ວັນທີ 5 ມັງກອນນີ້, ທ່ານນາງຮວ້າຊຸ່ນຢີງ ໂຄສົກກະຊວງການຕ່າງປະເທດຈີນໄດ້ກ່າວໃນກອງປະຊຸມຖະແຫຼງຂ່າວວ່າ: ຈີນຫວັງວ່າອາເມຣິກາຈະສາມາດກຳນົດທິດທາງໄປຕາມກະແສຂອງຍຸກສະໄໝ, ເອົາໃຈໃສ່ຟັງຫາງສຽງຂອງປະຊາຊົນສອງຊາດກໍຄືຂອງປະຊາຄົມໂລກ, ຮ່ວມກັນກັບຈີນ, ສຸມໃສ່ການຮ່ວມມື, ຄວບຄຸມຂໍ້ຂັດແຍ້ງ, ຊຸກຍູ້ໃຫ້ການພົວພັນຈີນ-ອາເມຣິກາກັບຄືນສູ່ທິດທາງການພັດທະນາທີ່ເປັນປົກກະຕິໂດຍໄວ.
ຕາມຂ່າວລາຍງານວ່າ: ທ່ານແຈັກ ຊູລິແວນ ທີ່ປຶກສາດ້ານຄວາມໝັ້ນຄົງແຫ່ງຊາດທີ່ສະເໜີຊື່ໂດຍປະທານາທິບໍດີອາເມຣິກາທີ່ໄດ້ຮັບການເລືອກຕັ້ງໄດ້ໃຫ້ສຳພາດຕໍ່ນັກຂ່າວໃນຫວ່າງມໍ່ໆມານີ້ວ່າ: ເມື່ອທ່ານໂຈ ໄບເດັນ ຂຶ້ນດຳລົງຕຳແໜ່ງເປັນປະທານາທິບໍດີແລ້ວ, ທ່ານຫວັງວ່າຈະປຶກສາຫາລືກັບຄູ່ຮ່ວມມືແລະເພື່ອນມິດໃນເອີຣົບ, ອາຊີແລະແຫ່ງຕ່າງໆ ກ່ຽວກັບບັນຫາທີ່ວ່າ ຈະຮ່ວມມືກັນແນວໃດເພື່ອເຮັດໃຫ້ຈີນປ່ຽນແປງການເຄື່ອນໄຫວດ້ານການຄ້າຕ່າງໆ ເຊັ່ນ: ການຂາຍຫຸ້ນຕະຫຼາດແລະການອຸດໜູນລັດວິສາຫະກິດຢ່າງຜິດກົດໝາຍ, “ການບັງຄັບໃຫ້ອອກແຮງງານ” ແລະອື່ນໆ. ຈີນແມ່ນຄູ່ແຂ່ງດ້ານຍຸດທະສາດທີ່ສຳຄັນຂອງອາເມຣິກາ, ແຕ່ໃນຂົງເຂດທີ່ສອດຄ່ອງກັບຜົນປະໂຫຍດຂອງອາເມຣິກາ ເຊັ່ນ: ການປ່ຽນແປງຂອງດິນຟ້າອາກາດ, ລັດຖະບານໂຈ ໄບເດັນຈະສືບຕໍ່ຮ່ວມມືກັບຈີນ.
ໃນເວລາຕອບຄຳຖາມທີ່ກ່ຽວຂ້ອງຂອງນັກຂ່າວ, ທ່ານນາງຮວ້າຊຸ່ນຢີງກ່າວວ່າ: ກ່ຽວກັບບັນຫາການຂາຍທຸ້ມຕະຫຼາດແລະການອຸດໜູນວິສາຫະກິດຢ່າງຜິດກົດໝາຍ, ພາກສ່ວນທີ່ກ່ຽວຂ້ອງຂອງຈີນໄດ້ຊີ້ແຈງຫຼັກໝັ້ນຂອງຈີນຫຼາຍເທື່ອແລ້ວ. ສ່ວນຖ້ວຍຄວາມກ່ຽວກັບ “ການບັງຄັບໃຫ້ອອກແຮງງານ” ເປັນຖ້ອຍຄວາມທີ່ຕົວະຍົວະຫຼອກລວງທີ່ມີບາງຄົນຕັ້ງໃຈສ້າງຂ່າວລືຊື່ໆ.