສ້າງໃໝ່ເພື່ອເຮັດໃຫ້ການຄ້າ ແລະ ການລົງທຶນເປັນເສລີ ແລະ ມີຄວາມສະດວກຫຼາຍກວ່າເກົ່າ, ຊຸກຍູ້ການສ້າງໂຄງປະກອບໃໝ່ທາງດ້ານເສດຖະກິດທີ່ເປີດກວ້າງໃນລະດັບສູງກວ່າເກົ່າ.
ສອງ, ຊຸກຍູ້ການພັດທະນາດ້ວຍການປະດິດສ້າງໃໝ່ໃນດ້ານການຄ້າກັບຕ່າງປະເທດ. ຈີນຈະສືບຕໍ່ສະໜັບສະໜູນວິສາຫະກິດບັນດາປະເທດບຸກເບີກໂອກາດການຄ້າຢູ່ຈີນ ໂດຍຜ່ານຈາກເວທີງານວາງສະແດງສິນຄ້ານຳເຂົ້າສາກົນຈີນ ແລະເວທີອື່ນໆ. ຈີນຈະຂຸດຄົ້ນກຳລັງບົ່ມຊ້ອນຂອງການເຕີບໂຕດ້ານການຄ້າກັບຕ່າງປະເທດ, ປະກອບສ່ວນຢ່າງຕັ້ງໜ້າເຂົ້າໃນການຊຸກຍູ້ການເຕີບໂຕດ້ານການຄ້າສາກົນ ແລະ ການພັດທະນາເສດຖະກິດໂລກ. ຈີນຈະຊຸກຍູ້ໃຫ້ເລັ່ງລັດພັດທະນາຂະແໜງການໃໝ່ ແລະ ຮູບແບບໃໝ່ ເຊັ່ນ:ການຄ້າເອເລັກໂຕຼນິກຂ້າມຊາດ ແລະອື່ນໆ, ສ້າງແຮງຂັບເຄື່ອນໃໝ່ໃນການຊຸກຍູ້ການຄ້າກັບຕ່າງປະເທດ. ຈີນຈະປັບປຸງ “ບັນຊີດ້ານເຕັກໂນໂລຊີທີ່ຈີນເກືອດຫ້າມ ແລະຈຳກັດການນຳເຂົ້າ”, ເພື່ອສ້າງສະພາບແວດລ້ອມທີ່ດີໃຫ້ແກ່ການເຄື່ອນໄຫວຂອງປັດໄຈເຕັກໂນໂລຊີຂ້າມຊາດໄດ້ຢ່າງເສລີ.
ສາມ, ປັບປຸງສະພາບແວດລ້ອມດ້ານການດຳເນີນທຸລະກິດໃຫ້ດີຂຶ້ນຢ່າງຕໍ່ເນື່ອງ.ຫຼັງຈາກເກີດມີການແຜ່ລະບາດຂອງພະຍາດໂຄວິດ-19 , ຈີນໄດ້ອອກນະໂຍບາຍຕ່າງໆເພື່ອຊ່ວຍແກ້ໄຂຄວາມຫຍຸ້ງຍາກ ແລະ ນຳເອົາຜົນປະໂຫຍດມາໃຫ້ແກ່ວິສາຫະກິດທີ່ລົງທະບຽນຢູ່ພາຍໃນປະເທດຈີນຢ່າງສະເໝີພາບກັນ. ປີນີ້, ຈີນໄດ້ປະຕິບັດ “ກົດໝາຍວ່າດ້ວຍການລົງທຶນຂອງນັກທຸລະກິດຕ່າງປະເທດ” ແລະກົດລະບຽບທີ່ກ່ຽວຂ້ອງ, ໄດ້ປັບປຸງບັນຊີດ້ານລົບສຳລັບການລົງທຶນຂອງ ຕ່າງປະເທດໃຫ້ໜ້ອຍລົງອີກ. ຈີນຈະສືບຕໍ່ປັບປຸງລະບົບກົດໝາຍທີ່ກ່ຽວພັນເຖິງນັກທຸລະກິດຕ່າງປະເທດຢ່າງເປີດເຜີຍ ແລະ ໂປ່ງໃສ, ເພີ່ມທະວີການປົກປ້ອງຊັບສິນທາງປັນຍາ, ປົກປັກຮັກສາສິດຜົນປະໂຫຍດທີ່ຖືກຕ້ອງຕາມກົດໝາຍຂອງວິສາຫະກິດຕ່າງປະເທດ, ສ້າງສະພາບແວດລ້ອມທີ່ດີກວ່າເກົ່າດ້ວຍການບໍລິການທີ່ມີຄຸນນະພາບດີ.
