ທ່ານ ສີຈິ້ນຜິງ ປະທານປະເທດຈີນໄດ້ສົ່ງສານຊົມເຊີຍເຖິງເວທີປຶກສາຫາລືສາກົນກ່ຽວກັບບົດຮຽນສຳເລັດຜົນດ້ານການຫຼຸດຜ່ອນຄວາມທຸກຍາກຂອງມວນມະນຸດທີ່ໄດ້ໄຂຂຶ້ນຢູ່ນະຄອນຫຼວງປັກກິ່ງໃນວັນທີ 14 ທັນວານີ້.
ໃນສານຊົມເຊີຍຂອງທ່ານ ສີຈິ້ນຜິງ ໄດ້ເນັ້ນໜັກວ່າ: ການລຶບລ້າງຄວາມທຸກຍາກແມ່ນຄວາມໃຝ່ຝັນຮ່ວມກັນຂອງມວນມະນຸດ. ພັກກອມມູນິດແລະລັດຖະບານຈີນໄດ້ຖືເອົາຊີວິດການເປັນຢູ່ທີ່ດີຂອງປະຊາຊົນເປັນເປົ້າໝາຍສູ້ຊົນຢ່າງສະເໝີຕົ້ນສະເໝີປາຍແລະໄດ້ສຸມຄວາມພະຍາຍາມຢ່າງລຳບາກເປັນເວລາດົນນານເພື່ອແກ້ໄຂບັນຫານີ້. ແຕ່ປີ 2012 ເປັນຕົ້ນມາ, ຈີນໄດ້ເລີ່ມເປີດບັ້ນລຶບລ້າງຄວາມທຸກຍາກໃນຂັ້ນສຸດທ້າຍຢ່າງຮອບດ້ານບົນພື້ນຖານການຫຼຸດຜ່ອນຄວາມທຸກຍາກໃນເມື່ອກ່ອນ. ຜ່ານຄວາມພະຍາຍາມຢ່າງຕໍ່ເນື່ອງເປັນເວລາ 8 ປີ, ປະຊາກອນຜູ້ທຸກຍາກຢູ່ໃນຊົນນະບົດຂອງຈີນຕາມມາດຖານໃນປັດຈຸບັນໄດ້ຫຼຸດພົ້ນອອກຈາກຄວາມທຸກຍາກທັງໝົດໃນປີນີ້, ເມືອງທຸກຍາກໄດ້ຫຼຸດພົ້ນອອກຈາກຄວາມທຸກຍາກທັງໝົດ, ປະຊາກອນຜູ້ທຸກຍາກຢູ່ໃນຊົນນະບົດເກືອບ 100 ລ້ານຄົນໄດ້ຫຼຸດພົ້ນອອກຈາກຄວາມທຸກຍາກ.
ທ່ານ ສີຈິ້ນຜິງ ກ່າວເນັ້ນວ່າ: ປັດຈຸບັນ, ພະຍາດໂຄວິດ-19 ຍັງສືບຕໍ່ແຜ່ລະບາດຢູ່ໃນທົ່ວໂລກ,ວຽກງານຫຼຸດພົ້ນອອກຈາກຄວາມທຸກຍາກໄດ້ຜະເຊີນໜ້າກັບສິ່ງທ້າທາຍທີ່ຂ້ຽວຂາດ. ຈີນຍິນດີຮ່ວມມືກັບບັນດາປະເທດໃນໂລກ,ຮ່ວມມືກັນຊຸກຍູ້ຂະບວນການຫຼຸດຜ່ອນຄວາມທຸກຍາກຂອງສາກົນ,ຊຸກຍູ້ການສ້າງປະຊາຄົມຮ່ວມຊາຕາກຳຂອງມວນມະນຸດ.