ຈີນຈະຊຸກຍູ້ໃຫ້ແລວເສດຖະກິດແມ່ນ້ຳຢາງເຊເປີດປະຕູສູ່ພາຍນອກໃນລະດັບສູງກວ່າເກົ່າ
ວັນທີ 14 ພະຈິກນີ້, ທ່ານສີຈິ້ນຜິງ ປະທານປະເທດຈີນໄດ້ເປັນປະທານກອງປະຊຸມສຳມະນາກ່ຽວກັບການຊຸກຍູ້ການພັດທະນາແລວເສດຖະກິດແມ່ນ້ຳຢາງເຊຢ່າງຮອບດ້ານຢູ່ນະຄອນນານກິ່ງ ແຂວງຈ່ຽງຊູ່ທີ່ຕັ້ງຢູ່ຍ່ານໃຕ້ຂອງແມ່ນ້ຳຢາງເຊ. ນີ້ແມ່ນກອງປະຊຸມສຳມະນາຄັ້ງທີ3 ທີ່ທ່ານສີຈິ້ນຜິງຈັດຂຶ້ນໃນຮອບ 5 ປີຜ່ານມາເພື່ອພັດທະນາແລວເສດຖະກິດແມ່ນ້ຳຢາງເຊ. ທ່ານກ່າວເນັ້ນວ່າ: ແຂວງ ແລະກຳແພງນະຄອນທີ່ຢູ່ລຽບຕາມແມ່ນ້ຳຢາງເຊຕ້ອງກຳນົດຖານະບົດບາດຂອງຕົນໃຫ້ແນ່ນອນໃນສະພາບການພັດທະນາອັນໃໝ່ທີ່ຖືຮອບໝູນວຽນພາຍໃນປະເທດແລະສາກົນຊ່ວຍຊູຍູ້ໜູນກັນ, ເປັນເຈົ້າການເປີດກວ້າງຕະຫຼາດສູ່ໂລກ.
ແລວເສດຖະກິດແມ່ນ້ຳຢາງເຊກວມເອົາ 11 ແຂວງແລະກຳແພງນະຄອນ, ມີປະຊາກອນແລະ ລວມຍອດຜະລິດຕະພັນພາຍໃນກວມເອົາປະມານເຄິ່ງໜຶ່ງຂອງທົ່ວປະເທດ, ແມ່ນສູນກາງທາງດ້ານເສດຖະກິດທີ່ສຳຄັນຂອງຈີນທີ່ເຕັມໄປດ້ວຍຄວາມມີຊີວິດຊີວາ, ທັງເປັນເຂດເຊື່ອມຈອດກັນທີ່ສຳຄັນຂອງ “ໜຶ່ງແລວໜຶ່ງເສັ້ນທາງ”ຢູ່ພາຍໃນປະເທດຈີນ.
ທ່ານສີຈິ້ນຜິງກ່າວເນັ້ນວ່າ, ແຂວງແລະ ກຳແພງນະຄອນທີ່ຢູ່ລຽບຕາມແມ່ນ້ຳຢາງເຊຕ້ອງປະສານສົມທົບການເປີດປະຕູສູ່ພາຍນອກກັບເຂດແຄມທະເລ,ເຂດຊາຍແດນ ແລະເຂດດ້ານໃນinland, ເລັ່ງລັດການສ້າງຈຸດຍຸດທະສາດດ້ານການເປີດປະຕູສູ່ພາຍນອກຢູ່ເຂດດ້ານໃນໃຫ້ຫຼາຍກວ່າເກົ່າ, ຍົກສູງລະດັບການເປີດປະຕູສູ່ພາຍນອກຂອງເຂດຊາຍແດນ, ເພື່ອໃຫ້ບັນລຸການນຳເຂົ້າທີ່ມີຄຸນນະພາບສູງແລະກ້າວສູ່ໂລກໃນລະດັບສູງ, ຊຸກຍູ້ການພັດທະນາແບບປະດິດສ້າງໃໝ່ໃນດ້ານການຄ້າ, ດຶງດູດການລົງທຶນຂອງຕ່າງປະເທດໃຫ້ມີຄຸນນະພາບສູງກວ່າເກົ່າ. ຕ້ອງຊຸກຍູ້ການພັດທະນາແລວເສດຖະກິດແມ່ນ້ຳຢາງເຊໃຫ້ສາມາດເຊື່ອມໂຍງກັບການສ້າງ “ໜຶ່ງແລວໜຶ່ງເສັ້ນທາງ” ຮ່ວມກັນ, ເລັ່ງລັດການສ້າງຈຸດຍຸດທະສາດທີ່ຄ້ຳຊູ “ໜຶ່ງແລວໜຶ່ງເສັ້ນທາງ” ຕາມແລວເສດຖະກິດແມ່ນ້ຳຢາງເຊ, ເປີດກວ້າງການລົງທຶນແລະການຄ້າ, ຊຸກຍູ້ການແລກປ່ຽນວັດທະນະທຳແລະ ການເຊື່ອມໂຍງຈິດໃຈຂອງປະຊາຊົນ.