ຕາມທີ່ກະຊວງການຄ້າຈີນໄດ້ປະກາດການສະຖິຕິການລົງທຶນຂອງຕ່າງປະເທດຢູ່ຈີນປີ 2020 ໃນວັນທີ 5 ພະຈິກນີ້ສະແດງໃຫ້ເຫັນວ່າ, ໃນໄລຍະຈັດຕັ້ງປະຕິບັດແຜນພັດທະນາເສດຖະກິດສັງຄົມ 5 ປີຄັ້ງທີ 13 ຄືແຕ່ປີ 2016-2020, ທົ່ວປະເທດຈີນຄາດວ່າສາມາດດຶງດູດການລົງທຶນຂອງຕ່າງປະເທດໄດ້ທັງໝົດ 690 ຕື້ໂດລາສະຫະລັດ, ເພີ່ມຂຶ້ນຫຼາຍກວ່າໄລຍະຈັດຕັ້ງປະຕິບັດແຜນການ 5 ປີຄັ້ງທີ 12 ຈຳນວນ 10 ຕື້ໂດລາສະຫະລັດຕໍ່ປີ. ຕົວເລກທີ່ກະຊວງການຄ້າຈີນເປີດເຜີຍນັ້ນຍັງສະແດງໃຫ້ເຫັນວ່າ, ໃນໄລຍະແຜນການ 5 ປີຄັ້ງທີ 13, ລາຍຮັບທີ່ໄດ້ຈາກສ່ວຍສາອາກອນຂອງວິສາຫະກິດທຶນຕ່າງປະເທດບັນລຸເຖິງ 11400 ຕື້ກວ່າຢວນ, ກວມ 19,3% ຂອງຍອດມູນຄ່າສ່ວຍສາອາກອນໃນທົ່ວປະເທດ, ໄດ້ສ້າງວຽກເຮັດງານທຳໃຫ້ແກ່ປະຊາຊົນ 40 ລ້ານກວ່າຄົນທັງໃນຕົວເມືອງແລະຊົນນະບົດ.
ທ່ານຈົ່ງຊາງຊິງ ຫົວໜ້າກົມການລົງທຶນຕ່າງປະເທດຂອງກະຊວງການຄ້າຈີນກ່າວວ່າ, ໃນແຜນການດຶງດູດການລົງທຶນຂອງຕ່າງປະເທດໃນໄລຍະປະຕິບັດແຜນພັດທະນາເສດຖະກິດສັງຄົມ 5 ປີຄັ້ງທີ 14 ກະຊວງການຄ້າຈີນຈະເລັ່ງລັດສ້າງລະບົບແລະລະບຽບການຄຸ້ມຄອງທຶນຕ່າງປະເທດທີ່ສອດຄ່ອງກັບກົດໝາຍວ່າດ້ວຍການລົງທຶນຂອງຕ່າງປະເທດສະບັບໃໝ່, ມອບສິດໃນດ້ານການປະຕິຮູບໃຫ້ເຂດທົດລອງການຄ້າເສລີໃຫ້ຫຼາຍກວ່າເກົ່າ, ຊຸກຍູ້ການສ້າງທ່າການຄ້າເສລີໄຫຫຼຳຢ່າງໜັກແໜ້ນ, ສ້າງຈຸດເຕີບໂຕໃໝ່ໃຫ້ແກ່ການເປີດປະຕູສູ່ພາຍນອກ.