ທ່ານສີຈິ້ນຜິງ ເຂົ້າຮ່ວມກອງປະຊຸມສຸດຍອດປະເທດບຣິກສ໌ຄັ້ງທີ 12 ແລະກ່າວຄຳປາໄສສຳຄັນ
ຕອນຄ່ຳວັນທີ 17 ພະຈິກນີ້, ກອງປະຊຸມສຸດຍອດປະເທດບຣິກສ໌ຄັ້ງທີ 12 ໄດ້ຈັດຂຶ້ນຜ່ານທາງວິດີໂອ. ທ່ານວະລາດີເມຍ ປູຕິນ ປະທານາທິບໍດີຣັດເຊຍໄດ້ເປັນປະທານກອງປະຊຸມ, ທ່ານສີຈິ້ນຜິງ ປະທານປະເທດຈີນ, ທ່ານນະເຣັນດຣາ ໂມດີ ນາຍົກລັດຖະມົນຕີອິນເດຍ, ທ່ານຊິຣີນ ຣາມາໂຟຊາ ປະທານາທິບໍດີອາຟຣິກາໃຕ້ແລະທ່ານເຈຍ ໂບນໂຊນາໂຣ ປະທານາທິບໍດີບຣາຊິນໄດ້ເຂົ້າຮ່ວມກອງປະຊຸມດັ່ງກ່າວ.
ທ່ານສີຈິ້ນຜິງ ປະທານປະເທດຈີນໄດ້ກ່າວຄຳປາໄສໃນຫົວຂໍ້ “ເຝົ້າລະວັງແລະຊ່ວຍເຫຼືອເຊິ່ງກັນແລະກັນເພື່ອຜ່ານຜ່າການແຜ່ລະບາດຂອງພະຍາດແລະສາມັກຄີເປັນຈິດໜຶ່ງໃຈດຽວກັນເພື່ອຊຸກຍູ້ການຮ່ວມມື”, ໂດຍໄດ້ເນັ້ນໜັກວ່າ 5 ປະເທດບຣິກສ໌ ຄວນຍຶດໝັ້ນໃນລັດທິຫຼາຍຝ່າຍ, ສາມັກຄີແລະປະສານສົມທົບກັນ, ເປີດປະຕູສູ່ພາຍນອກແລະປະດິດສ້າງໃໝ່, ຖືເອົາຊີວິດການເປັນຢູ່ຂອງປະຊາຊົນເປັນບູລິມະສິດ, ອະນຸລັກສິ່ງແວດລ້ອມແລະຫຼຸດການລະບາຍກາກບອນດີອົກຊິດ, ຊ່ວຍເຫຼືອເຊິ່ງກັນແລະກັນ, ສາມັກຄີເປັນຈິດໜຶ່ງໃຈດຽວກັນເພື່ອຊຸກຍູ້ການຮ່ວມມື. ກອງປະຊຸມໄດ້ຜ່ານການຮັບຮອງ “ຖະແຫຼງການມົສກູກ່ຽວກັບກອງປະຊຸມສຸດຍອດປະເທດບຣິກສ໌ຄັ້ງທີ 12”
ຜູ້ນຳ 5 ປະເທດໄດ້ປຶກສາຫາລືກັນໂດຍປິ່ນອ້ອມຫົວຂໍ້ “ລົງເລິກການພົວພັນຄູ່ຮ່ວມມືປະເທດບຣິກສ໌, ຊຸກຍູ້ການສ້າງສະຖຽນລະພາບຄວາມປອດໄພຮ່ວມກັນແລະການເຕີບໂຕດ້ວຍການປະດິດສ້າງໃໝ່ຂອງໂລກ” ຮ່ວມກັນປຶກສາຫາລືແຜນການຮ່ວມມືເພື່ອຕ້ານກັບການແຜ່ລະບາດຂອງພະຍາດໂຄວິດ-19, ຮ່ວມກັນວາງແຜນພັດທະນາປະເທດບຣິກສ໌, ແລກປ່ຽນຄວາມຄິດເຫັນຢ່າງເລິກເຊິ່ງກ່ຽວກັບການຮ່ວມມືລະຫວ່າງປະເທດບຣິກສ໌ແລະສະຖານະການສາກົນໃນປັດຈຸບັນ, ກອງປະຊຸມໄດ້ກ້າວເຖິງຂັ້ນມີຄວາມເຫັນເປັນເອກະພາບຢ່າງກວ້າງຂວາງ.