ຕາມສື່ມວນຊົນຕ່າງປະເທດໄດ້ລາຍງານຂ່າວວ່າ: ທ່ານໂມຮາເມັດ ບິນ ຣາຊິດ ອານ ມາກຕຸມ ຮອງປະທານາທິບໍດີ ທັງເປັນນາຍົກລັດຖະມົນຕີສະຫະລັດອາຣັບເອມີເຣດ ເຈົ້າຄອງລັດດູໄບກ່າວວ່າ: ຕົນໄດ້ສັກຢາວັກຊີນໂຄວິດ-19 ທີ່ຜະລິດໂດຍຈີນ.
ຕາມຂ່າວແຈ້ງວ່າ: ຢາວັກຊີນດັ່ງກ່າວແມ່ນຄົ້ນຄວ້າຜະລິດໂດຍກຸ່ມບໍລິສັດຢາຈີນຫຼື SINOPHARM, ປະຈຸບັນກຳລັງທົດລອງນຳໃຊ້ຈິງໃນໄລຍະ 3 ຄືໄລຍະສຸດທ້າຍ. ສື່ມວນຊົນທ້ອງຖິ່ນໄດ້ນຳເອົາຂ່າວຈາກລັດຖະບານສະຫະລັດອາຣັບເອມີເຣດມາລາຍງານວ່າ: ຢາວັກຊີນດັ່ງກ່າວມີຄວາມປອດໄພແລະມີສັບພະຄຸນດີ. ຕາມຂ່າວແຈ້ງວ່າ: ກ່ອນທ່ານອານ ມາກຕຸມຈະສັກຢາວັກຊີນ, ໄດ້ມີເຈົ້າໜ້າທີ່ສະຫະລັດອາຣັບເອມີເຣດ 10 ທ່ານສັກຢາວັກຊີນດັ່ງກ່າວແລ້ວ.
ນອກນີ້, ວັນທີ 3 ພະຈິກນີ້, ສຳນັກຂ່າວສານຣອຍເຕີໄດ້ນຳເອົາຂ່າວຈາກສຳນັກຂ່າວສານບາເຣນມາແຈ້ງວ່າ: ບາເຣນໄດ້ອະນຸມັດທັນທີໃຫ້ສັກຢາວັກຊີນໂຄວິດ-19 ຂອງຈີນທີ່ຢູ່ໃນຂັ້ນທົດລອງໄລຍະ 3 ໃນປະຈຸບັນແກ່ພະນັກງານທີ່ເຮັດວຽກຢູ່ແນວໜ້າຕ້ານພະຍາດໂຄວິດ-19 ແຕ່ວັນທີ 3 ພະຈິກນີ້ເປັນຕົ້ນໄປ.