ທ່ານ ວາງຢີ້ ຕ້ອນຮັບການເຂົ້າສຳພາດຂອງວິທະຍຸໂທລະພາບສູນກາງຈີນ
ເມື່ອບໍ່ດົນມານີ້, ທ່ານ ວາງຢີ້ ທີ່ປຶກສາແຫ່ງລັດ ທັງເປັນລັດຖະມົນຕີກະຊວງການຕ່າງປະເທດຈີນ ໄດ້ຕ້ອນຮັບການເຂົ້າສຳພາດຂອງນັກຂ່າວວິທະຍຸໂທລະພາບສູນກາງຈີນ ໂດຍໄດ້ແນະນຳສະພາບການສາກົນ ແລະ ວຽກງານການຕ່າງປະເທດໃນປີ 2020 ທັງກ່າວວ່າ, ປີ 2020 ແມ່ນປີທີ່ວຽກງານການຕ່າງປະເທດຂອງຈີນເຖິງວ່າໄດ້ພົບຄວາມຫຍຸ້ງຍາກຫຼາຍ ແຕ່ກໍຍັງກ້າວໄປໜ້າຢ່າງໜັກແໜ້ນ.
ທ່ານ ກ່າວວ່າ: ປີ 2020 ດ້ວຍຮູບການທາງວິດີໂອ, ທ່ານ ສີຈິ້ນຜິງ ປະທານປະເທດຈີນ ໄດ້ພົບປະ ຫຼື ປຶກສາຫາລືກັບຜູ້ນຳຕ່າງປະເທດຫຼາຍປະເທດ ແລະ ຜູ້ຮັບຜິດຊອບອົງການຈັດຕັ້ງສາກົນ ລວມທັງໝົດ 87 ເທື່ອ ທັງໄດ້ເຂົ້າຮ່ວມກິດຈະກຳການຕ່າງປະເທດຫຼາຍຝ່າຍທີ່ສຳຄັນ 22 ເທື່ອ. ໃນໂອກາດເຫຼົ່ານີ້, ທ່ານ ສີຈິ້ນຜິງ ຊີ້ໃຫ້ເຫັນວ່າ: ໄວຣັດບໍ່ມີພົມແດນ ແລະ ເຊື້ອພະຍາດຈະບໍ່ຈຳແນກເຊື້ອຊາດຜິວພັນ. ທົ່ວມວນມະນຸດ ເປັນປະຊາຄົມຮ່ວມຊາຕາກຳ, ຈຶ່ງຕ້ອງໄດ້ມີຈິດໃຈວິທະຍາສາດ ເພື່ອຊຸກຍູ້ການປ້ອງກັນ ແລະ ການຄວບຄຸມພ້ອມກັນ ພ້ອມທັງດຳເນີນການຮ່ວມມືກັນໃນດ້ານວັກຊີນໃນສາກົນ ແລະ ຮ່ວມກັນແນວປ້ອງກັນພະຍາດໃນຂອບເຂດທົ່ວໂລກ.
ນອກນີ້, ທ່ານ ວາງຢີ້ ກ່າວຕື່ມວ່າ: ປັດຈຸບັນ ພະຍາດໂຄວິດ-19 ຍັງພວມລະບາດຢູ່ທົ່ວໂລກ, ແນວຮົບການຕ່າງປະເທດ ຈະເຮັດວຽກງານປ້ອງກັນການແຜ່ລະບາດພະຍາດມາຈາກພາຍນອກ ແລະ ວຽກງານຊ່ວຍເຫຼືອພົນລະເມືອງຈີນທີ່ຢູ່ຕ່າງປະເທດໃຫ້ດີຢ່າງແທ້ຈິງ, ທັງສືບຕໍ່ໃຫ້ການຊ່ວຍເຫຼືອຕາມຄວາມສາມາດໃຫ້ແກ່ປະເທດແລະເຂດແຄວ້ນທີ່ມີຄວາມຕ້ອງການ.