ຕໍ່ກັບກໍລະນີທີ່ອາເມຣິກາໄດ້ປະກາດວ່າຈະຢຸດຕິຫຼາຍໂຄງການແລກປ່ຽນດ້ານວັດທະນະທຳຈີນ-ອາເມຣິການັ້ນ, ທ່ານນາງຮວ້າຊຸ່ນຢິງ ໂຄສົກກະຊວງການຕ່າງປະເທດຈີນໄດ້ກ່າວໃນກອງປະຊຸມຖະແຫຼງຂ່າວໃນວັນທີ 7 ທັນວານີ້ວ່າ: ຈີນເດັດດ່ຽວຄັດຄ້ານ ແລະກ່າວປະນາມຢ່າງຮຸນແຮງຕໍ່ອາເມຣິກາທີ່ຂັດຂວາງການແລກປ່ຽນດ້ານວັດທະນະທຳລະຫວ່າງຈີນ-ອາເມຣິກາຕື່ມອີກ, ຈີນຈະເດັດດ່ຽວສືບຕໍ່ນຳໃຊ້ມາດຕະການທີ່ຈຳເປັນເພື່ອຮັກສາສິດອະທິປະໄຕ, ຄວາມໝັ້ນຄົງ ແລະຜົນປະໂຫຍດການພັດທະນາຂອງຕົນ.
ວັນທີ 4 ທັນວາທີ່ຜ່ານມາ, ທ່ານໄມພົມເພວ ລັດຖະມົນຕີກະຊວງການຕ່າງປະເທດອາເມຣິກາໄດ້ອອກຖະແຫຼງການວ່າ: ຈະຈຳກັດການອອກວີຊາໃຫ້ພະນັກງານຂອງຄະນະແນວໂຮມເອກະພາບພັກກອມມູນິດຈີນ, ແລະຢຸດຕິໂຄງການແລກປ່ຽນດ້ານວັດທະນະທຳຈີນ-ອາເມຣິກາ 5 ສະບັບ. ຕໍ່ເລື່ອງນີ້, ທ່ານນາງຮວ້າຊຸ່ນຢິງກ່າວວ່າ: ອິດທິກຳລັງປໍລະປັກຈີນຢູ່ອາເມຣິກາໄດ້ຍຶດໝັ້ນແນວຄິດສົງຄາມເຢັນ, ມີເຈດຕະນາຍຸແຍ່ການເປັນປໍລະປັກກັນລະຫວ່າງຈີນ-ອາເມຣິກາໃນດ້ານຮູບຖານຈິດສຳນຶກ, ເພື່ອທຳລາຍສາຍພົວພັນຈີນ-ອາເມຣິກາຕື່ມອີກ. ການກະທຳດັ່ງກ່າວໄດ້ລະເມີດຜົນປະໂຫຍດພື້ນຖານຂອງປະຊາຊົນສອງຊາດ, ຝືນກັບກະແສການພັດທະນາຂອງປະຫວັດສາດ, ຈະຕ້ອງປະລາໄຊແນ່ນອນ.