ການຮ່ວມມືລະຫວ່າງກອງທັບຈີນ-ລາວໄດ້ເສີມຂະຫຍາຍບົດບາດນັບມື້ນັບຫຼາຍຂຶ້ນໃນຂົງເຂດທີ່ກວ້າງຂວາງກວ່າເກົ່າ
ວັນທີ 20 ມັງກອນ 2021ນີ້ແມ່ນວັນສ້າງຕັ້ງກອງທັບປະຊາຊົນລາວຄົບຮອບ 72 ປີ.
ໃນຊຸມປີມໍ່ໆມານີ້, ພາຍໃຕ້ຄວາມເອົາໃຈໃສ່ ແລະ ການຊຸກຍູ້ຂອງຜູ້ນຳສອງພັກສອງລັດ, ການຮ່ວມມືລະຫວ່າງກອງທັບສອງປະເທດຈີນ-ລາວໄດ້ກ້າວສູ່ລວງເລິກຢ່າງບໍ່ຢຸດຢັ້ງ, ຂົງເຂດການຮ່ວມມືກໍໄດ້ເປີດກວ້າງອອກຢ່າງບໍ່ຢຸດຢັ້ງ. ນອກຈາກການຮ່ວມມືໃນດ້ານການທະຫານແລ້ວ, ກອງທັບສອງປະເທດກໍໄດ້ເສີມຂະຫຍາຍບົດບາດໃນຂົງເຂດການກູ້ໄພ, ຊີວິດການເປັນຢູ່ຂອງປະຊາຊົນ ແລະຂົງເຂດອື່ນໆນັບມື້ນັບເພີ່ມຂຶ້ນ.
ຍົກຕົວຢ່າງ, ໃນເດືອນກໍລະກົດປີ 2018 ຢູ່ແຂວງອັດຕະປືໄດ້ເກີດເຫດການເຂື່ອນແຕກ, ເຊິ່ງໄດ້ສ້າງຄວາມເສຍຫາຍດ້ານຊີວິດ ແລະ ຊັບສິນຢ່າງໜັກໜ່ວງ. ໃນເວລານັ້ນ, ກອງປິ່ນປົວຂອງກອງທັບປົດປ່ອຍປະຊາຊົນຈີນທີ່ພວມປະຕິບັດໜ້າທີ່ຝຶກແອບຮ່ວມ “ຂະບວນລົດໄຟສັນຕິພາບ-2018” ຢູ່ນະຄອນຫຼວງວຽງຈັນກໍຂຸ້ນຂ້ຽວສົ່ງໜ່ວຍແພດໝໍ 32 ຄົນໄປເຂົ້າຮ່ວມໜ້າທີ່ກູ້ໄພຮ່ວມກັບກອງທັບປະຊາຊົນລາວ, ເຊິ່ງເປັນໜ່ວຍກູ້ໄພສາກົນຄົບຊຸດທີ່ເດີນທາງໄປຮອດເຂດປະສົບໄພກ່ອນໝູ່. ເມື່ອເດືອນກັນຍາປີ 2019, ໃນເວລາດຳເນີນການປິ່ນປົວແບບບໍ່ເກັບຄ່າຢູ່ແຂວງຈຳປາສັກ, ກອງປິ່ນປົວຂອງກອງທັບຈີນທີ່ປະຕິບັດໜ້າທີ່ຝຶກແອບຮ່ວມ “ຂະບວນລົດໄຟສັນຕິພາບ-2019” ຍັງໄດ້ສົ່ງໜ່ວຍແພດໝໍໄປແຂວງອັດຕະປືບ່ອນທີ່ເກີດເຫດການເຂື່ອນແຕກໂດຍສະເພາະ, ເພື່ອໃຫ້ການຊ່ວຍເຫຼືອແກ່ປະຊາຊົນທ້ອງຖິ່ນ, ເຊິ່ງໄດ້ສະແດງໃຫ້ເຫັນເຖິງຄວາມເອົາໃຈໃສ່ຂອງຜູ້ນຳສອງພັກສອງລັດເວົ້າລວມ ເວົ້າສະເພາະກໍແມ່ນການເອົາໃຈໃສ່ສຸດຂີດຂອງກອງທັບສອງປະເທດຕໍ່ເຂດປະສົບໄພ ແລະ ປະຊາຊົນຜູ້ປະສົບໄພ. ສະນັ້ນຈຶ່ງສາມາດເວົ້າໄດ້ວ່າ, ໜ່ວຍແພດໝໍ “ຂະບວນລົດໄຟສັນຕິພາບ” ແລະປະຊາຊົນເຂດປະສົບໄພໄດ້ເປັນສັກຂີພິຍານໃຫ້ແກ່ມິດຕະພາບອັນເລິກເຊິ່ງລະຫວ່າງປະຊາຊົນສອງຊາດ.
