ທ່ານສີຈິ້ນຜິງກ່າວຄຳປາໄສໃນພິທີເປີດງານວາງສະແດງສິນຄ້າຈີນ-ອາຊຽນ ແລະ ກອງປະຊຸມສຸດຍອດການຄ້າ ແລະ ການລົງທຶນຈີນ-ອາຊຽນຄັ້ງທີ 27
ວັນທີ 27 ພະຈິກນີ້, ທ່ານສີຈິ້ນຜິງ ປະທານປະເທດຈີນໄດ້ກ່າວຄຳປາໄສໃນພິທີເປີດ ງານວາງສະແດງສິນຄ້າຈີນ-ອາຊຽນ ແລະ ກອງປະຊຸມສຸດຍອດການຄ້າ ແລະ ການລົງທຶນຈີນ-ອາຊຽນຄັ້ງທີ 27.
ທ່ານສີຈິ້ນຜິງກ່າວວ່າ: “ປີ2013, ຂ້າພະເຈົ້າໄດ້ສະເໜີວ່າ ຈີນຍິນດີຮ່ວມກັບບັນດາປະເທດອາຊຽນສ້າງເສັ້ນທາງສາຍໄໝທາງທະເລໃນສັດຕະວັດທີ 21 ແລະຮ່ວມກັນສ້າງປະຊາຄົມຮ່ວມຊາຕາກຳຈີນ-ອາຊຽນທີ່ແໜ້ນແຟ້ນກວ່າເກົ່າ. ພວກເຮົາມີຄວາມປິຕິຊົມຊື່ນທີ່ເຫັນວ່າ ໃນໄລຍະ 7 ປີຜ່ານມາ,ການເຊື່ອໂຍງເຊື່ອມຈອດກັນລະຫວ່າງສອງຝ່າຍໄດ້ເລັ່ງລັດໃຫ້ໄວຂຶ້ນຢ່າງບໍ່ຢຸດຢັ້ງ, ການເຊື່ອໂຍງດ້ານເສດຖະກິດໄດ້ກ້າວສູ່ລວງເຊິກຢ່າງຕໍ່ເນື່ອງ, ການຮ່ວມມືດ້ານເສດຖະກິດການຄ້າກໍນັບມື້ນັບພັດທະນໄວຂຶ້ນ, ການແລກປ່ຽນດ້ານວັດທະນະທຳກໍນັບມື້ນັບແໜ້ນແຟ້ນຍິ່ງຂຶ້ນ, ການພົວພັນຈີນ-ອາຊຽນໄດ້ກາຍເປັນແບບຢ່າງທີ່ປະສົບຜົນສຳເລັດຫຼາຍກວ່າໝູ່ແລະມີຊີວິດຊີວາຫຼາຍກວ່າໝູ່ໃນດ້ານເສດຖະກິດຂອງພາກພື້ນອາຊີປາຊີຟິກ ແລະກາຍເປັນແບບຢ່າງທີ່ມີຊີວີດຊີວາໃນການຊຸກຍູ້ການສ້າງປະຊາຄົມຮ່ວມຊາຕາກຳຂອງມວນມະນຸດ. ” ເມື່ອຜະເຊີນໜ້າກັບການແຜ່ລະບາດຂອງພະຍາດໂຄວິດ-19, ສອງຝ່າຍໄດ້ຊ່ວຍເຫຼືອເຊິ່ງກັນແລະກັນ ຮ່ວມກັນຜ່ານຜ່າຄວາມຫຍຸ້ງຍາກ. ປະຈຸບັນ ໂລກພວມປະສົບກັບການປ່ຽນແປງອັນໃຫຍ່ຫຼວງແບບບໍ່ເຄີຍມີມາກ່ອນໃນຮອບຮ້ອຍປີຜ່ານມາ, ຊາຕາກຳຂອງປະຊາຊົນບັນດາປະເທດບໍ່ເຄີຍພົວພັນກັນຢ່າງໃກ້ຊິດຄືດັ່ງທຸກມື້ນີ້. ຈີນຖືເອົາອາຊຽນເປັນທິດທາງບູລິມະສິດໃນວຽກງານການຕ່າງປະເທດກັບປະເທດໃກ້ຄຽງແລະເປັນພາກພື້ນສຳຄັນໃນການຮ່ວມກັນສ້າງ “ໜຶ່ງແລວໜຶ່ງເສັ້ນທາງ”ດ້ວຍຄຸນນະພາບສູງ, ຈີນຍິນດີຮ່ວມກັບອາຊຽນຊຸກຍູ້ການຮ່ວມມືໃນຂົງເຂດຕ່າງໆ, ຮັກສາທ່ວງທ່າທີ່ດີໃນການພັດທະນາໃນພາກພື້ນນີ້, ສ້າງປະຊາຄົມຮ່ວມຊາຕາກຳຈີນ-ອາຊຽນທີ່ແໜ້ນແຟ້ນກວ່າເກົ່າ.
