ວັນທີ 20 ທັນວານີ້, ທາງດ່ວນລາວ-ຈີນຕອນວຽງຈັນ-ວັງວຽງເຊິ່ງເປັນທາງດ່ວນເສັ້ນທຳອິດຂອງລາວທີ່ຈີນແລະລາວຮ່ວມກັນລົງທຶນກໍ່ສ້າງໄດ້ສ້າງສຳເລັດແລະເປີດນຳໃຊ້ກ່ອນເວລາກຳນົດ 13 ເດືອນ. ໃນມື້ດັ່ງກ່າວ, ພິທີເປີດນຳໃຊ້ທາງດ່ວນໄດ້ຈັດຂຶ້ນຜ່ານທາງວິດີໂອຢູ່ນະຄອນຫຼວງວຽງຈັນຂອງລາວແລະນະຄອນຄຸນໝິງແຂວງຢຸນນານຂອງຈີນໃນເວລາດຽວກັນ, ທ່ານ ບຸນຍັງ ວໍລະຈິດ ປະທານປະເທດລາວໄດ້ເຂົ້າຮ່ວມພິທີເປີດການນຳໃຊ້ທາງດ່ວນດັ່ງກ່າວທີ່ຈັດຂຶ້ນຢູ່ນະຄອນຫຼວງວຽງຈັນ.
ທາງດ່ວນລາວ-ຈີນເລີ່ມຈາກນະຄອນຫຼວງວຽງຈັນຫາຊາຍແດນລາວ-ຈີນ, ມີໄລຍະທາງທັງໝົດປະມານ 440 ກິໂລແມັດ, ແມ່ນພາກສ່ວນທີ່ສຳຄັນຂອງເສັ້ນທາງຄົມມະນາຄົມຈີນ-ແຫຼມອິນດູຈີນ. ຫຼັງຈາກສ້າງສຳເລັດແລ້ວ, ດ້ານໜຶ່ງ, ຈະເຊື່ອມຕໍ່ 4 ແຂວງແລະ 1 ນະຄອນຫຼວງຂອງລາວຢ່າງມີປະສິດທິຜົນຄື: ນະຄອນຫຼວງວຽງຈັນ,ແຂວງວຽງຈັນ,ແຂວງຫຼວງພະບາງ,ແຂວງອຸດົມໄຊແລະແຂວງຫຼວງນ້ຳທາ, ກາຍເປັນເສັ້ນທາງຄົມມະນາຄົມຫຼັກຢູ່ພາຍໃນປະເທດລາວ, ຈາກດ່ານບໍ່ຫານ-ບໍ່ເຕັນໄປຫານະຄອນຫຼວງວຽງຈັນຂອງລາວພຽງແຕ່ໃຊ້ເວລາ 5 ຊົ່ວໂມງເທົ່ານັ້ນ,ສາມາດປະຢັດເວລາໄດ້ປະມານ 15 ຊົ່ວໂມງເມື່ອທຽບກັບ 20 ຊົ່ວໂມງໃນປັດຈຸບັນ,ເຊິ່ງຈະເປັນການເລັ່ງການຊຸກຍູ້ຍຸດທະສາດຂອງລາວຈາກ“ປະເທດທີ່ບໍ່ມີທາງອອກສູ່ທະເລ”ກາຍເປັນ “ປະເທດເຊື່ອມໂຍງເຊື່ອມຈອດກັບພາກພື້ນ”,ພ້ອມທັງຊຸກຍູ້ການພັດທະນາເສດຖະກິດສັງຄົມຂອງລາວໄດ້ຢ່າງແຂງແຮງ. ອີກດ້ານໜຶ່ງ, ກໍມີຜົນດີຕໍ່ການເລັ່ງລັດການສ້າງຕາໜ່າງຄົມມະນາຄົມທີ່ວ່ອງໄວທີ່ປົກຄຸມທົ່ວແຫຼມອິນດູຈີນ,ທັງເປັນການເຊື່ອມຕໍ່ເສັ້ນທາງດ່ວນລະຫວ່າງຈີນກັບລາວ,ໄທ,ມາເລເຊຍແລະສິງກະໂປຢ່າງມີປະສິດທິຜົນ, ການສ້າງເສັ້ນທາງດ່ວນສາຍຫຼັກຢ່າງວ່ອງໄວຈະເປັນການເນັ່ງເສັ້ນທາງຄຸນໝິງ-ສິງກະໂປ,ເຊິ່ງມີຄວາມໝາຍທີ່ສຳຄັນແລະຍິ່ງໃຫຍ່ຕໍ່ການພັດທະນາການທ່ອງທ່ຽວທີ່ຂັບລົດຂ້າມແດນດ້ວຍຕົນເອງ,ການຈໍລະຈອນສິນຄ້າຂ້າມແດນ,ການຮ່ວມມືດ້ານການຄ້າຂ້າມແດນ,ການແລກປ່ຽນດ້ານວັດທະນະທຳຂ້າມແດນ,ການຊຸກຍູ້ການສ້າງແລວເສດຖະກິດຈີນ-ແຫຼມອິນດູຈີນ,ການຊຸກຍູ້ການເຊື່ອມໂຍງແລວເສດຖະກິດພາກພື້ນເຂົ້າກັນ,ຊຸກຍູ້ການສ້າງປະຊາຄົມຮ່ວມຊາຕາກຳພາກພື້ນແລະຊຸກຍູ້ຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ໃຫ້ພັດທະນາເຂົ້າສູ່ລວງເລິກຢ່າງແທ້ຈິງ.
