ການຮ່ວມມືທີ່ແທ້ຈິງລະຫວ່າງຈີນ-ລາວຊ່ວຍລາວໃນການເພີ່ມທະວີຄວາມສາມາດການພັດທະນາດ້ວຍຕົນເອງ
ວັນທີ 30 ພະຈິກນີ້, ພິທີເລີ່ມຜະລິດໄລຍະທີ 1 ຂອງໂຄງການອຸດສາຫະກຳເຄມີແລະນ້ຳມັນເຊື້ອໄຟລາວໄລຍະ 1 ໄດ້ຈັດຂຶ້ນຜ່ານທາງວິດີໂອຢູ່ທັງນະຄອນຫຼວງວຽງຈັນຂອງລາວແລະນະຄອນຄຸນໝິງຂອງຈີນ ໂດຍມີທ່ານ ຫວາງຢູໂປ່ ຮັກສາການເຈົ້າແຂວງຢຸນນານ ແລະ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີລາວແລະທ່ານອື່ນໆໄດ້ເຂົ້າຮ່ວມ, ທ່ານ ຈ່ຽງໄຈ້ຕຸ່ງ ເອກອັກຄະລັດຖະທູດຈີນປະຈຳລາວໄດ້ເຂົ້າຮ່ວມແລະກ່າວຄຳປາໄສໃນພິທີຢູ່ວຽງຈັນຕາມການເຊື້ອເຊີນ.
ໃນຖານະເປັນໂຮງງານກັ່ນນ້ຳມັນແຫ່ງທຳອິດຂອງລາວ, ໂຄງການອຸດສາຫະກຳເຄມີແລະນ້ຳມັນເຊື້ອໄຟລາວຈະລົງທຶນ 2 ຕື້ໂດລາສະຫະລັດຕາມລຳດັບແລະນຳໃຊ້ມາດຕະຖານລະດັບສາກົນ, ບັນລຸການພັດທະນາຄວາມສາມາດການຜະລິດຈາກ 1 ລ້ານໂຕນຕໍ່ປີໃນໄລຍະ 1 ເພີ່ມຂຶ້ນເປັນ 3 ລ້ານໂຕນຕໍ່ປີໃນໄລຍະ 3, ຊຸກຍູ້ການຜະລິດນ້ຳມັນເຊື້ອໄຟສຳເລັດຮູບຂອງລາວໃຫ້ບັນລຸການພັດທະນາແບບກ້າວກະໂດດຂັ້ນຄື: ຈາກ “ການຜະລິດພາຍໃນປະເທດຕົນ” ຮອດ “ການໃຊ້ວັດຖຸດິບຂອງປະເທດຕົນ” ຕະຫຼອດຮອດ “ການອາໄສບຸກຄະລາກອນຜູ້ມີຄວາມຮູ້ຄວາມສາມາດຂອງປະເທດຕົນ”. ແຕ່ນີ້ເປັນຕົ້ນໄປ, ລາວໄດ້ເລີ່ມມີນ້ຳມັນເຊື້ອໄຟສຳເລັດຮູບທີ່ຜະລິດພາຍໃນປະເທດຕົນ, ເຊິ່ງເປັນການຂຽນໜ້າທຳອິດໃນດ້ານອຸດສາຫະກຳນ້ຳມັນເຊື້ອໄຟຂອງລາວ, ແລະສິ້ນສຸດປະຫວັດສາດທີ່ອາໄສການນຳເຂົ້ານ້ຳມັນເຊື້ອໄຟສຳເລັດຮູບທັງໝົດ. ຂະນະດຽວກັນ, ອີງຕາມແຜນການພັດທະນາໂຄງການດັ່ງກ່າວ, ໃນ 3 ປີຕໍ່ໜ້າ, ພະນັກງານທ້ອງຖິ່ນຈະກວມເຖິງ 70%, ຈະສ້າງຕຳແໜ່ງວຽກເຮັດງານທຳ 2 ໝື່ນຕຳແໜ່ງຫຼັງຈາກສຳເລັດການພັດທະນາໂຄງການໄລຍະ 3 ແລ້ວ, ເຊິ່ງຈະອົບຮົມສ້າງຖັນແຖວພະນັກງານເຕັກນິກກອງໜຶ່ງທີ່ມີຄວາມຮູ້ວິທະຍາສາດດ້ານການກັ່ນນ້ຳມັນເຊື້ອໄຟແລະພະລັງງານທີ່ສະອາດ. ການຮ່ວມມືທີ່ມີການປະສານສົມທົບກັນທັງໃຫ້ການຊ່ວຍເຫຼືອທັງຊ່ວຍສ້າງຄວາມສາມາດຢ່າງແໜ້ນແຟ້ນແບບນີ້ຈະໜູນຊ່ວຍລາວຢວ່າງບາດກ້າວທີ່ໜັກແໜ້ນຢ່າງບໍ່ຢຸດຢັ້ງໃນຂະບວນການພັດທະນາດ້ວຍຄວາມສາມາດຂອງຕົນໂດຍບໍ່ຕ້ອງສົງໄສ, ພ້ອມກັນນັ້ນກໍ່ເປັນຂໍ້ຄິດທີ່ເປັນປະໂຫຍດຕໍ່ການສ້າງຄູ່ຮ່ວມຊາຕາກຳຈີນ-ລາວເຊັ່ນກັນ.