ທ່ານສີຈິ້ນຜິງໄດ້ສະເໜີຂໍ້ລິເລີ່ມ 4 ຂໍ້, ຄື:
ໜຶ່ງ, ຍົກສູງຄວາມໄວ້ເນື້ອເຊື່ອໃຈກັນດ້ານຍຸດທະສາດ, ລົງເລິກການເຊື່ອມຈອດແຜນແມ່ບົດການພັດທະນາ. ໂດຍອີງໃສ່ການສ້າງຊ່ອງທາງໃໝ່ທາງບົກ ແລະ ທາງທະເລ, ເພີ່ມທະວີການຮ່ວມມືໃນການເຊື່ອມຈອດພື້ນຖານໂຄງລ່າງ, ເລັ່ງລັດການຊຸກຍູ້ ການສ້າງແລວເສດຖະກິດ ແລະ ໂຄງການສຳຄັນທີ່ມີຢູ່ໃນປະຈຸບັນ, ຕັ້ງໜ້າສ້າງສະຫະພັນຂົນສົ່ງດ້ວຍຫຼາຍຮູບແບບລະຫວ່າງຈີນ-ອາຊຽນ. ປີໜ້າແມ່ນປີທີ່ຈີນ ແລະ ອາຊຽນສ້າງຕັ້ງສາຍພົວພັນຄູ່ເຈລະຈາຄົບຮອບ 30 ປີ, ຈີນຍິນດີຮ່ວມກັບອາຊຽນ, ສ້າງການພົວພັນຄູ່ຮ່ວມມືຍຸດທະສາດທີ່ມີລະດັບສູງກວ່າເກົ່າ.
ສອງ, ຍົກສູງລະດັບການຮ່ວມມືເສດຖະກິດການຄ້າ, ເລັ່ງລັດການຟື້ນຟູເສດຖະກິດຂອງພາກພື້ນຢ່າງຮອບດ້ານ. ປະຕິບັດສັນຍາການຄ້າເສລີຈີນ-ອາຊຽນໃຫ້ດີກວ່າເກົ່າ. ຈີນຫວັງວ່າ “ສັນຍາການພົວພັນຄູ່ຮ່ວມເສດຖະກິດຮອບດ້ານຂອງພາກພື້ນ” ຈະບັງເກີດຜົນໂດຍໄວ. ເພີ່ມທະວີຄວາມສະດວກດ້ານການຄ້າ ແລະ ສົ່ງເສີມການລົງທຶນ, ເປີດກວ້າງຕະຫຼາດໃຫ້ກັນແລະກັນ, ຊຸກຍູ້ການເຊື່ອມໂຍງຕ່ອງໂສ້ອຸດສາຫະກຳ ຕ່ອງໂສ້ການສະໜອງ ແລະ ຕ່ອງໂສ້ມູນຄ່າຢ່າງເລິກເຊິ່ງ. ພາຍໃຕ້ປະຖົມປັດໄຈທີ່ຮັບປະກັນການປ້ອງກັນ ແລະ ຄວບຄຸມພະຍາດ, ໃຊ້ມາດຕະການເພື່ອອຳນວຍຄວາມສະດວກໃຫ້ແກ່ການໄປມາຫາສູ່ກັນດ້ານບຸກຄະລາກອນ ແລະ ການຈໍລະຈອນສິນຄ້າ. ຊຸກຍູ້ການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ, ແລະການຮ່ວມມືລະຫວ່າງຈີນ-ເຂດເຕີບໂຕພາກຕາເວັນອອກຂອງອາຊຽນ.
