ຫວ່າງມໍ່ໆນີ້, ທ່ານສີຈີ້ນຜິງ ປະທານປະເທດຈີນ ແລະ ທ່ານອານເປີໂຕ ເຟີນານເດສ ປະທານາທິບໍດີອາກຊັງຕິນໄດ້ສົ່ງສານເຖິງກັນແລະກັນ, ສອງຝ່າຍໄດ້ແລກປ່ຽນຄວາມຄິດຄວາມເຫັນກ່ຽວກັບການລົງເລິກການພົວພັນລະຫວ່າງສອງປະເທດ ແລະ ການຮ່ວມມືໃນຂົງເຂດຕ່າງໆ ເຊັ່ນ, ການຕ້ານກັບພະຍາດໂຄວິດ-19 ເປັນຕົ້ນ.
ທ່ານສີຈີ້ນຜິງກ່າວເນັ້ນວ່າ, ພະຍາດໂຄວິດ-19 ແມ່ນການທົດສອບທີ່ຂ້ຽວຂາດຕໍ່ທົ່ວໂລກ. ໂດຍຜະເຊີນໜ້າກັບພະຍາດໂຄວິດ-19, ປະຊາຊົນສອງປະເທດຈີນ-ອາກຊັງຕິນໄດ້ຮ່ວມຈິດຮ່ວມໃຈ, ຊ່ວຍເຫຼືອເຊິ່ງກັນແລະກັນ, ສາຍພົວພັນມິດຕະພາບອັນເປັນມູນເຊື້ອລະຫວ່າງສອງປະເທດໄດ້ຍົກລະດັບໃຫ້ສູງຂຶ້ນໃນຂະບວນການຕ້ານກັບພະຍາດໂຄວິດ-19 ໃນຄັ້ງນີ້. ຈີນຍິນດີເພີ່ມທະວີການຮ່ວມມືໃນດ້ານການຄົ້ນຄວ້າຜະລິດ ແລະ ການນຳໃຊ້ວັກຊິນກັບອາກຊັງຕິນ, ຍິນດີສືບຕໍ່ໃຫ້ການສະໜັບສະໜູນ ແລະ ຊ່ວຍເຫຼືອອາກຊັງຕິນຕາມຄວາມສາມາດຂອງຕົນເພື່ອຕໍ່ສູ້ຕ້ານກັບພະຍາດໂຄວິດ-19.
ທ່ານເຟີນານເດສໄດ້ຕີລາຄາສູງຕໍ່ການຂະຫຍາຍການພົວພັນລະຫວ່າງສອງປະເທດ ແລະ ຜົນສຳເລັດຂອງຈີນໃນການຕ້ານກັບພະຍາດໂຄວິດ-19, ທັງໄດ້ສະແດງຄວາມຂອບໃຈຈີນທີ່ໄດ້ໃຫ້ການສະໜັບສະໜູນອາກຊັງຕິນໃນການຕ້ານກັບພະຍາດໂຄວິດ-19. ທ່ານເຟີນານເດສກ່າວວ່າ: ໂດຍຜະເຊີນໜ້າກັບສະພາບພະຍາດໂຄວິດ-19, ປະເທດຕ່າງໆຕ້ອງສາມັກຄີກັນ, ເຄົາລົບກັນ ແລະ ສະໜັບສະໜູນກັນ, ສຸມໃສ່ການສ້າງປະຊາຄົມຮ່ວມຊາຕາກຳຂອງມວນມະນຸດທີ່ທ່ານປະທານສີຈີ້ນຜິງສະເໜີອອກມານັ້ນ.