ໃນກອງປະຊຸມຊັບພະຍາກອນພື້ນຖານອິນເຕີເນັດຈີນຄັ້ງທີ 2 ທີ່ຈັດຂຶ້ນໃນຫວ່າງມໍ່ໆມານີ້, ທ່ານຢາງສຽວເວີຍ ຮອງຫົວໜ້າຫ້ອງການຂໍ້ມູນຂ່າວສານອິນເຕີເນັດແຫ່ງຊາດຈີນກ່າວວ່າ: ໃນໄລຍະປະຕິບັດ “ແຜນການ 5 ປີຄັ້ງທີ 13”ຂອງຈີນ, ພາລະກິດຂໍ້ມູນຂ່າວສານອິນເຕີເນັດຂອງຈີນໄດ້ພັດທະນາຢ່າງວ່ອງໄວ ແລະ ປະສົບຜົນສຳເລັດທີ່ອຸດົມສົມບູນ; ຂະໜາດເສດຖະກິດດີຈີຕອນໄດ້ເພີ່ມຂຶ້ນຈາກ 11.000 ຕື້ຢວນໃນຕົ້ນໄລຍະຂອງການປະຕິບັດ “ແຜນການ 5 ປີຄັ້ງທີ 13” ເປັນ 35.800 ຕື້ຢວນໃນປີ 2019, ໄດ້ກວມເອົາ 36% ຂອງ GDP ຂອງຈີນ ແລະ ມີອັດຕາປະກອບສ່ວນຕໍ່ GDP ສູງເຖິງ 67,7%. ໃນໄລຍະ 5 ປີດັ່ງກ່າວ, ຂະແໜງການຊັບພະຍາກອນພື້ນຖານຂອງອິນເຕີເນັດຈີນໄດ້ບັນລຸການພັດທະນາແບບກ້າວກະໂດດຂັ້ນ, ຈຳນວນຜູ້ໃຊ້ອິນເຕີເນັດໄດ້ເພີ່ມຂຶ້ນຈາກ 688 ລ້ານຄົນໃນປີ 2016 ເປັນ 940 ລ້ານຄົນໃນປີ 2020, ອັດຕາການຂະຫາຍການນຳໃຊ້ອິນເຕີເນັດໃຫ້ທົ່ວເຖິງໄດ້ເພີ່ມຂຶ້ນຈາກ 50,3% ເປັນ 67% ແລະ ໄດ້ລື່ນກາຍລະດັບສະເລ່ຍຂອງທົ່ວໂລກ. ຈຳນວນຊື່ເຂດອິນເຕີເນັດລະດັບຊາດຈີນທີ່ລົງທ້າຍດ້ວຍ “.CN” ມີຫຼາຍກວ່າ 23 ລ້ານເຂດ, ຊັບພະຍາກອນພື້ນຖານອິນເຕີເນັດໄດ້ເສີມຂະຫຍາຍບົດບາດທີ່ພົ້ນເດັ່ນກວ່າເກົ່າຕໍ່ພື້ນຖານເສດຖະກິດດີຈີຕອນ.