ປັດຈຸບັນ, ລາວພວມຢູ່ໃນໄລຍະທີ່ສຳຄັນຂອງການຫັນເປັນອຸດສາຫະກຳແລະທັນສະໄໝແຫ່ງຊາດ, ໃນຖານະເປັນປະເທດກະສິກຳທີ່ເປັນມູນເຊື້ອ, ໂດຍຜະເຊີນໜ້າກັບການປະຕິວັດວິທະຍາສາດເຕັກນິກແລະການປະຕິຮູບດ້ານອຸດສາຫະກຳທີ່ມີຂອບເຂດກວ້າງຂວາງກວ່າເກົ່າແລະລະດັບສູງກວ່າເກົ່າ,ການຍົກລະດັບວິທະຍາສາດເຕັກນິກໃຫ້ສູງຂຶ້ນ,ບົ່ມສ້າງຄວາມສາມາດດ້ານການປະດິດສ້າງໃໝ່ແລະປັບປຸງຕ່ອງໂສ້ອຸດສາຫະກຳໃຫ້ສົມບູນຂຶ້ນຢ່າງບໍ່ຢຸດຢັ້ງແມ່ນມີຄວາມສຳຄັນຫຼາຍ. ທ່ານ ທອງລຸນ ສີສຸລິດ ນາຍົກລັດຖະມົນຕີລາວໄດ້ກ່າວຄຳປາໄສທາງວິດີໂອໃນພິທີໄຂງານວາງສະແດງສິນຄ້າຈີນ-ອາຊຽນທີ່ຈັດຂຶ້ນໃນວັນທີ 27 ພະຈິກຜ່ານມານີ້ໂດຍໄດ້ຮຽກຮ້ອງຢ່າງແຮງໃຫ້ກະຕຸກຊຸກຍູ້ການແລກປ່ຽນແລະການໂອນເຕັກນິກທັນສະໄໝ. ໃນຖານະເປັນຄູ່ຮ່ວມຊາຕາກຳ, ຈີນແລະລາວຊຸກຍູ້ການປະຕິບັດຕົວຈິງຂອງການຮ່ວມມືດ້ານນ້ຳມັນເຊື້ອໄຟແຫ່ງຊາດລາວຈະເປັນການຍົກລະດັບການຮ່ວມມືທີ່ແທ້ຈິງລະຫວ່າງສອງປະເທດໃຫ້ສູງຂຶ້ນຢ່າງບໍ່ຢຸດຢັ້ງ,ແລະໜູນຊ່ວຍລາວໃນການເພີ່ມທະວີຄວາມສາມາດການພັດທະນາດ້ວຍຕົນເອງ.
