ວັນທີ 28 ທັນວານີ້, ທ່ານຈ້າວລີ້ຈ່ຽນ ໂຄສົກກະຊວງການຕ່າງປະເທດຈີນກ່າວໃນກອງປະຊຸມຖະແຫຼງຂ່າວວ່າ: ພາຍໃຕ້ສະພາບທີ່ເສດຖະກິດໂລກຊຸດໂຊມລົງນັ້ນ, ການລົງທຶນຂອງຈີນສຳລັບ “ໜຶ່ງແລວໜຶ່ງເສັ້ນທາງ” ລວມທັງແລວເສດຖະກິດຈີນ-ປາກິດສະຖານບໍ່ໄດ້ຫຼຸດນ້ອຍລົງຈັກເທື່ອ ມີແຕ່ເພີ່ມຂຶ້ນເທົ່ານັ້ນ.
ມີນັກຂ່າວຖາມວ່າ: ຕາມການລາຍງານຂອງສື່ມວນຊົນອິນເດຍ, ຈີນອາດຄ່ອຍໆປະຖິ້ມຄຳໝັ້ນສັນຍາທີ່ຈະລົງທຶນຢູ່ປາກິດສະຖານຕາມແລວເສດຖະກິດຈີນ-ປາກິດສະຖານ. ຕໍ່ເລື່ອງນີ້ ທ່ານຈ້າວລີ້ຈ່ຽນກ່າວວ່າ: ການລາຍງານດັ່ງກ່າວບໍ່ມີມູນຄວາມຈິງໃດໆ.
ທ່ານກ່າວວ່າ: ໂດຍຖືເປັນໂຄງການທຳອິດທີ່ມີຄວາມສຳຄັນທີ່ສຸດໃນຂອບການຮ່ວມມື “ໜຶ່ງແລວໜຶ່ງເສັ້ນທາງ”, ແລວເສດຖະກິດຈີນ-ປາກິດສະຖານທີ່ດຳເນີນມາແຕ່ປີ 2013 ນັ້ນຍັງຮັກສາທ່ວງທ່າການພັດທະນາໄດ້ຢ່າງຕັ້ງໜ້າ. ນັບແຕ່ເກີດມີການແຜ່ລະບາດຂອງພະຍາດໂຄວິດ-19 ເປັນຕົ້ນມາ, ໂຄງການຕ່າງໆຕາມແລວເສດຖະກິດຈີນ-ປາກິດສະຖານຍັງບໍ່ໄດ້ເພີກຖອນ ແລະຫຼຸດຈຳນວນພະນັກງານລົງ ຫຼືຢຸດການປະຕິບັດວຽກງານໃນນັ້ນໄດ້ເຮັດສຳໂຄງການທີ່ສຳຄັນຕ່າງໆ ເຊິ່ງໄດ້ກາຍເປັນເສົາຄ້ຳທີ່ແຂງແຮງໃຫ້ປາກິດສະຖານໃນການຕ້ານກັບພະຍາດ ແລະເຮັດໃຫ້ເສດຖະກິດມີຄວາມໝັ້ນຄົງ.
ທ່ານຈ້າວລີ້ຈ່ຽນໄດ້ແນະນຳອີກວ່າ: ໃນ 3 ໄຕມາດທຳອິດຂອງປີ 2020, ການລົງທຶນໂດຍກົງຂອງຈີນທີ່ບໍ່ແມ່ນຂະແໜງການເງິນຢູ່ບັນດາປະເທດລຽບຕາມ “ໜຶ່ງແລວໜຶ່ງເສັ້ນທາງ” ໄດ້ເພີ່ມຂຶ້ນເກືອບ 30% ເມື່ອທຽບກັບໄລຍະດຽວກັນຂອງປີ 2019. ຈີນໄດ້ສະໜອງການຊ່ວຍເຫຼືອ ແລະໃຫ້ການສະໜັບສະໜູນແກ່ຫຼາຍປະເທດທີ່ຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ໃນການຕ້ານກັບພະຍາດ ແລະຟື້ນຟູເສດຖະກິດ.