ໜ້າອັດສະຈັນ ! ເຫັດຊະນິດນີ້ຂອງຢຸນນານສາມາດສ່ອງແສງໄດ້

2021-08-31 17:10:31 |ມາຈາກ:

ເຫັດສ່ອງແສງໄດ້?! ແມ່ນແລ້ວ, ພາບອັນມະຫັດສະຈັນຄືຄວາມຝັນນີ້ ປາກົດຢູ່ໃນສວນພືດເຂດຮ້ອນສິບສອງພັນນາຂອງສະຖາບັນວິທະຍາສາດຈີນ. ມໍ່ໆມານີ້, ພະນັກງານໄດ້ພົບເຫັນ ແລະ ຖ່າຍຮູບເຫັດສ່ອງແສງທີ່ຫາຍາກຫຼາຍກຸ່ມຢູ່ໃນສວນ. ໃນເວລາກາງເວັນ ມັນເປັນເຫັດສີຂາວທຳມະດາ, ເມື່ອຮອດກາງຄືນ ມັນກໍສ່ອງແສງສີຂຽວ ເຮັດໃຫ້ມີຈຸດແສງສະຫວ່າງກະແຈກກະຈາຍຢູ່ທົ່ວທັງລຳຕົ້ນ, ປາກົດຂຶ້ນ ແລະ ຫາຍໄປເປັນບາງຄັ້ງ, ແຈ້ງ ແລະ ມືດສະຫຼັບກັນ, ເຊິ່ງເປັນສິ່ງທີ່ປະຫຼາດ ແລະ ໜ້າອັດສະຈັນຫຼາຍ.

ຢູ່ໃນກຸ່ມຂອງເຫັດ, ມີເຫັດບາງຊະນິດຈະປ່ອຍແສງສີຟ້າອ່ອນ, ສີຂຽວອ່ອນ, ສີຂາວສີເງິນແລະສີອື່ນໆ ເມື່ອຢູ່ໃນຄວາມມືດ ຫຼື ໃນຕອນກາງຄືນ, ແລະ ມັນຖືກເອີ້ນວ່າເຫັດເຮືອງແສງ. ສອງສາມປີກ່ອນ, ນັກຖ່າຍຮູບຜູ້ໜຶ່ງໄດ້ຖ່າຍຮູບເຫັດທີ່ມີແສງສະຫວ່າງຢູ່ທີ່ສວນພືດເຂດຮ້ອນສິບສອງພັນນາ ຂອງສະຖາບັນວິທະຍາສາດຈີນ, ຫຼັງຈາກນັ້ນ ເຫັດທີ່ຫາຍາກປະເພດນີ້ ໄດ້ດຶງດູດນັກທ່ອງທ່ຽວ ແລະ ນັກຖ່າຍຮູບສະໜັກຫຼິ້ນຫຼາຍຄົນມາທີ່ນີ້ທຸກປີ. ແຕ່ບໍ່ແມ່ນທຸກຄົນກໍສາມາດເຫັນເຫັດເຮືອງແສງນີ້ໄດ້ ເພາະວ່າຄວາມສະຫວ່າງ ແລະ ເວລາສ່ອງແສງຂອງມັນຖືກຈຳກັດໂດຍອຸນຫະພູມ ແລະ ຄວາມຊຸ່ມຂອງສະພາບແວດລ້ອມ, ມັນຍັງປ່ຽນແປງໄປຕາມສະພາບຂອງໂພຊະນາການ ແລະ ສະພາບອາຍຸຂອງເຫັດ.