ສີ່, ລົງເລິກການຮ່ວມມືສອງຝ່າຍຫຼາຍຝ່າຍກໍຄືໃນພາກພື້ນ. ຈີນຍິນດີຮ່ວມກັບບັນດາປະເທດຫຼາຍກວ່າເກົ່າເພື່ອເຈລະຈາ ແລະ ເຊັນສັນຍາການຄ້າເສລີທີ່ມີມາດຕະຖານສູງ, ຊຸກຍູ້ການລົງນາມສັນຍາການພົວພັນຄູ່ຮ່ວມເສດຖະກິດຮອບດ້ານຂອງພາກພື້ນໂດຍໄວ, ເລັ່ງລັດການເຈລະຈາສັນຍາການຄ້າເສລີຕ່າງໆເຊັ່ນ: ສັນຍາການລົງທຶນຈີນ-ເອີຣົບ, ຈີນ-ຍີ່ປຸ່ນ-ສ.ເກົາຫຼີ ແລະອື່ນໆ, ເພີ່ມທະວີການແລກປ່ຽນບົດຮຽນກັບເຂດການຄ້າເສລີທີ່ມີມາດຕະຖານສູງໃນໂລກ. ຈີນຈະຕັ້ງໜ້າເຂົ້າຮ່ວມການປະຕິຮູບອົງການການຄ້າໂລກ, ຕັ້ງໜ້າເຂົ້າຮ່ວມການຮ່ວມມືໃນກົນໄກຕ່າງໆ ເຊັ່ນ: ອົງການສະຫະປະຊາຊາດ, ກຸ່ມG20, ອົງການຮ່ວມມືເສດຖະກິດອາຊີປາຊີຟິກ, ກຸ່ມປະເທດບຼິກສ ແລະອື່ນໆ. ຈີນ ແລະປະເທດທີ່ກ່ຽວຂ້ອງຈະຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ດ້ວຍຄຸນນະພາບສູງ, ຊຸກຍູ້ການສ້າງປະຊາຄົມຮ່ວມຊາຕາກຳຂອງມວນມະນຸດ.
ທ່ານຍິງທ່ານຊາຍ ແລະເພື່ອນມິດທັງຫຼາຍ!
ຊາວຈີນມັກເວົ້າວ່າ:ຖ້າ “ຜູ້ທີ່ບໍ່ທັນໄປຮອດກຳແພງເມືອງຈີນນັ້ນຍັງບໍ່ແມ່ນ ຊາຍແທ້”. ປະຈຸບັນ, ການພັດທະນາເສດຖະກິດໂລກພວມຜະເຊີນໜ້າກັບສິ່ງທ້າທາຍທີ່ຂ້ຽວຂາດ, ພວກເຮົາຕ້ອງຮັກສາຄວາມໝັ້ນໃຈ ເພີ່ມທະວີຄວາມກ້າຫານ ແລະ ຮ່ວມກັນຜ່ານຜ່າຄວາມຫຍຸ້ງຍາກທີ່ມີຢູ່ໃນປະຈຸບັນ. ຈີນຍິນດີຮ່ວມກັບບັນດາປະເທດ, ສ້າງກາລະໂອກາດໃນການເປີດປະຕູສູ່ພາຍນອກ, ແກ້ໄຂຄວາມຫຍຸ້ງຍາກໃນການຮ່ວມມື, ຮ່ວມມືກັນສ້າງອະນາຄົດທີ່ດີງາມກວ່າເກົ່າໃຫ້ແກ່ມວນມະນຸດ.
ຂໍຂອບໃຈ!