ວັນທີ 23 ພະຈິກນີ້, ເວທີປຶກສາຫາລືການພັດທະນາອິນເຕີເນັດຂອງກອງປະຊຸມໃຫຍ່ອິນເຕີເນັດໂລກໄດ້ຈັດຂຶ້ນຢູ່ເມືອງອູ່ເຈິ້ນແຂວງເຈີ້ຈ່ຽງ. ທ່ານສີຈິ້ນຜິງ ປະທານປະເທດຈີນໄດ້ສົ່ງສານຊົມເຊີຍເຖິງເວທີປຶກສາຫາລືດັ່ງກ່າວ.
ໃນສານຊົມເຊີຍ, ທ່ານສີຈິ້ນຜິງກ່າວວ່າ: ໃນໂລກປັດຈຸບັນນີ້, ການປະຕິວັດດ້ານວິທະຍາສາດ-ເຕັກໂນໂລຊີ ແລະການປ່ຽນແປງໃໝ່ຂອງອຸດສາຫະກຳຮອບໃໝ່ຍັງສືບຕໍ່ດຳເນີນຢ່າງບໍ່ຢຸດຢັ້ງ ເຊິ່ງໄດ້ຊຸກຍູ້ການພັດທະນາດ້ານເຕັກໂນໂລຊີດີຈີຕອນຢ່າງວ່ອງໄວ. ນັບແຕ່ເກີດການແຜ່ລະບາດຂອງພະຍາດໂຄວິດ-19 ເປັນຕົ້ນມາ, ການປິ່ນປົວທາງໄກ, ການສຶກສາອອນລາຍ, ເວທີແບ່ງປັນຂໍ້ມູນຂ່າວສານ, ການປະສານງານທາງອອນລາຍ ແລະອື່ນໆດີຈີຕອນໄດ້ຖືກນຳໃຊ້ຢ່າງກວ້າງຂວາງ, ອິນເຕີເນັດໄດ້ເສີມຂະຫຍາຍບົດບາດທີ່ສຳຄັນເຂົ້າໃນການຊຸກຍູ້ການຟື້ນຟູເສດຖະກິດ, ຮັບປະກັນການດຳເນີນງານທາງສັງຄົມ ແລະຊຸກຍູ້ການຮ່ວມມືຕ້ານກັບພະຍາດຂອງບັນດາປະເທດ.
ທ່ານສີຈິ້ນຜິງກ່າວເນັ້ນວ່າ: ຈີນຍິນດີຮ່ວມກັບບັນດາປະເທດ, ກຳແໜ້ນໂອກາດທາງປະຫວັດສາດໃນການປະຕິວັດຂໍ້ມູນຂ່າວສານ, ສ້າງແຮງຂັບເຄື່ອນການພັດທະນາດ້ວຍການປະດິດສ້າງໃໝ່, ສ້າງສະພາບການໃໝ່ໃຫ້ກັບການຮ່ວມມືດ້ານດີຈີຕອນ, ສ້າງສະພາບການໃໝ່ດ້ານຄວາມປອດໄພທາງອິນເຕີເນັດ, ສ້າງປະຊາຄົມຮ່ວມຊາຕາກຳອິນເຕີເນັດ ແລະຮ່ວມມືກັນສ້າງອະນາຄົດຂອງມວນມະນຸດທີ່ດີງາມກວ່າເກົ່າ.