ພາຍໃຕ້ການຊີ້ນຳນຳພາຈາກ “ແຜນການເຄື່ອນໄຫວກ່ຽວກັບການສ້າງຄູ່ຮ່ວມຊາຕາກຳຈີນ-ລາວ” ທີ່ທ່ານປະທານ ສີຈິ້ນຜິງ ແລະທ່ານປະທານ ບຸນຍັງ ວໍລະຈິດ ລົງນາມຮ່ວມກັນ, ການສ້າງຄູ່ຮ່ວມຊາຕາກຳຈີນ-ລາວໄດ້ຢືນຢູ່ແຖວໜ້າໂດຍຕະຫຼອດ,ແລະໄດ້ແຕກດອກອອກຜົນຢ່າງບໍ່ຢຸດຢັ້ງ. ຈີນແລະລາວຊ່ວຍເຫຼືອເຊິ່ງກັນແລະກັນ,ຮ່ວມມືກັນຕ້ານກັບພະຍາດໂຄວິດ-19,ໄດ້ຊຸກຍູ້ວຽກງານການປ້ອງກັນແລະຄວບຄຸມພະຍາດໂຄວິດ-19 ຂອງແຕ່ລະປະເທດໃຫ້ໄດ້ຮັບໝາກຜົນທາງຍຸດທະສາດທີ່ສຳຄັນ. ໃນສະພາບການແຜ່ລະບາດຂອງພະຍາດໂຄວິດ-19, ຈີນແລະລາວໄດ້ເປີດ “ເສັ້ນທາງສະດວກວ່ອງໄວ”, ສ້າງ “ເສັ້ນທາງສີຂຽວ”,ໄດ້ຊຸກຍູ້ການແລກປ່ຽນແລະຮ່ວມມືກັນໃນຂົງເຂດຕ່າງໆລະຫວ່າງສອງຝ່າຍມີການຟື້ນຟູແລະພັດທະນາຢ່າງວ່ອງໄວ, ພ້ອມກັນນັ້ນ, ສອງຝ່າຍຮ່ວມກັນຜ່ານຜ່າຄວາມຫຍຸ້ງຍາກຕ່າງໆແລະຕ້ານກັບພະຍາດໂຄວິດ-19 ພ້ອມທັງກ້າວໄປໜ້າ,ຊຸກຍູ້ການສ້າງທາງດ່ວນວຽງຈັນ-ວັງວຽງເຊິ່ງເປັນທາງດ່ວນສາຍທຳອິດຂອງລາວໃຫ້ມີຄວາມຄືບໜ້າແລະຈະສ້າງສຳເລັດໃນໄວໆນີ້; ໃນວັນທີ 27 ພະຈິກຜ່ານມາ, ພິທີມອບຮັບແລະເປີດນຳໃຊ້ຫ້ອງທົດລອງກວດນິວຄຼີອິກຫາເຊື້ອໄວຣັດໂຄວິດ-19 ທີ່ລັດຖະບານຈີນຊ່ວຍເຫຼືອລາວໄດ້ຈັດຂຶ້ນຢູ່ນະຄອນຫຼວງວຽງຈັນ ສປປ ລາວ. ແນ່ນອນ, ທັງໝົດເຫຼົ່ານີ້ເປັນພຽງສ່ວນໜຶ່ງຂອງໝາກຜົນການຮ່ວມມືສອງຝ່າຍໃນສະພາບມີການແຜ່ລະບາດຂອງພະຍາດໂຄວິດ-19, ໃນຂັ້ນຕອນຕໍ່ໄປ, ສອງຝ່າຍຍັງຈະສືບຕໍ່ວາງແຜນລວມກ່ຽວກັບການສ້າງຄູ່ຮ່ວມຊາຕາກຳຈີນ-ລາວຕາມກົດລະບຽບທົ່ວໄປທີ່ໄດ້ລະບຸໄວ້ໃນ “ແຜນການເຄື່ອນໄຫວກ່ຽວກັບການສ້າງຄູ່ຮ່ວມຊາຕາກຳຈີນ-ລາວ”.
ພວກຂ້າພະເຈົ້າເຊື່ອໝັ້ນວ່າ: ຄຽງຄູ່ກັບການຊຸກຍູ້ການສ້າງຄູ່ຮ່ວມຊາຕາກຳຈີນ-ລາວ, ໃນຂະບວນການເຊື່ອມຕໍ່ກັນທາງດ້ານຍຸດທະສາດລະຫວ່າງ “ໜຶ່ງແລວໜຶ່ງເສັ້ນທາງ” ກັບຍຸດທະສາດ “ຫັນປະເທດທີ່ບໍ່ມີທາງອອກສູ່ທະເລເປັນປະເທດເຊື່ອມໂຍງເຊື່ອມຈອດ”, ການຮ່ວມມືລະຫວ່າງສອງປະເທດຈະມີຈຸດພົ້ນເດັ່ນຫຼາຍກວ່າເກົ່າແລະປະກອບສ່ວນເຂົ້າໃນການພັດທະນາຂອງລາວຢ່າງໃຫຍ່ຫຼວງກວ່າເກົ່າ.