ທ່ານສີຈິ້ນຜິງກ່າວເນັ້ນວ່າ: ຕ້ອງເສີມຂະຫຍາຍບົດບາດການນຳພາ ແລະ ຮັບປະກັນຂອງການກໍ່ສ້າງພັກຢ່າງເຄັ່ງຄັດແລະ ຮອບດ້ານ
ວັນທີ 22 ມັງກອນນີ້, ກອງປະຊຸມຄົບຄະນະຄັ້ງທີ 5 ຂອງຄະນະກຳມະການກວດກາສູນກາງພັກກອມມູນິດຈີນສະໄໝທີ 19 ໄດ້ຈັດຂຶ້ນຢູ່ນະຄອນຫຼວງປັກກິ່ງ, ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນໄດ້ກ່າວຄຳປາໄສທີ່ສຳຄັນໂດຍກ່າວເນັ້ນວ່າ: ຕ້ອງເສີມຂະຫຍາຍບົດບາດການນຳພາ ແລະ ຮັບປະກັນຂອງການກໍ່ສ້າງພັກຢ່າງເຄັ່ງຄັດຮອບດ້ານ ຮັບປະກັນການຈັດຕັ້ງປະຕິບັດ ໜ້າທີ່ ແລະ ບັນລຸເປົ້າໝາຍໃນແຜນການ 5 ປີຄັ້ງທີ 14.
ທ່ານສີຈິ້ນຜິງຊີ້ອອກວ່າ, ການສໍ້ລາດບັງຫຼວງທີ່ເປັນຄວາມສ່ຽງໃຫຍ່ທີ່ສຸດສຳລັບການກຳອຳນາດຂອງພັກນັ້ນຍັງມີຢູ່, ບັນຫາຄົງຄ້າງຍັງບໍ່ສາມາດແກ້ໄຂໃຫ້ໝົດໄດ້, ແຕ່ກໍມີບັນຫາໃໝ່ເກີດຂຶ້ນອີກ. ການສໍ້ລາດບັງຫຼວງ ແລະ ການຕໍ່ສູ້ຕ້ານການສໍ້ລາດບັງຫຼວງຈະມີຢູ່ເປັນໄລຍະຍາວ, ຖ້າເມື່ອໃດມີຄວາມລົດລະ ໝາກຜົນທີ່ຍາດມາໄດ້ແລ້ວນັ້ນກໍອາດຈະສູນເສຍໄປໝົດ, ການຕ້ານການສໍ້ລາດບັງຫຼວງບໍ່ມີທາງເລືອກອື່ນ, ຕ້ອງເດັດດ່ຽວກ້າວເດີນໄປໜ້າເພື່ອແກ້ໄຂບັນຫາຫຍຸ້ງຍາກຕ່າງໆ.
ທ່ານສີຈິ້ນຜິງກ່າວເນັ້ນວ່າ, ພາກສ່ວນຄຸ້ມຄອງການເງິນ ອົງການຕິດຕາມຄຸ້ມຄອງ ຄະນະພັກທ້ອງຖິ່ນ ແລະ ອົງການປົກຄອງທ້ອງຖິ່ນແມ່ນຜູ້ຮັບຜິດຊອບຕົ້ນຕໍ, ຕ້ອງປະສານສົມທົບເປັນຢ່າງດີໃນການຕ້ານການສໍ້ລາດບັງຫຼວງດ້ານການເງິນ ແລະ ການແກ້ໄຂຄວາມສ່ຽງດ້ານການເງິນ, ເພີ່ມທະວີການຕິດຕາມຄຸ້ມຄອງ ແລະ ການປັບປຸງພາຍໃນໃນຂົງເຂດການເງິນ. ພ້ອມກັນນັ້ນ, ຕ້ອງວາງແຜນ ແລະ ຈັດຕັ້ງປະຕິບັດມາດຕະການຕ້ານການສໍ້ລາດບັງຫຼວງ ແລະ ມາດຕະການປະຕິຮູບໄປພ້ອມກັນ, ຊຸກຍູ້ການປະຕິຮູບກົນໄກຕິດຕາມກວດກາໃນຂົງເຂດສຳຄັນ, ເພື່ອແກ້ໄຂຈຸດອ່ອນດ້ານລະບຽບການຢ່າງມີເປົ້າໝາຍທີ່ແນ່ນອນ.
ຕ້ອງແກ້ໄຂປະກົດການສໍ້ລາດບັງຫຼວງ ແລະ ບັນຫາດ້ານແບບແຜນທີ່ເກີດຂຶ້ນຢູ່ອ້ອມຂ້າງປະຊາຊົນຢ່າງຕໍ່ເນື່ອງ, ເຮັດໃຫ້ປະຊາຊົນໄດ້ຮູ້ໄດ້ເຫັນຄວາມຍຸດຕິທຳ ແລະ ຄວາມເປັນທຳ. ຕ້ອງເດັດດ່ຽວແກ້ໄຂບັນຫາລະເມີດວິໄນ ແລະ ກົດໝາຍໃນແນວໂຮມການເມືອງ ແລະ ກົດໝາຍ, ເດັດດ່ຽວປາບປາມກຸ່ມອິດທິພົນມືດພ້ອມ ພວກທີ່ໃຫ້ການອາລັກຂາຢູ່ເບື້ອງຫຼັງ, ສຸມໃສ່ການຈັດຕັ້ງປະຕິບັດນະໂຍບາຍທີ່ຊຸກຍູ້ການສ້າງຄວາມຮັ່ງມີຮ່ວມກັນ, ປັບປຸງປະກົດການສໍ້ລາດບັງຫຼວງ ແລະ ແບບແຜນທີ່ບໍ່ດີໃນຂົງເຂດການສຶກສາ ການປິ່ນປົວ ການເບິ່ງແຍງດູແລຜູ້ເຖົ້າ, ການປະກັນສັງຄົມ, ການຫຼຸດຜ່ອນຄວາມທຸກຍາກ ແລະ ການອະນຸລັກສິ່ງແວດລ້ອມ.
ທ່ານສີຈິ້ນຜິງຍັງກ່າວເນັ້ນຕື່ມວ່າ, ຕ້ອງປັບປຸງບູລະນະລະບົບຕິດຕາມກວດກາຂອງພັກ ແລະ ລັດ, ຖືເອົາການຕິດຕາມກວດກາພາຍໃນພັກເປັນສິ່ງຊີ້ນຳ, ບູລະນະລະບຽບການຕິດຕາມການໃຊ້ອຳນາດ ແລະ ລະບົບປະຕິບັດກົດໝາຍ ແລະ ລະບຽບວິໄນໃຫ້ສົມບູນຂຶ້ນຢ່າງບໍ່ຢຸດຢັ້ງ. ຕ້ອງເສີມຂະຫຍາຍບົດບາດການຕິດຕາມກວດກາໃນການຄຸ້ມຄອງຂັ້ນຮາກຖານຢ່າງເຕັມສ່ວນ, ໃຫ້ປະຊາຊົນມີສ່ວນຮ່ວມໃນການຕິດຕາມກວດກາ.
ນອກນີ້, ທ່ານຍັງກ່າວຕື່ມວ່າ, ອົງການກວດກາທຸກຂັ້ນຕ້ອງຮັບການຜູກມັດ ແລະ ການຕິດຕາມກວດກາຢ່າງເຂັ້ມງວດທີ່ສຸດ.