ເມື່ອວັນທີ 19 ສິງຫາປີ 2019, ນັກທ່ອງທ່ຽວຈີນໄດ້ປະສົບອຸບັດເຫດທາງຖະໜົນຢ່າງໜັກໜ່ວງຢູ່ລາວ, ມີຜູ້ເສຍຊີວິດ ແລະ ບາດເຈັບຢ່າງໜັກໜ່ວງ. ຫຼັງຈາກນັ້ນບໍ່ດົນ,ຜູ້ທີ່ໄດ້ຮັບບາດເຈັບໜັກກໍຖືກນຳສົ່ງໄປປິ່ນປົວຢູ່ໂຮງໝໍ 103, ແລະໄດ້ຮັບການປິ່ນປົວເປັນຢ່າງດີຈາກແພດໝໍຂອງກອງທັບລາວ ແລະຈີນ. ໃນເຫດການເທື່ອນີ້, ຝ່າຍລາວໄດ້ຈັດຕັ້ງກຳລັງຈາກຫຼາຍຝ່າຍເຊິ່ງລວມທັງກອງທັບ ແລະ ຕຳຫຼວດເພື່ອດຳເນີນວຽກງານກູ້ໄພຢ່າງວ່ອງໄວ, ເຊິ່ງສະແດງໃຫ້ເຫັນວ່າ ຝ່າຍລາວໄດ້ໃຫ້ຄວາມສຳຄັນຢ່າງສູງຕໍ່ສາຍພົວພັນຈີນ-ລາວ.
ອີກຢ່າງໜຶ່ງ, ເລີ່ມແຕ່ເກີດມີການແຜ່ລະບາດຂອງພະຍາດໂຄວິດ-19 ເປັນຕົ້ນມາ, ກອງທັບສອງປະເທດຈີນ-ລາວກໍໄດ້ແລກປ່ຽນກັນຢ່າງໃກ້ຊິດ, ສະໜັບສະໜູນເຊິ່ງກັນແລະກັນ, ຮ່ວມມືກັນຕ້ານກັບພະຍາດ, ໄດ້ປະກອບສ່ວນອັນສຳຄັນເຂົ້າໃນການປ້ອງກັນ ແລະ ຄວບຄຸມການແຜ່ລະບາດຂອງພະຍາດໂຄວິດ-19ຢູ່ສອງປະເທດຈີນ-ລາວ, ທັງເປັນແບບຢ່າງທີ່ດີໃນພຶດຕິກຳຕົວຈິງໃນການສ້າງຄູ່ຮ່ວມຊາຕາກຳຈີນ-ລາວ ແລະ ສ້າງປະຊາຄົມສາທາລະນະສຸກຂອງມວນມະນຸດ. ການແລກປ່ຽນ ແລະ ການຮ່ວມມືເຫຼົ່ານີ້ໄດ້ຮັບການຍ້ອງຍໍຊົມເຊີຍຈາກຝ່າຍຕ່າງໆຢ່າງກວ້າງຂວາງ, ແລະໄດ້ເພີ່ມຄວາມມີຊີວິດຊີວາໃຫ້ແກ່ການຂະຫຍາຍສາຍພົວພັນລະຫວ່າງຂອງກອງທັບສອງປະເທດຈີນ-ລາວ.
