ວັນທີ 10 ທັນວານີ້, ການແຂ່ງຂັນສີມືແຮງງານຄັ້ງທຳອິດຂອງຈີນໄດ້ຈັດຂຶ້ນຢູ່ນະຄອນກວາງໂຈ່ວແຂວງກວາງຕຸ້ງ. ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ, ປະທານປະເທດຈີນ, ປະທານຄະນະກຳມະການການທະຫານສູນກາງຈີນໄດ້ສົ່ງສານສະແດງຄວາມຊົມເຊີຍຢ່າງສຸດໃຈຕໍ່ການແຂ່ງຂັນຄັ້ງນີ້ ທັງໄດ້ສົ່ງຄວາມຢື້ຢາມຖາມຂ່າວທີ່ຈິງໃຈເຖິງຜູ້ເຂົ້າຮ່ວມການແຂ່ງຂັນແລະບຸກຄະລາກອນດ້ານເຕັກນິກທັງຫຼາຍ.
ໃນສານຊົມເຊີຍຂອງທ່ານສີຈິ້ນຜິງໄດ້ລະບຸວ່າ: ຖັນແຖວນາຍຊ່າງເຕັກນິກແມ່ນກຳລັງສຳຄັນທີ່ສະໜັບສະໜູນການຜະລິດ ແລະການປະດິດສ້າງຂອງຈີນ. ການແຂ່ງຂັນສີມືແຮງງານໄດ້ສ້າງເວທີໃຫ້ແກ່ບຸກຄະລາກອນດ້ານເຕັກນິກທັງຫຼາຍ ເພື່ອສະແດງສີມືທີ່ດີເລີດຂອງຕົນ, ແລກປ່ຽນແລະຖອດຖອນບົດຮຽນເຊິ່ງກັນແລະກັນ ເຊິ່ງຈະເສີມຂະຫຍາຍບົດບາດອັນຕັ້ງໜ້າໃນການຂະຫຍາຍຖັນແຖວນາຍຊ່າງເຕັກນິກ ແລະຊຸກຍູ້ການພັດທະນາເສດຖະກິດສັງຄົມ.
ໂດຍໄດ້ຮັບການອະນຸມັດຈາກລັດຖະບານຈີນ, ກະຊວງຊັບພະຍາກອນມະນຸດແລະປະກັນສັງຄົມຈີນຈະຈັດການແຂ່ງຂັນສີມືແຮງງານໃນທົ່ວປະເທດ ເຊິ່ງຈະເລີ່ມແຕ່ປີ 2020 ເປັນຕົ້ນໄປ. ການແຂ່ງຂັນຄັ້ງທຳອິດນີ້ມີຫົວຂໍ້ວ່າ: “ຍຸກໃໝ່ ເຕັກນິກໃໝ່ ຄວາມໄຝ່ຝັນໃໝ່”, ການແຂ່ງຂັນປະກອບມີ 86 ລາຍການ ເຊິ່ງແມ່ນການແຂ່ງຂັນສີມືດ້ານເຕັກນິກສັງລວມລະດັບຊາດທີ່ມີລະດັບສູງສຸດ, ມີລາຍການຫຼາຍທີ່ສຸດ ແລະມີຂະໜາດໃຫຍ່ທີ່ສຸດ ນັບແຕ່ປະເທດຈີນໃໝ່ໄດ້ສະຖາປະນາເປັນຕົ້ນມາ.