ໂດຍແນໃສ່ກໍລະນີທີ່ອາເມຣິກາໄດ້ປະກາດໃຊ້ມາດຕະການຂວ້ຳບາດຕໍ່ເຈົ້າໜ້າທີ່ລັດຖະບານຈີນແລະອົງການປົກຄອງເຂດບໍລິຫານພິເສດຮົງກົງຈີນຈຳນວນ 6 ທ່ານໃນກ່ອນໜ້ານີ້, ທ່ານນາງຮວ້າຊຸນຢິງ ໂຄສົກກະຊວງການຕ່າງປະເທດຈີນໄດ້ກ່າວຢືນຢັນໃນວັນທີ 18 ມັງກອນນີ້ວ່າ: ຈີນໄດ້ຕົກລົງຈະປະຕິບັດມາດຕະການຂວ້ຳບາດໃນລະດັບເທົ່າທຽມກັນຕໍ່ເຈົ້າໜ້າທີ່ອົງການບໍລິຫານ,ເຈົ້າໜ້າທີ່ລັດຖະສະພາ ແລະບຸກຄົນຂອງອົງການທີ່ບໍ່ສັງກັດລັດຖະບານອາເມຣິກາທີ່ມີຄວາມຮັບຜິດຊອບຕົ້ນຕໍຕໍ່ການປະພຶດບໍ່ດີກ່ຽວກັບບັນຫາຮົງກົງ ພ້ອມດ້ວຍຄອບຄົວຂອງເຂົາເຈົ້າ.
ໃນກອງປະຊຸມຖະແຫຼງຂ່າວຂອງກະຊວງການຕ່າງປະເທດຈີນທີ່ຈັດຂຶ້ນໃນວັນທີ 18 ມັງກອນນີ້, ທ່ານນາງຮວາຊຸນຢິງໄດ້ຊີ້ໃຫ້ເຫັນໃນເວລາຕອບຄຳຖາມຂອງນັກຂ່າວວ່າ: ການກະທຳທີ່ກ່ຽວຂ້ອງຂອງອາເມຣິກາເປັນການແຊກແຊງວຽກງານພາຍໃນຂອງຮົງກົງຢ່າງເປີດແປນ, ແລະແຊກແຊງວຽກງານພາຍໃນຂອງຈີນແລະລ່ວງລ້ຳອຳນາດທາງຕຸລາການຂອງຈີນຢ່າງບັງອາດ, ເຊິ່ງໄດ້ລະເມີດກົດໝາຍສາກົນແລະຫຼັກການພື້ນຖານຂອງການພົວພັນສາກົນຢ່າງໜັກໜ່ວງ. ຈີນເດັດດ່ຽວຄັດຄ້ານແລະກ່າວປະນາມຢ່າງຮຸນແຮງຕໍ່ເລື່ອງນີ້.
ນອກນີ້, ກ່ຽວກັບການເຄື່ອນໄຫວຂອງອາເມຣິກາໃນບັນຫາໄຕ້ຫວັນເຊັ່ນການໃຊ້ການກະທຳຈຳນວນໜຶ່ງເພື່ອຜ່ອນຄາຍຂໍ້ຈຳກັດວ່າດ້ວຍການໄປມາຫາສູ່ກັນລະຫວ່າງອາເມຣິກາກັບໄຕ້ຫວັນເປັນຕົ້ນໃນຫວ່າງກ່ອນນີ້ບໍ່ດົນ, ທ່ານນາງຮວາຊຸນຢິງກ່າວວ່າ: ເນື່ອງຈາກການກະທຳອັນຜິດພາດຂອງອາເມຣິກາ, ຈີນຈຶ່ງໄດ້ຕົກລົງໃຊ້ມາດຕະການຂວ້ຳບາດຕໍ່ເຈົ້າໜ້າທີ່ອາເມຣິກາທີ່ມີການປະພຶດບໍ່ດີໃນບັນຫາກ່ຽວກັບໄຕ້ຫວັນເຊັ່ນກັນ.