ວັນທີ 28 ທັນວານີ້, ຄະນະກຳມະການການພັດທະນາ ແລະປະຕິຮູບແຫ່ງລັດຈີນ ແລະກະຊວງການຄ້າຈີນໄດ້ປະກາດ “ບັນຊີຂະແໜງການເພື່ອສົ່ງເສີມການລົງທຶນຂອງຕ່າງປະເທດສະບັບປີ 2020” ແລະຈະເລີ່ມຈັດຕັ້ງປະຕິບັດນັບແຕ່ວັນທີ 27 ມັງກອນປີ 2021 ເປັນຕົ້ນໄປ.
ໃນນັ້ນ, ບັນຊີດັ່ງກ່າວໄດ້ເພີ່ມໃໝ່ 65 ຂໍ້ ແລະດັດແກ້ໃໝ່ 51 ຂໍ້ ເຊັ່ນ: ການຜະລິດເຄື່ອງຊ່ວຍຫາຍໃຈ, ເຄື່ອງຊ່ວຍຫາຍໃຈໃນຫ້ອງ ICU (ECMO), ເຄື່ອງຕິດຕາມອາການຄົນເຈັບ ແລະການຜະລິດເຄື່ອງກວດຫາແຊນ (PCR), ການໃຫ້ການບໍລິການດ້ານການສຶກສາທາງອອນລາຍ, ການປິ່ນປົວພະຍາດທາງອອນລາຍ ແລະການເຮັດວຽກທາງອິນເຕີແນັດ, ກໍຄືການຄົ້ນຄວ້າພັດທະນາ ແລະນຳໃຊ້ເຕັກໂນໂລຊີການສື່ສານຜ່ານມືຖື 5G ແລະອື່ນໆ.
ໂຄງການລົງທຶນຂອງຕ່າງປະເທດທີ່ນອນຢູ່ໃນບັນຊີດັ່ງກ່າວສາມາດໄດ້ຮັບສິດທິພິເສດໃນດ້ານການເກັບພາສີ, ການນຳໃຊ້ທີ່ດິນ ແລະດ້ານອື່ນໆໂດຍອີງຕາມກົດໝາຍ, ລະບຽບການວ່າດ້ວຍການບໍລິຫານ ແລະການກຳນົດຂອງລັດຖະບານ.
ເຈົ້າໜ້າທີ່ທີ່ກ່ຽວຂ້ອງຂອງຄະນະກຳມະການການພັດທະນາ ແລະປະຕິຮູບແຫ່ງລັດຈີນກ່າວວ່າ: ນີ້ເປັນມາດຕະການທີ່ສຳຄັນເພື່ອດຶງດູດການລົງທຶນຂອງຕ່າງປະເທດໃຫ້ມີຄວາມໝັ້ນຄົງຕື່ມອີກ. ການເປີດກວ້າງຂົງເຂດການລົງທຶນຂອງຕ່າງປະເທດເທື່ອນີ້ໄດ້ສຸມໃສ່ຂະແໜງການການຜະລິດ, ຂະແໜງການບໍລິການໃນຮູບແບບການຜະລິດ ແລະໂຄງການໃນພາກກາງ ແລະພາກຕາເວັນຕົກ ເພື່ອສົ່ງເສີມການລົງທຶນຂອງຕ່າງປະເທດ, ເພີ່ມຄວາມໝັ້ນໃຈຂອງນັກລົງທຶນຕ່າງປະເທດໃຫ້ຫຼາຍຂຶ້ນ ແລະຊຸກຍູ້ໃຫ້ທຶນຕ່າງປະເທດ ແລະຕ່ອງໂສ້ການສະໜອງຂອງຂະແໜງການຕ່າງໆມີຄວາມໝັ້ນຄົງຂຶ້ນຕື່ມ.