ວັນທີ 14 ມັງກອນນີ້, ຫ້ອງການຖະແຫຼງຂ່າວຂອງຄະນະລັດຖະບານຈີນໄດ້ຈັດກອງປະຊຸມຂ່າວ ເພື່ອແນະນຳສະພາບການຂາເຂົ້າຂາອອກສຳລັບໝົດປີ 2020.
ທ່ານຫຼີຂຸຍເວີນ ໂຄສົກອົງການພາສີແຫ່ງຊາດຈີນກ່າວວ່າ: ປີ 2020, ຈີນໄດ້ກາຍເປັນກຸ່ມເສດຖະກິດຕົ້ນຕໍທີ່ບັນລຸການເຕີບໂຕດ້ານເສດຖະກິດທີ່ເປັນຕົວເລກບວກພຽງໜຶ່ງດຽວໃນໂລກ, ການຄ້າຂາເຂົ້າຂາອອກຂອງຈີນໄດ້ດີກວ່າຄາດໝາຍຫຼາຍ ແລະ ຂະໜາດການຄ້າກັບຕ່າງປະເທດກໍໄດ້ສ້າງສະຖິຕິໃໝ່. ຕາມສະຖິຕິ, ປີ 2020, ຍອດມູນຄ່າການຄ້າຂາເຂົ້າຂາອອກສິນຄ້າປະເພດຈັບຕ້ອງໄດ້ຂອງຈີນບັນລຸ 32.160 ຕື້ຢວນ, ເພີ່ມຂຶ້ນ 1,9% ເມື່ອທຽບໃສ່ປີ 2019. ໃນນັ້ນ, ການຄ້າສົ່ງອອກບັນລຸ 17.930 ຕື້ຢວນ, ເພີ່ມຂຶ້ນ 4%; ການຄ້ານຳເຂົ້າບັນລຸ 14.230 ຕື້ຢວນ, ຫຼຸດລົງ 0,7%; ການໄດ້ປຽບດຸນການຄ້າບັນລຸເຖິງ 3.700 ຕື້ຢວນ, ເພີ່ມຂຶ້ນ 27,4%.
ອີງຕາມຕົວເລກຂໍ້ມູນຂອງອົງການການຄ້າໂລກແລະຂອງປະເທດຕ່າງໆ, 10 ເດືອນຕົ້ນປີ 2020, ສ່ວນແບ່ງການຕະຫຼາດສຳລັບການຂາເຂົ້າຂາອອກ, ສ່ວນແບ່ງການຕະຫຼາດສຳລັບການສົ່ງອອກ ແລະ ສ່ວນແບ່ງການຕະຫຼາດສຳລັບການນຳເຂົ້າຂອງຈີນໃນຕະຫຼາດສາກົນຕ່າງກໍໄດ້ບັນລຸ 12,8%, 14,2% ແລະ 11,5% ຕາມລຳດັບ, ລ້ວນແຕ່ໄດ້ສ້າງສະຖິຕິໃໝ່ໃນປະຫວັດສາດ.