ສາມ, ຍົກລະດັບການປະດິດສ້າງໃໝ່ດ້ານວິທະຍາສາດເຕັກນິກ, ລົງເລິກການຮ່ວມມືເສດຖະກິດດິຈີຕອນ. ສ້າງຈຸດພົ້ນເດັ່ນໃໝ່ດ້ານການຮ່ວມມືໃຫ້ຫຼາຍກວ່າເກົ່າໃນຂົງເຂດຕ່າງໆ, ເຊັ່ນ: ຕົວເມືອງອັດສະລິຍະ, 5G, ປັນຍາປະດິດ, ການຄ້າເອເລັກໂຕຼນິກ, ຂໍ້ມູນໃຫຍ່, ບຼອກເຊນ(Blockchain), ການປິ່ນປົວທາງໄກ ແລະອື່ນໆ, ເພີ່ມທະວີການປ້ອງກັນຄວາມປອດໄພດ້ານຂໍ້ມູນຂ່າວສານ ແລະ ການປະສານສົມທົບກັນດ້ານນະໂຍບາຍ. ສ້າງສູນຂໍ້ມູນຂ່າວສານຈີນ-ອາຊຽນ, ສ້າງ “ເສັ້ນທາງສາຍໄໝດິຈີຕອນ”.
ສີ່, ຍົກລະດັບການຮ່ວມມືໃນການຕ້ານກັບພະຍາດ, ເສີມສ້າງຄວາມສາມາດດ້ານສາທາລະນະສຸກ. ເພີ່ມທະວີການສົນທະນາກັນດ້ານນະໂຍບາຍ, ແບ່ງປັນຂໍ້ມູນຂ່າວສານ ແລະ ການຮ່ວມມືດ້ານຢາວັກຊີນ. ຈີນຈະພິຈາລະນາເຖິງຄວາມຕ້ອງການຂອງປະເທດອາຊຽນຢ່າງຕັ້ງໜ້າຫຼັງຈາກນຳໃຊ້ຢາວັກຊີນຕ້ານເຊື້ອພະຍາດໂຄວິດ-19ຢ່າງເປັນທາງການ, ໃຫ້ການສະໜັບສະໜູນດ້ານເງິນທຶນໃຫ້ແກ່ກອງທຶນຕ້ານພະຍາດອາຊຽນ, ອົບຮົມຜູ້ບໍລິຫານ ແລະ ວິຊາການດ້ານສາທາລະນະສຸກ 1000 ຄົນໃຫ້ແກ່ອາຊຽນ, ຮ່ວມກັນສ້າງສາງສະສົມອຸປະກອນການແພດເພື່ອຮັບມືສຸກເສີນ ແລະ ກົນໄກພົວພັນສຸກເສີນດ້ານສາທາລະນະສຸກ.
ທ່ານສີຈິ້ນຜິງກ່າວເນັ້ນວ່າ, ປີໜ້າຈີນຈະເປີດຂະບວນການໃໝ່ນັ້ນກໍຄືບັ້ນສ້າງສາປະເທດສັງຄົມນິຍົມທີ່ທັນສະໄໝຢ່າງຮອບດ້ານ. ຈີນຈະເດັດດ່ຽວເປີດກວ້າງການເປີດປະຕູສູ່ພາຍນອກ, ການຮ່ວມມືລະຫວ່າງຈີນ ແລະ ອາຊຽນຈະມີໂອກາດທີ່ກວ້າງຂວາງກວ່າເກົ່າ.