ທາງດ່ວນຕອນວຽງຈັນ-ວັງວຽງແມ່ນໄດ້ຮັບການເຊັນສັນຍາລົງທຶນພາຍໃຕ້ການເປັນສັກຂີພິຍານຈາກທ່ານປະທານ ສີຈິ້ນຜິງ ແລະທ່ານປະທານ ບຸນຍັງ ວໍລະຈິດ, ໄດ້ຖືກຈັດເຂົ້າຢູ່ໃນ “ຖະແຫຼງການຮ່ວມຈີນ-ລາວ”ແລະ “ແຜນການເຄື່ອນໄຫວກ່ຽວກັບການສ້າງປະຊາຄົມຮ່ວມຊາຕາກຳຈີນ-ລາວ”, ແມ່ນໂຄງການນຳໜ້າໃນການທົດລອງຈັດຕັ້ງປະຕິບັດຂໍ້ລິເລີ່ມ“ໜຶ່ງແລວໜຶ່ງເສັ້ນທາງ”,ໄດ້ເຊື່ອມຕໍ່ນະຄອນຫຼວງວຽງຈັນແລະເມືອງວັງວຽງທີ່ເປັນເມືອງທ່ອງທ່ຽວທີ່ມີຊື່ສຽງທີ່ສຸດຂອງລາວ, ມີໄລຍະທາງທັງໝົດເຖິງ 111 ກິໂລແມັດ,ການອອກແບບທາງດ່ວນໄດ້ມີການປະສານສົມທົບກັນລະຫວ່າງມາດຖານແລະກົດລະບຽບດ້ານການອອກແບບຂອງຈີນແລະອາຊຽນ, ເຊິ່ງເປັນທາງດ່ວນ 4 ຊ່ອງທາງຈໍລະຈອນ, ມີຄວາມໄວຕາມການອອກແບບແມ່ນ 80-100 ກິໂລແມັດຕໍ່ຊົ່ວໂມງ.
ໂຄງການດັ່ງກ່າວເລີ່ມລົງມືກໍ່ສ້າງມາແຕ່ວັນທີ 30 ທັນວາປີ 2018,ໃນໄລຍະກໍ່ສ້າງໄດ້ຜ່ານຜ່າຄວາມຫຍຸ້ງຍາກຈາກຜົນກະທົບຂອງການແຜ່ລະບາດຂອງພະຍາດໂຄວິດ-19 ໃນປີນີ້, ແຕ່ກໍໄດ້ສ້າງສຳເລັດແລະເປີດນຳໃຊ້ຢ່າງເປັນທາງການກ່ອນເວລາກຳນົດ 13 ເດືອນ. ທາງດ່ວນວຽງຈັນ-ວັງວຽງຈະຫຼຸດໄລຍະເວລາຂອງການເດີນທາງຈາກ 3 ຊົ່ວໂມງເຄິ່ງໃນປັດຈຸບັນຍັງເຫຼືອພຽງ 1 ຊົ່ວໂມງ.
ການສ້າງໂຄງການດັ່ງກ່າວສຳເລັດໄດ້ສິ້ນສຸດປະຫວັດສາດທີ່ບໍ່ມີທາງດ່ວນຢູ່ລາວ,ແມ່ນໂຄງການໃນໄລຍະເບື້ອງຕົ້ນໃນການສ້າງປະຊາຄົມຮ່ວມຊາຕາກຳຈີນ-ລາວ,ຈະເຮັດໃຫ້ລາວເຊື່ອມໂຍງເຂົ້າກັບຕາງໜ່າງການເຊື່ອມໂຍງເຊື່ອມຈອດກັນຂອງພາກພື້ນດ້ວຍໂສມໜ້າໃໝ່, ທາງດ່ວນສາຍນີ້ໄດ້ສ້າງເປັນ “ເສັ້ນທາງໃຫຍ່” ແຫ່ງການພັດທະນາແບບຍືນຍົງ,ເຊິ່ງມີຄວາມໝາຍທີ່ສຳຄັນຕໍ່ການຊຸກຍູ້ການພັດທະນາເສດຖະກິດສັງຄົມຢູ່ລາວ,ມີບົດບາດເປັນແບບຢ່າງທີ່ສຳຄັນຕໍ່ການລົງເລິກການຊຸກຍູ້ຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ແລະການສ້າງປະຊາຄົມຮ່ວມຊາຕາກຳຈີນ-ລາວ.