ວັນທີ 10 ພະຈິກນີ້, ທ່ານສີຈີ້ນຜິງ, ປະທານປະເທດຈີນ ໄດ້ສົ່ງ ສານຊົມເຊີຍເຖິງກອງປະຊຸມເວທີປຶກສາຫາລືດ້ານວິທະຍາສາດ, ເຕັກໂນໂລຊີແລະການປະດິດສ້າງໃໝ່ສາກົນ ຄັ້ງທຳອິດໃນຂອບເວທີປຶກສາຫາລືອາຊີໂປອາວ.
ທ່ານສີຈີ້ນຜິງກ່າວວ່າ, ໃນໂລກປັດຈຸບັນ, ການປະຕິວັດດ້ານເຕັກນິກວິທະຍາສາດແລະການປ່ຽນແປງດ້ານອຸດສາຫະກຳຮອບໃໝ່ຍັງບໍ່ທັນສິ້ນສຸດລົງເທື່ອ, ແຕ່ໄດ້ນຳເອົາການປ່ຽນແປງອັນເລິກເຊິ່ງມາສູ່ການພັດທະນາຂອງມວນມະນຸດ, ເຊິ່ງໄດ້ສະໜອງຊ່ອງທາງໃໝ່ໃຫ້ແກ່ການແກ້ໄຂແລະຮັບມືກັບບັນຫາຫຍຸ້ງຍາກແລະສິ່ງທ້າທາຍແຫ່ງການພັດທະນາທີ່ມີລັກສະນະທົ່ວໂລກ.
ທ່ານສີຈີ້ນຜິງກ່າວເນັ້ນວ່າ, ເຕັກນິກວິທະຍາສາດຄວນສ້າງຄວາມສຸກໃຫ້ແກ່ມວນມະນຸດ. ປັດຈຸບັນ, ທົ່ວໂລກພວມຜະເຊີນໜ້າກັບສິ່ງທ້າທາຍຕ່າງໆ ເຊັ່ນ: ການແຜ່ລະບາດຂອງພະຍາດໂຄວິດ-19 ແລະອື່ນໆ. ຈີນຍິນດີຮ່ວມກັນກັບປະເທດຕ່າງໆໃນໂລກ, ເພີ່ມທະວີການປະດິດສ້າງໃໝ່ແລະການຮ່ວມມືດ້ານເຕັກນິກວິທະຍາສາດ, ຊຸກຍູ້ການແລກປ່ຽນກັບປະເທດຕ່າງໆໃນດ້ານວິທະຍາສາດເຕັກໂນໂລຊີແລະການປະດິດສ້າງໃໝ່ ທີ່ເປີດກວ້າງແລະກວມລວມກວ່າເກົ່າ ຕ່າງຝ່າຍຕ່າງມີຜົນປະໂຫຍດແລະຊົມໃຊ້ຮ່ວມກັນ, ເພື່ອເປັນການປະກອບສ່ວນເຂົ້າໃນການຊຸກຍູ້ໃຫ້ເສດຖະກິດໂລກສາມາດຟື້ນຄືນໃໝ່ທັງເປັນການຮັບປະກັນສຸຂະພາບຂອງປະຊາຊົນ. ເວທີປຶກສາຫາລືອາຊີໂປອາວແລະອົງການປົກຄອງເຂດພິເສດມາກາວ ໄດ້ຮ່ວມກັນຈັດກອງປະຊຸມວິທະຍາສາດ, ເຕັກໂນໂລຊີແລະການປະດິດສ້າງໃໝ່ສາກົນ, ເປັນການຈັດເວທີສຳຄັນເພື່ອດຳເນີນການແລກປ່ຽນແລະການຮ່ວມມືໃນດ້ານ ວິທະຍາສາດ, ເຕັກໂນໂລຊີແລະການປະດິດສ້າງໃໝ່ຂອງໂລກ.