ກະຊວງການຄ້າຈີນໄດ້ຈັດກອງປະຊຸມຖະແຫຼງຂ່າວໃນວັນທີ 21 ມັງກອນນີ້. ທ່ານກ່າວເຟີ່ງ ໂຄສົກກະຊວງການຄ້າຈີນກ່າວໃນກອງປະຊຸມວ່າ: ຈີນຍິນດີເຊັນສັນຍາການຄ້າເສລີກັບຄູ່ການຄ້າຫຼາຍກວ່າເກົ່າ ເຊິ່ງລວມທັງການເອົາໃຈໃສ່ພິຈາລະນາ ເພື່ອເຂົ້າຮ່ວມ “ສັນຍາການພົວພັນຄູ່ຮ່ວມຂ້າປາຊີຟິກຮອບດ້ານແລະກ້າວໜ້າ” ຫຼື CPTPP .
ໃນປີ 2020, ມີປະເທດສະມາຊິກ 15 ປະເທດເຊິ່ງລວມທັງປະເທດຈີນ ໄດ້ເຊັນ “ສັນຍາການພົວພັນຄູ່ຮ່ວມເສດຖະກິດຮອບດ້ານຂອງພາກພື້ນ” ຫຼື RCEP ຢ່າງເປັນທາງການ ແລະໄດ້ສຳເລັດການເຈລະຈາກ່ຽວກັບສັນຍາການລົງທຶນຈີນ-ເອີຣົບຢ່າງສະດວກໃນທ້າຍປີ 2020. ເມື່ອເວົ້າເຖິງແຜນການຂອງຈີນໃນການພັດທະນາສັນຍາການຄ້າເສລີໃນບາດກ້າວຕໍ່ໄປ, ທ່ານກ່າວເຟີ່ງກ່າວວ່າ: “ພວກຂ້າພະເຈົ້າຈະຂະຫຍາຍຂອບເຂດເຄືອຂ່າຍຂອງການຄ້າເສລີຕື່ມອີກ. ພວກຂ້າພະເຈົ້າຍິນດີເຂົ້າຮ່ວມສັນຍາການຄ້າເສລີກັບຄູ່ການຄ້າຫຼາຍກວ່າເກົ່າ, ຮ່ວມກັນຊຸກຍູ້ໃຫ້ການລົງທຶນແລະການຄ້າເປັນເສລີແລະມີຄວາມສະດວກ. ນອກຈາກນີ້ແລ້ວ, ພວກຂ້າພະເຈົ້າຈະສຸມໃສ່ການຍົກລະດັບຂອງສັນຍາການຄ້າເສລີ. ພວກຂ້າພະເຈົ້າຈະຕັ້ງໜ້າຄົ້ນຄວ້າກົດລະບຽບການຄ້າເສລີທີ່ສາມາດເຊື່ອມຈອດກັບກົດລະບຽບສາກົນ ທັງສອດຄ່ອງກັບຄວາມຕ້ອງການຂອງການປະຕິຮູບແລະພັດທະນາຂອງຕົນ ເພື່ອເປີດກວ້າງການເປີດປະຕູສູ່ພາຍນອກໃນລະດັບສູງກວ່າເກົ່າ.”
ທ່ານກ່າວເຟີ່ງກ່າວຕື່ມວ່າ: ໃນຂົງເຂດການຄ້າສິນຄ້າ, ຈີນຈະຍົກສູງອັດຕາປອດພາສີໃນດ້ານການຄ້າສິນຄ້າຕື່ມອີກ, ໃນຂົງເຂດການບໍລິການແລະການລົງທຶນ, ຈະເປີດກວ້າງການຄ້າການບໍລິການແລະການລົງທຶນດ້ວຍການອະນຸມັດໃຫ້ເຂົ້າເຖິງຕະຫຼາດ, ໃນດ້ານຫົວຂໍ້ໃໝ່, ຈະຕັ້ງໜ້າເຂົ້າຮ່ວມການເຈລະຈາກ່ຽວກັບກົດລະບຽບໃໝ່ດ້ານເສດຖະກິດດີຈີຕອນ, ການອະນຸລັກສິ່ງແວດລ້ອມ ແລະອື່ນໆ.