ວັນທີ 31 ທັນວາ 2020, ທ່ານສີຈິ້ນຜິງ, ປະທານປະເທດຈີນ ໄດ້ກ່າວຄຳອວຍພອນປີໃໝ່ 2021 ຜ່ານຈາກສະຖານີວິທະຍຸໂທລະພາບສູນກາງຈີນແລະທາງອິນເຕີເນັດ. ສື່ມວນຊົນທັງພາຍໃນແລະຕ່າງປະເທດຈີນໄດ້ໃຫ້ຄວາມສົນໃຈຢ່າງກວ້າງຂວາງ ແລະບຸກຄົນວົງການວິຊາການໄດ້ຕີລາຄາສູງຕໍ່ຄຳອວຍພອນຂອງທ່ານສີຈິ້ນຜິງ.
ວັນທີ 31 ທັນວາ 2020 ຕາມເວລາທ້ອງຖິ່ນ, ເວັບໄຊຂອງໜັງສືພິມ il Giornale ເຊິ່ງເປັນໜຶ່ງໃນໜັງສືພິມທີ່ສຳຄັນລະດັບຊາດຂອງປະເທດອີຕາຣີ ໄດ້ພິມບົດຄວາມຂອງສະຖານີວິທະຍຸໂທລະພາບສູນກາງຈີນ ໂດຍໄດ້ແນະນຳເນື້ອໃນຄຳອວຍພອນປີໃໝ່ສາກົນ 2021 ຂອງທ່ານສີຈິ້ນຜິງຢ່າງຮອບດ້ານ ໂດຍແບ່ງເປັນຫຼາຍພາກສ່ວນທີ່ມີຫົວຂໍ້ຄື“ຜ່ານຜ່າຜົນກະທົບຈາກການແຜ່ລະບາດຂອງພະບາດໂຄວິດ-19 ແລະຟື້ນຟູການເຕີບໂຕຂອງເສດຖະກິດ”“ໝາກຜົນອັນຍິ່ງໃຫຍ່ທາງປະຫວັດສາດ”“ຮ່ວມມືກັນສ້າງປະຊາຄົມຮ່ວມຊາຕາກຳຂອງມວນມະນຸດ”.
ໜັງສືພິມ El Peruano ທີ່ເປັນໜັງສືພິມທີ່ສຳຄັນຂອງອາເມຣິກາ-ລາຕິນ, ໄດ້ພິມບົດວິເຄາະກ່ຽວກັບຄຳອວຍພອນປີໃໝ່ຂອງທ່ານສີຈິ້ນຜິງວ່າ, ພວກຂ້າພະເຈົ້າສາມາດຄາດຄະເນໄດ້ວ່າ, ຈີນຈະເສີມຂະຫຍາຍບົດບາດທີ່ສຳຄັນຕື່ມອີກໃນປະຊາຄົມໂລກໃນໄລຍະຫຼັງການແຜ່ລະບາດຂອງພະຍາດໂຄວິດ-19. ໃນນັ້ນ, ຈຸດທີ່ສຳຄັນທີ່ສຸດກໍຄື, ຈີນຈະສືບຕໍ່ລິເລີ່ມ ແລະຮັກສາຫຼັກການລັດທິຫຼາຍຝ່າຍຢູ່ອົງການຈັດຕັ້ງສາກົນ ແລະຢູ່ກົນໄກເຊື່ອມໂຍງເຂົ້າກັນຂອງພາກພື້ນ. ປະຊາຄົມໂລກຈະສືບຕໍ່ຕິດຕາມການເຄື່ອນໄຫວຕື່ມອີກຂອງປະເທດຈີນຢ່າງໃກ້ຊິດ.
ທ່ານຮູຣຽວ ຣິໂອສ, ຫົວໜ້າຫ້ອງການສັງເກດການນະໂຍບາຍຈີນຂອງແອສປາຍກ່າວວ່າ, ການແຜ່ລະບາດຂອງພະຍາດໂຄວິດ-19 ໄດ້ເຮັດໃຫ້ສະຖານະການສາກົນເກີດມີການປ່ຽນແປງຢ່າງເລິກເຊິ່ງ, ຈີນໄດ້ສະແດງຄວາມສາມາດບໍລິຫານທີ່ມີປະສິດທິຜົນເມື່ອຜະເຊີນໜ້າກັບສິ່ງທ້າທາຍຈາກການແຜ່ລະບາດຂອງພະຍາດ, ພ້ອມກັນນັ້ນ, ບັ້ນການຫຼຸດພົ້ນອອກຈາກຄວາມທຸກຍາກຂອງຈີນກໍໄດ້ຮັບຜົນສຳເລັດອັນຍິ່ງໃຫຍ່, ສັນຍາວ່າດ້ວຍການລົງທຶນຈີນ-ເອີຣົບົໄດ້ຊີ້ທາງຢ່າງຊັດເຈນໃຫ້ແກ່ການຮັກສາລັດທິຫຼາຍຝ່າຍ ແລະການປັບປຸ່ງການຄຸ້ມຄອງທົ່ວໂລກ ເຊິ່ງໄດ້ເຮັດໃຫ້ພວກເຮົາມີຄວາມໝັ້ນໃຈຢ່າງເຕັມທີ່ຕໍ່ການພັດທະນາຂອງຈີນ.