ວັນທີ 18 ມັງກອນນີ້, ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ ປະທານປະເທດຈີນໄດ້ສົ່ງໂທລະເລກສະແດງຄວາມ ຊົມເຊີຍເຖິງທ່ານຫງວຽນຟູຈອງ, ເລຂາທິການໃຫຍ່ບໍລິຫານງານສູນກາງພັກກອມມູນິດຫວຽດນາມ ປະທານປະເທດຫວຽດນາມເນື່ອງໃນໂອກາດທີ່ຈີນ ແລະ ຫວຽດນາມສ້າງຕັ້ງສາຍພົວພັນທາງການທູດນຳກັນຄົບຮອບ 71 ປີ.
ໃນສານສະແດງຄວາມຊົມເຊີຍ, ທ່ານສີຈິ້ນຜິງຊີ້ໃຫ້ເຫັນວ່າ, ໃນໄລຍະໜຶ່ງປີທີ່ຜ່ານມາ, ການພົວພັນຈີນ-ຫວຽດນາມໄດ້ຂະຫຍາຍຕົວໄປໃນທາງທິດທີ່ດີຢ່າງຕໍ່ເນື່ອງ. ຂ້າພະເຈົ້າໄດ້ສົນທະນາກັບສະຫາຍຫງວຽນຟູຈ້ອງສອງເທື່ອ, ແລະໄດ້ບັນລຸຄວາມເຫັນທີ່ເປັນເອກະພາບກັນທີ່ສຳຄັນກ່ຽວກັບການປັບປຸງ ແລະລົງເລິກການພົວພັນສອງພັກສອງລັດພາຍໃຕ້ສະພາບການໃໝ່ ທັງໄດ້ປະສານສົມທົບກັນເພື່ອຊຸກຍູ້ການຮ່ວມມືດ້ານຍຸດທະສາດຢ່າງຮອບດ້ານລະຫວ່າງສອງຝ່າຍ. ເມື່ອຜະເຊີນໜ້າກັບການແຜ່ລະບາດຂອງພະຍາດໂຄວິດ - 19, ສອງຝ່າຍໄດ້ຮ່ວມມືກັນໂດຍໄດ້ຮັບໝາກຜົນທີ່ສຳຄັນໃນການປ້ອງກັນ ແລະ ຄວບຄຸມພະຍາດ, ໄດ້ດຳເນີນກິດຈະກຳລະນຶກການສ້າງຕັ້ງສາຍພົວພັນທາງການທູດຄົບຄອບ 70 ປີຢ່າງເປັນລະບຽບຮຽບຮ້ອຍ, ໃຊ້ການກະທຳຕົວຈິງເພື່ອສ່ອງແສງໃຫ້ເຫັນເຖິງມິດຕະພາບອັນເລິກເຊິ່ງໃນຖານເປັນ ສະຫາຍ ແລະ ອ້າຍນ້ອງກັນ, ມິດຕະພາບຖານບ້ານໃກ້ເຮືອນຄຽງທີ່ດີຕໍ່ກັນລະຫວ່າງສອງປະເທດນັບມື້ນັບເຂົ້າສູ່ຈິດໃຈຂອງປະຊາຊົນຢ່າງເລິກເຊິ່ງ.
ທ່ານສີຈິ້ນຜິງເນັ້ນວ່າ: ປີນີ້ແມ່ນປີທຳອິດທີ່ຈີນໄດ້ຈັດຕັ້ງປະຕິບັດແຜນພັດທະນາເສດຖະກິດສັງຄົມແຫ່ງຊາດ 5 ປີຄັ້ງທີ 14 ແລະໄດ້ເປີດຂະບວນການໃໝ່ໃນການສ້າງສາປະເທດສັງຄົມນິຍົມທີ່ທັນສະໄໝຢ່າງຮອບດ້ານ, ພັກກອມມູນິດຫວຽດນາມກໍຈະຈັດກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13ຂອງຕົນ, ເພື່ອກ້າວໄປສູ່ເປົ້າໝາຍອັນຍິ່ງໃຫຍ່ທີ່ສ້າງສາປະເທດສັງຄົມນິຍົມທີ່ພັດທະນາແລ້ວ. ການປັບປຸງມິດຕະພາບຖານບ້ານໃກ້ເຮືອນຄຽງທີ່ດີຕໍ່ກັນ ແລະການລົງເລິກການຮ່ວມມືແບບຕ່າງຝ່າຍຕ່າງມີຜົນປະໂຫຍດລະຫວ່າງຈີນ ແລະ ຫວຽດນາມ, ແມ່ນສອດຄ່ອງກັບຜົນປະໂຫຍດຮ່ວມດ້ານຍຸດທະສາດຂອງສອງຝ່າຍ. ຂ້າພະເຈົ້າໃຫ້ຄວາມສຳຄັນຢ່າງສູງຕໍ່ການເສີມຂະຫຍາຍການພົວພັນຈີນ-ຫວຽດນາມ, ຍິນດີຮ່ວມກັບສະຫາຍຫງວຽນຟູຈ້ອງ, ຊຸກຍູ້ການພົວພັນສອງພັກສອງລັດໃຫ້ໄດ້ຮັບຄວາມຄືບໜ້າໃໝ່ຢ່າງບໍ່ຢຸດຢັ້ງ. ຂໍອວຍພອນໃຫ້ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13ຂອງພັກກອມມູນິດຫວຽດນາມຈົ່ງປະສົບຜົນສຳເລັດຢ່າງຈົບງາມ.