ຕອນຄ່ຳວັນທີ 21 ພະຈິກນີ້, ໃນເວລາເຂົ້າຮ່ວມກອງປະຊຸມສຸດຍອດກຸ່ມ 20 ປະເທດ ຫຼື G20 ຄັ້ງທີ 15 ດ້ວຍຮູບແບບຜ່ານທາງວິດີໂອ, ທ່ານສີຈິ້ນຜິງ ປະທານປະເທດຈີນໄດ້ສະເໜີໃຫ້ປະຊາຄົມໂລກສ້າງກົນໄກຮັບຮອງ QR-Code ສຸຂະພາບສາກົນນຳກັນ ບົນພື້ນຖານຜົນການກວດນິວຄະເລອິກ ແລະ ຫວັງວ່າຈະມີຫຼາຍປະເທດເຂົ້າຮ່ວມກົນໄກດັ່ງກ່າວ.
ຄືກັນກັບການໃສ່ຜ້າປິດປາກທີ່ສາມາດປ້ອງກັນການແຜ່ລະບາດຂອງເຊື້ອພະຍາດໂຄວິດ-19 ໄດ້, ຈີນໄດ້ນຳໜ້າໝູ່ໃນການນຳໃຊ້ QR-Code ສຸຂະພາບ ແລະ ໄດ້ພິສູດໃຫ້ເຫັນແລ້ວວ່າ: QR-Code ສຸຂະພາບເປັນມາດຕະການທີ່ບັງເກີດຜົນ. ການສ້າງກົນໄກຮັບຮອງ QR-Code ສຸຂະພາບສາກົນ, ຈະສາມາດຊຸກຍູ້ການແລກປ່ຽນບຸກຄະລາກອນລະຫວ່າງປະເທດໄດ້ດີກວ່າເກົ່າ, ສາມາດຈຳກັດຜູ້ໂດຍສານທີ່ເຄີຍໄດ້ໃກ້ຊິດກັບຜູ້ເປັນພະຍາດໂຄວິດ-19 ແຕ່ຍັງບໍ່ທັນມີອາການພະຍາດດັ່ງກ່າວ.
ນັບແຕ່ເກີດມີການແຜ່ລະບາດຂອງພະຍາດໂຄວິດ-19 ເປັນຕົ້ນມາ, ລັດຖະບານຈີນໄດ້ຄວບຄຸມການແຜ່ລະບາດຂອງພະຍາດໄດ້ໄວທີ່ສຸດ. ອົງການອະນາໄມໂລກກ່າວວ່າ: ມີຫຼັກຖານສະແດງໃຫ້ເຫັນວ່າ: ເຊື້ອພະຍາດໂຄວິດ-19 ໄດ້ແຜ່ລະບາດຢູ່ຈີນໃນລະດັບຕ່ຳທີ່ສຸດ. ສິ່ງທີ່ເກີດຂຶ້ນກົງກັນຂ້າມກັບຢູ່ປະເທດຈີນນັ້ນກໍແມ່ນ ຕົວເລກຂໍ້ມູນທີ່ອົງການອະນາໄມໂລກເປີດເຜີຍໃນວັນທີ 22 ພະຈິກນີ້ສະແດງໃຫ້ເຫັນວ່າ: ນັບລວມແລ້ວ, ຜູ້ຖືກບົ່ງມະຕິເປັນພະຍາດໂຄວິດ-19 ໃນຂອບເຂດທົ່ວໂລກມີເຖິງ 57.882.183 ກໍລະນີ ເຊິ່ງເພີ່ມໃໝ່ 604.943 ກໍລະນີ ເມື່ອທຽບໃສ່ວັນທີ 21 ພະຈິກ ແລະ ມີຜູ້ເສຍຊີວິດຍ້ອນເປັນພະຍາດດັ່ງກ່າວໄດ້ເພີ່ມໃໝ່ 9.237 ຄົນ.
ເມື່ອຫວນຄືນປະຫວັດສາດດ້ານເສດຖະກິດການຄ້າສາກົນແລ້ວເຫັນວ່າ: “ຖ້າມີການໄປມາຫາສູ່ກັນກໍຈະມີການພັດທະນາຮ່ວມກັນ ແລະ ຖ້າບໍ່ໄປມາຫາສູ່ກັນດ້ວຍການປິດກັ້ນບໍຈະຖອຍຄືນຫຼັງ”, ການພັດທະນາຂອງຈີນບໍ່ສາມາດຕັດແຍກອອກຈາກການພັດທະນາຂອງໂລກໄດ້, ຄວາມຈະເລີນຮຸ່ງເຮືອງຂອງໂລກກໍຈະບໍ່ສາມາດປາສະຈາກການພັດທະນາຂອງຈີນໄດ້ເຊັ່ນກັນ. ມີແຕ່ປະເທດຕ່າງໆສາມາດຫຼຸດພົ້ນອອກຈາກສະພາບຄວາມຫຍຸ້ງຍາກໃນປັດຈຸບັນ, ໂລກຈິ່ງຈະສາມາດຟື້ນຟູການພັດທະນາໄດ້.
