ໃນໂອກາດຕອບຄຳຖາມຂອງນັກຂ່າວໃນກອງປະຊຸມຖະແຫຼງຂ່າວທີ່ຈັດຂຶ້ນໃນວັນທີ 14 ທັນວານີ້, ທ່ານວາງເຫວີນປິ່ນ ໂຄສົກກະຊວງການຕ່າງປະເທດຈີນກ່າວວ່າ: ຈີນຊົມເຊີຍປະເທດນອກອະນຸພາກພື້ນແມ່ນ້ຳຂອງທີ່ໄດ້ສະເໜີຄຳເຫັນທີ່ມີລັກສະນະສ້າງສັນກ່ຽວກັບການພັດທະນາແລະນຳໃຊ້ຊັບພະຍາກອນນ້ຳຂອງປະເທດແມ່ນ້ຳລ້ານຊ້າງ-ແມ່ນ້ຳຂອງ, ແຕ່ຄັດຄ້າການປຸກປັ່ນຢ່າງເດັດດ່ຽວ. ຈີນຈະຊຸກຍູ້ການຮ່ວມມືດ້ານຊັບພະຍາກອນນ້ຳຢູ່ແມ່ນ້ຳລ້ານຊ້າງ-ແມ່ນ້ຳຂອງຢ່າງແໜ້ນແຟ້ນບໍ່ປ່ຽນແປງ, ເພື່ອສ້າງປະກອບສ່ວນຫຼາຍກວ່າເກົ່າໃຫ້ແກ່ 6 ປະເທດແມ່ນ້ຳລ້ານຊ້າງ-ແມ່ນ້ຳຂອງເພື່ອຮ່ວມກັນຮັບມືກັບໄພແຫ້ງແລ້ງແລະຊຸກຍູ້ການພັດທະນາແບບຍືນຍົງ.
ຂ່າວແຈ້ງວ່າ, “ໂຄງການຕິດຕາມເຂື່ອນແມ່ນ້ຳຂອງ” ທີ່ກະຊວງການຕ່າງປະເທດອາເມຣິກາສະໜັບສະໜູນເລີ່ມປະຕິບັດໃນວັນທີ 14 ທັນວານີ້. ໂຄງການດັ່ງກ່າວສ້າງຂຶ້ນເພື່ອຕິດຕາມຂໍ້ມູນທີ່ກ່ຽວຂ້ອງຂອງເຂື່ອນຈີນທີ່ສ້າງຂຶ້ນຢູ່ແມ່ນ້ຳລ້ານຊ້າງເຊິ່ງເປັນຍານເໜືອຂອງແມ່ນ້ຳຂອງ. ຕໍ່ເລື່ອງນີ້, ທ່ານວາງເຫວີນປິ່ນ ຊີ້ໃຫ້ເຫັນວ່າ: ພາຍຫຼັງເຂື່ອນໄຟຟ້ານ້ຳຕົກໃນແມ່ນ້ຳລ້ານຊ້າງໄດ້ສ້າງຂຶ້ນເປັນຕົ້ນມາ, ໂດຍຜ່ານການສະສົມນ້ຳໃນລະດູຝົນແລະປ່ອຍນ້ຳໃນລະດູແລ້ງ, ຈີນໄດ້ເອົາໃຈໃສ່ຄຸ້ມຄອງບໍ່ໃຫ້ເກີດມີສະພາບການໄຫຼຂອງນ້ຳມີລັກສະນະຫຼາຍຫຼືໜ້ອຍເກີນໄປ. ວົງການວິທະຍາສາດສາກົນແລະຄະນະກຳມາທິການແມ່ນ້ຳຂອງລ້ວນແຕ່ເຫັນວ່າ, ເຂື່ອນໄຟຟ້ານ້ຳຕົກແມ່ນ້ຳລ້ານຊ້າງມີຜົນດີຕໍ່ການຮັກສາບໍລິມາດນ້ຳໄຫຼໄດ້ຢ່າງໝັ້ນທ່ຽງ, ມີຜົນດີຕໍ່ວຽກງານປ້ອງກັນໄພນ້ຳຖ້ວມແລະໄພແຫ້ງແລ້ງຂອງປະເທດແມ່ນ້ຳຂອງ.