ວັນທີ 8 ພະຈິກນີ້, ກອງປະຊຸມຖະແຫຼງຂ່າວຂອງງານວາງສະແດງສິນຄ້ານຳເຂົ້າສາກົນຈີນຄັ້ງທີ 3 ໄດ້ໃຫ້ຮູ້ວ່າ: ມາຮອດຕອນຄ່ຳວັນທີ 7 ພະຈິກນີ້, ງານສົນທະນາດ້ານການຄ້າການລົງທຶນຂອງງານວາງສະແດງສິນຄ້ານຳເຂົ້າສາກົນຈີນຄັ້ງທີ 3 ໄດ້ດຶງດູດຜູ້ເຂົ້າຮ່ວມວາງສະແດງ 674 ແຫ່ງ ແລະຜູ້ຈັດຊື້ 1351 ແຫ່ງທີ່ມາຈາກ 64 ປະເທດແລະເຂດແຄ້ວນມາເຂົ້າຮ່ວມງານວາງສະແດງທາງອອນລາຍແລະອອຟລາຍ, ໄດ້ບັນລຸສັນຍາເຈດຈຳນົງການຮ່ວມມື 861 ລາຍການ.
ທ່ານ ຂົງຟູອ່ານ, ຮອງຫົວໜ້າອົງການວາງສະແດງສິນຄ້ານຳເຂົ້າສາກົນຈີນໄດ້ແນະນຳໃຫ້ຮູ້ວ່າ, ໃນງານວາງສະແດງເທື່ອນີ້, ມີຜະລິດຕະພັນໃໝ່, ເຕັກນິກໃໝ່ ແລະການບໍລິການໃໝ່ ຫຼາຍຮ້ອຍຢ່າງໄດ້ນຳມາສະເໜີເປັນຄັ້ງທຳອິດໃນໂລກ, ເປັນຄັ້ງທຳອິດຢູ່ອາຊີແລະຈີນ. ໃນນັ້ນ, ມີຫຼາຍກວ່າເຄິ່ງໜຶ່ງແມ່ນນຳສະເໜີເປັນຄັ້ງທຳອິດຂອງໂລກ.
ພາຍໃຕ້ສະພາບການທີ່ພະຍາດໂຄວິດ-19 ແຜ່ລະບາດ, ວິສາຫະກິດທົ່ວໂລກໄດ້ເຫັນໄປໃນແງ່ດີຕໍ່ຕະຫຼາດຈີນ, ໄດ້ຕັ້ງໜ້າເຂົ້າຮ່ວມງານວາງສະແດງສິນຄ້ານຳເຂົ້າຈີນ. ໃນຈຳນວນວິສາຫະກິດຫຼາຍພັນແຫ່ງທີ່ມາຈາກປະເທດຕ່າງໆໃນໂລກນັ້ນ, ຈຳນວນວິສາຫະກິດຂອງຍີ່ປຸ່ນແມ່ນຫຼາຍທີ່ສຸດ, ສ່ວນເນື້ອທີ່ວາງສະແດງຂອງວິສາຫະກິດອາເມຣິກາພັດກວ້າງກວ່າໝູ່. ນອກນີ້, ຍັງມີວິສາຫະກິດຊັ້ນນຳຂອງໂລກ 500 ກວ່າແຫ່ງທີ່ມາຈາກ 47 ປະເທດແລະເຂດແຄ້ວນ ທີ່ລຽບຕາມ “ໜຶ່ງເລວໜຶ່ງເສັ້ນທາງ” ໄດ້ມາເຂົ້າຮ່ວມງານດັ່ງກ່າວແລະມີເນື້ອທີ່ວາງສະແດງເກືອບ 4 ໝື່ນຕາແມັດ.