ຫວ່າງມໍ່ໆມານີ້, ອີງຕາມຄວາມເຫັນທີ່ເປັນເອກະພາບກັນລະຫວ່າງຈີນແລະລາວ ໃນໄລຍະທີ່ທ່ານວາງຢີ້ ທີ່ປຶກສາແຫ່ງລັດ ທັງເປັນລັດຖະມົນຕີກະຊວງການຕ່າງປະເທດຈີນໄດ້ເດີນທາງໄປຢ້ຽມຢາມ ສປປ ລາວ, ສອງຝ່າຍລາວ-ຈີນ ໄດ້ຕົກລົງເປີດ “ຊ່ອງທາງສະດວກ” ແກ່ກັນ. ເວົ້າສຳລັບວິສາຫະກິດ ແລະ ບຸກຄົນທີ່ມີຄວາມຈຳເປັນໃນການປະຕິບັດໜ້າທີ່ອັນຮີບດ່ວນ ແລະ ສອດຄ່ອງກັບເງື່ອນໄຂທີ່ກ່ຽວຂ້ອງ, ຖ້າມີໃບຢັ້ງຢືນຜົນການກວດນິວຄະເລອິກພະຍາດໂຄວິດ-19 ທີ່ເປັນຜົນລົບ, ກໍສາມາດເຂົ້າອອກເມືອງຂອງສອງປະເທດໄດ້ຢ່າງສະດວກ ໂດຍອີງຕາມມາດຕະການປ້ອງກັນແລະຄວບຄຸມພະຍາດຂອງສອງປະເທດ, ນີ້ກໍແມ່ນພຶດຕິກຳເບື້ອງຕົ້ນທີ່ຈີນແລະລາວນຳໜ້າໝູ່ໃນການປະຕິບັດ QR-Code ສຸຂະພາບສາກົນ.
ຍ້ອນວ່າຈີນໄດ້ປ້ອງກັນແລະຄວບຄຸມພະຍາດຢ່າງເປັນປົກກະຕິ, ພະຍາດໂຄວິດ-19 ບໍ່ໄດ້ແຜ່ລະບາດຢູ່ປະເທດຈີນຢ່າງຂະໜາດໃຫຍ່ອີກ, ໃນນັ້ນ, ສິ່ງທີ່ສຳຄັນຢ່າງໜຶ່ງກໍແມ່ນຍ້ອນວ່າ ຈີນໄດ້ປະຕິບັດກົນໄກ QR-Code ສຸຂະພາບຢູ່ພາຍໃນປະເທດຕົນ. ຂໍ້ສະເໜີຂອງທ່ານປະທານສີຈິ້ນຜິງໃນການສ້າງກົນໄກຮັບຮອງ QR-Code ສຸຂະພາບສາກົນນຳກັນ, ກໍແມ່ນການເຜີຍແຜ່ມາດຕະການ ແລະ ບົດຮຽນຂອງຈີນໃນການປ້ອງກັນແລະຄວບຄຸມພະຍາດໃຫ້ກັບປະຊາຄົມໂລກ ເຊິ່ງມີຈຸດປະສົງຊ່ວຍປະເທດຕ່າງໆໃນໂລກເດີນອອກຈາກເງົາມືດຂອງພະຍາດດັ່ງກ່າວ ເພືອ່ໃຫ້ສາມາດຟື້ນຟູການຜະລິດ ແລະ ຊີວິດການເປັນຢູ່ຄືນສູ່ປົກກະຕິໂດຍໄວ. ໂດຍຜະເຊີນໜ້າກັບສິ່ງທ້າທາຍຕ່າງໆນາໆຈາກການແຜ່ລະບາດຂອງພະຍາດໂຄວິດ-19, ຈີນຈະພະຍາຍາມຮ່ວມກັບຝ່າຍຕ່າງໆ ເພື່ອນຳເອົາຄວາມຫວັງ ແລະ ຄວາມໝັ້ນໃຈໃນການປ້ອງກັນແລະຄວບຄຸມການແຜ່ລະບາດຂອງພະຍາດມາໃຫ້ປະຊາຊົນໃນຂອບເຂດທົ່ວໂລກ.